भदौ १४ गते शनिबार गोदावरीस्थित सनराइज कन्भेन्सनमा हलमा आयोजित कार्यक्रममा मीस नेपाल ग्राण्ड फिनालेमा २६ वर्षीया लुना लुईटेल मिस नेपाल वर्ल्ड २०२५ घोषित भएकी हुन् । द हिडन ट्रेजरले आयोजना गरेको मिस नेपालको ३१ औं संस्करणमा २५ प्रतियोगीलाई पछाडि पार्दै लुनाले मिस नेपाल वर्ल्डको ताज पहिरिएकी हुन् ।  २०२४ की मिस नेपाल वर्ल्ड आश्मा कुमारी केसीले लुनालाई मिस नेपाल वर्ल्ड २०२५ को ताज पहिर्‍याइ दिइन् । स्कूभा डाइभरसमेत रहेकी लुना १७ वर्षको उमेरमै अस्ट्रेलिया पुगेर नर्सिङ अध्ययन गरिन् । ‘युनिभर्सिटी अफ सिड्नी’ बाट पब्लिक हेल्थमा मास्टर्स गरिरहेकी उनी यसअघि सन् २०१५ मा मिस टिन ब्युटि प्याजेन्टको पहिलो उपविजेता बनेकी थिइन् । लुना ‘लर्न, अर्न एण्ड रिटर्न’ को अवधारणामा विश्वास गर्छिन् । प्रतियोगितामा दीपशिखा नेपाल, ‘मिस नेपाल कस्मो’ को ताजसहित पहिलो उपविजेता बनिन् भने उरुषा भण्डारीले ‘मिस नेपाल इन्टरनेसनल’ को ताज जित्न सफल भइन् ।

 जापानमा हुने मिस इन्टरनेसनलमा उनले नेपालको तर्फबाट प्रतिनिधित्व गर्नेछिन् । त्यसै गरी सोनी घले प्रतियोगितामा ‘मिस नेपाल अर्थ २०२५’ घोषित भइन् ।  अन्य उपाधितर्फ ‘मिस कन्फिडेन्ट’ को उपाधि प्राज्ञिका क्षेत्रीले जितिन् । उरुषा भण्डारीले ‘मिस टाइमलेस एलिगेन्स’ र ‘रियल मिस पपुलर च्वाइस’ गरेर एकसाथ दुई उपाधि जितिन् । साईच्छा थापाले ‘डाबर बाटिका मिस ब्यूटिफूल हेयर’ जित्दा ‘मिस हेल्थी स्किन’को उपाधि आरती थापाले पाइन् । त्यस्तै, ‘बिवाइडी मिस ग्रीन भिजनरी’ को उपाधि जग्दिश्वरी शाहले प्राप्त गर्दै गर्दा ‘एन्बियो मिस प्रिस्टिन’ प्रियांका थापाको हात पर्‍यो । त्यस्तै कार्यक्रममा लुना लुईटेलले ‘मिस डिएचआई’, दीपशिखा नेपालले ‘नेसनल लाइफ मिस इम्पावर्ड च्वोइस’ र स्मृति श्रेष्ठले ‘फारमसी फेस अफ दि इयर २०२५’ को उपाधि जित्न सफल भए । स्मृतिले यो सहित मिस फोटोजेनिकको उपाधि समेत हात पार्न सफल भइन् । श्रृष्टीकुमारी तामाङले ‘एनसेल मिस ब्यूटी विथ पर्पज’ जितिन् । श्रुती महर्जनले ‘द काठमाडौं पोस्ट मीस इन्टेलेक्चुअल’ र निलिमा पाण्डेले ‘यति वुमन विथ विङ्गस’ को उपाधि प्राप्त गरे ।

