महिला उद्यमशीलता, घरेलु तथा हस्तकलाका सामग्रीको प्रवद्र्धन तथा तीज संस्कृतिको संरक्षण गर्ने उद्देश्यले २३ औं सफ्टी तीज फेस्टिभल तथा श्रृजनशील उद्यमी मेला २०८३ आयोजना हुने भएको छ । काठमाडौंको बालुवाटारस्थित आम्रपाली ब्यांक्वेटमा पत्रकार सम्मेलन गर्दै आयोजक महिला श्रृजनशील केन्द्र र राइजिङ नेपाल प्रालि (इभेन्ट संसार डटकम)ले मेलाका बारेमा जानकारी दिएको हो । आयोजकका अनुसार काठमाडौं महानगरपालिकाकी कार्यवाहक प्रमुख सुनिता डंगोलले भदौ ५ गते बिहान ११ बजे मेलाको उद्घाटन गर्नेछिन् ।
मेला भदौ ७ गतेसम्म काठमाडौंको बालुवाटारस्थित आम्रपाली ब्यांक्वेटमा चल्नेछ । मेलामा ८० भन्दा बढी स्टल रहने आयोजकले जनाएको छ । तीमध्ये पाँचभन्दा बढी स्टल असहाय, अपाङ्गता भएका, अशक्त तथा ग्रामीण क्षेत्रका पिछडिएका महिलालाई नि:शुल्क उपलब्ध गराइएको आयोजकको भनाइ छ ।
![]()
![]()
आयोजकका अनुसार मेलामा महिला उद्यमी तथा घरेलु व्यवसायबाट उत्पादित वस्तु तथा सेवाको प्रदर्शनीसँगै तीज विशेष कार्यक्रम तथा विभिन्न गतिविधि सञ्चालन गरिनेछ । मेलामा महिला दिदीबहिनी तथा दाजुभाइ, नयाँ व्यापार तथा उद्यम सुरु गर्न चाहने व्यक्ति, अन्तर्राष्ट्रिय अवलोकनकर्ता, कलाकार तथा विद्यार्थी, सरकारी निकायका प्रतिनिधि, स्वदेशी तथा विदेशी पर्यटक, नेपाली सामग्री निर्यातकर्ता तथा मिडिया र पत्रकारलाई लक्षित गरिएको छ । मेलामा घरेलु तथा हस्तकलाका सामग्रीको प्रदर्शनी, महिला उद्यमशीलतासँग सम्बन्धित वस्तु तथा सेवा तथा तीज विशेष खानाका परिकार मुख्य आकर्षणका रूपमा रहने आयोजकले जनाएको छ । त्यस्तै, अवलोकनकर्ताका लागि नि:शुल्क स्वास्थ्य शिविर र नि:शुल्क मेहेन्दी आर्टको समेत व्यवस्था गरिनेछ । यसैगरी अवलोकनकर्ताका लागि उपहारको समेत व्यवस्था गरेको आयोजकले बताएको छ । मेलामा आउनेलाई हात खाली नजाने गरी विभिन्न उपहारको व्यवस्था गरिएको आयोजकको भनाइ छ ।
महिला श्रृजनशील केन्द्रका अनुसार संस्थाद्वारा सञ्चालित सामाजिक, आर्थिक, शैक्षिक, राजनीतिक, प्रशासनिकलगायत विभिन्न क्षेत्रमा आयोजित मेला, गोष्ठी, सेमिनार, तालिम तथा कार्यक्रम मार्फत हालसम्म ७ सय भन्दा बढी महिला स्वरोजगार भएका छन् ।
