रोजिता बुद्धाचार्यको पेसा के हो भन्ने कुरामा उनी स्वयं यकिन हुन सकेकी छैनन् । यद्यपि जीवनका विभिन्न मोडमा उनले जुन–जुन काम गरिन्, सबैमा दत्तचित्त भएर लागिन् र सोहीअनुसार हात हालेका सबै क्षेत्रमा सफलता पनि हात पार्दै गइन् । 

काठमाडौंको परम्परागत नेवार परिवारमा जन्मिएकी रोजितालाई शैक्षिक योग्यताले खगोलिय वैज्ञानिक बनायो । भौतिक शास्त्र (फिजिक्स) मा अमृत साइन्स क्याम्पसवाट मास्टर्स गरेकी रोजिताले आफ्नो थेसिस भने एस्ट्रोफिजिक्स विषयमा गरिन् । नगरकोटस्थित नेसनल अब्जरभेटरीबाट बिटल जुज भन्ने ताराको अनुसन्धान गरेर तयार पारिएको उनको थेसिसले सहकर्मीहरूबीच सर्वाधिक नम्बर पनि ल्यायो । उनको अनुसन्धान बूढो तारा मानिने बिटल जुज कसरी मर्दै गएको छ भन्ने विषयमा केन्द्रित थियो । 

रोजिता भन्छिन्— तिहारपछि आकाश सफा भएका बेला यो तारा देखिन्छ । काठमाडौंमा भएको एक अन्तर्राष्ट्रिय वैज्ञानिक सम्मेलनमा रोजिताले प्रस्तुत गरेको उक्त कार्यपत्रले युरोप, अमेरिका तथा अस्ट्रेलियाका प्रोफेसरहरूलाई प्रभावित तुल्यायो । त्यहाँ विश्वका ५ सय व्यक्तिले आवेदन दिएको छोटो समयको प्रशिक्षणका लागि १४ जना छानिए, जसमा रोजिता नेपालबाट छानिने पहिलो अनुसन्धानकर्ता भइन् । अमेरिकाको बाल्टिमोरस्थित स्पेस टेलिस्कोप साईन्स इस्टिच्युटले नासाका लागि काम गर्छ । उक्त इस्टिच्युटले हब्बल टेलिस्कोपबाट प्राप्त भएका ब्रम्हाण्डका विभिन्न डाटा ८ सयभन्दा बढी वैज्ञानिकलाई उपलब्ध गराउँछ । रोजिताले त्यसमा रहेर केही समय वैज्ञानिकका रूपमा काम गरिन् । 

यो त भयो रोजिताको वैज्ञानिक जीवनको पाटो, अब चर्चा गरौं उनको अभिनयको पाटोको । नेपाल टेलिभिजनमा विज्ञानसम्बन्धी कार्यक्रम चलाउने रोजिताले थिएटर भिजेलले संचालन गरेको पहिलो अभिनय प्रशिक्षण लिने मौका पाइन् । त्यसपछि उनले अभिनय यात्रालाई पनि जारी राखिन् । उनले चारुमती नाटकमा पहिलो पटक अभिनय गरिन् । त्यसपछि एक पछि अर्को गर्दै सुइना कर्णालीका, बुद्ध वाणी, मलिनी आदि विदेशी लेखकका नाटकमा अभिनय गरिन् । कुनै पनि चरित्रमा जिवन्त अभिनय गर्न सक्ने उनको क्षमता देखेर बायोपिकका रूपमा निर्माण भएको साहित्यकार झमककुमारी घिमिरेको जिवन काँडाकी फूलमा रोजिताले झमक घिमिरेको युवा अवस्थाको भूमिका निर्वाह गरेकी छिन् । 

वैज्ञानिक तथा अभिनेत्रीबाहेक उनी साहसी पर्वतारोही पनि हुन् । पहिलो महिला समावेशी टोलीमा प्रख्यात आरोही फूर्वा तेन्जिङ शेर्पालाई सरदार बनाउदैं रोजिता लगायत महिला पत्रकारको टोलीले सन् २०१८ मा विश्वको सर्वोच्च शिखरमा पाइला हाल्यो । रोजिता हालै चीन–पाकिस्तानको सिमामा अवस्थित मुज्ताघ आटाँ (७ हजार ५ सय ९ मिटर अग्लो) हिमाल चढ्ने पहिलो नेपाली समेत भएकी छिन् । त्यसबाहेक उनले रमडुङ (५ हजार ९ सय २५ मिटर), यालुङ री (५ हजार ६ सय ३० मिटर) को पनि सफल आरोहण गरिसकेकी छिन् ।