प्रतियोगिताको शुरुवातमा शीर्ष १२ प्रतिस्प्रधी छानिएको हो । त्यसपछिको प्रश्नोत्तर राउण्डमा बाह्रै जनाले निर्णायकले सोधेको प्रश्नको उत्तर दिएका थिए । त्यस्तै, अन्तिम शीर्ष चारजनाले भने पहिल्यै दिइएको प्रश्नको उत्तर लेखेर सुनाउनु पर्ने थियो । शीर्ष ४ मध्येका उरुषा भण्डारी, लुना लुईटेल, सोनी घले र दीपशिखा नेपाललाई आयोजकले एउटै प्रश्नको जवाफ सोधेका थिए । ‘यदि तपाईंले सौन्दर्य प्रतियोगिताबारे एउटा धारणा परिवर्तन गर्न सक्नुहुन्छ भने त्यो के हो र किन ?’ यस प्रश्नमा सबैले फरक–फरक विचारसहितको लिखित जवाफ पढेर सुनाएका थिए ।
प्रतियोगिताको निर्णायकमण्डलमा द हिडन ट्रेजरका अध्यक्ष अजयरत्न स्थापित, मिस नेपाल वर्ल्ड २०१८ श्रृंखला खतिवडा, हिमालय टेलिभिजनका अध्यक्ष श्याम कंडेल, अभिनेत्री आना शर्मा, कान्तिपुर मिडिया ग्रुपका सीईओ महेश स्वांर, अरेता पब्लिक रिलेसनका सीईओ रुची पाण्डे, साईमेक्सका सीईओ शाहिल श्रेष्ठ, मिस नेपाल अर्थ २०१८ प्रिया सिग्देल, मिस्टर नेपाल २०२३ समर्पण जंग कार्की, डा. श्रृष्टी श्रेष्ठ प्रजापति तथा डिजाइनर मनिश राई थिए ।

थप लेखहरू

ऐना युनिसेक्स सलुनको वार्षिकोत्सव सम्पन्न

सिर्जनशील उद्यमी मेलाको आज अन्तिम दिन

नाइमा नेपाल मोबिलिटी एक्स्पो -५० बढी ब्रान्डहरू सहभागी

मीन नेपाल बच्चैदेखीको सपना - लुना
मलाई अहिले एकदम सर्रियल अनुभव भइरहेको छ । मलाई लाग्छ, अहिले म सपना र विपनाको बीचको समयमा छु । यो क्राउन देख्दा, हातको फूल देख्दा म युनिभर्सलाई धन्यवाद दिन चाहन्छु । म मेरो परिवारलाई पनि धन्यवाद दिन चाहन्छु । मलाई तालिम दिने प्रशिक्षकहरुलाई धन्यवाद दिन चाहन्छु ।मैले विद्यालयस्तर पाठशालाबाट पूरा गरेकी हुँ । ग्लोबल म्यानेजमेन्टमा प्लस टु सकें । १७ वर्षको उमेरमा अस्ट्रेलिया जाँदा म अस्ट्रेलियन परिवारसँग त्यसपछि काकाकाकीसँग ३ वर्ष बसें । अस्ट्रेलियाको बसाइ घरजस्तै सहज भयो । अनि मैले यता म्यानेजमेन्ट गरेको भएर नर्सिङ पढें । त्यो भन्दा अगाडि मैले एक वर्षको एक्स्ट्रा फाउन्डेसन कोर्सर् गरें । त्यसपछि मैले ३ वर्षे नर्सिङ अध्ययन गरें । अहिले म मास्टर गर्दैछु । मलाई सानैदेखि पानीसँग खेल्न मनपर्ने, त्यसैले मैले स्कुबा डाइभिङ कोर्स पनि गरें । फिलिपिन्समा मैले स्कुबा डाइभिङ कोर्स गरेको हुँ । अनि फिलिपिन्सबाटै स्कुबा डाइबिङको लाइसेन्स लिएँ । मेरो दाजु पनि स्कुबा डाइबर हुनुहुन्छ, म उहाँबाटै प्रेरित भएकी हुँ ।
मिस नेपाल मेरो सानैदेखिको सपना हो । तर, मैले कहिल्यै प्रतियोगितामा सहभागी हुन सकिन । टाढैबाट हेर्थें, तर २०२३ बाट चाहि मैले हिम्मत गरें । र, आज मैले यो उपाधि पनि जितें ।

तस्बीर - महेशमान प्रधान