साराको राज

चलचित्र रुद्रबाट डेब्यु गरेकी नायिका सारा सिर्पाली अहिले आफ्नो तेस्रो चलचित्र सुश्री सम्पत्तिमा व्यस्त छिन् । आफूलाई भर्सटाइल नायिकाका रूपमा स्थापित गर्ने रहर बोकेकी सारा अभिनयका साथमा आफ्नो सौन्दर्य र फिटनेसप्रति उत्तिकै सचेत छिन् । उनी चलचित्र तथा फेसन शोहरूमा समेत सक्रिय रहँदै आएकी छिन् ।

फिट रहन

फिट एन्ड फाइन रहनुपर्छ भन्ने मान्यता राख्ने सारा देख्दा सुन्दर मात्र होइन मानसिक रूपमा पनि सुन्दर र ताजा रहन हरसम्भव प्रयास गर्छिन् । पहिले फिटनेस क्लब धाउने सारा अहिले घरमै एक्सरसाइज गर्छिन् । उनले घरमै हिट वर्क आउट तथा कार्डियो गर्नुका साथै ५ केजी वेट उचाल्छिन् । घरमै हप्ताको ४ पटक जिम गर्छिन् । फ्याट कन्ट्रोलका लागि उनी मासु र चिनी खान्नन् भने हरिया सागसब्जी बढीभन्दा बढी खान्छिन् । सारा ब्रेकफास्टमा ४ थरिका फलफूल मिसाएर तयार पारिएको स्मुदी रुचाउँछिन् ।

स्किन एन्ड हेयर केयर

हरेक दिन क्लिन्जिङ गर्ने सारा हप्ताको एकपटक मह र लेमनको प्याक लगाउँछिन् । समय–समयमा फेसियल गराइरहने सारा राम्रो ब्रान्डको मात्र मेकअप सामग्री प्रयोग गर्छिन् । साराको केशको रंग नेचुरल हो, उनमा केश कलर गर्ने रहर छैन, त्यही भएर घरमै मेहन्दी लगाएर हेयर ट्रिटमेन्ट गर्छिन् ।

पहिरन

सारालाई स्मार्ट क्याजुअल लुक्स मनपर्छ । ट्राउजर, जिन्स तथा स्कर्ट उनलाई मनपर्ने आउटफिट हुन् । इभेन्ट तथा ठाउँअनुसार कस्तो पहिरन लगाउने उनले पहिले नै योजना बनाइसकेकी हुन्छिन् । सारा प्राय: प्रोग्राम, पार्टी वा मिटिङमा जानुअघि आफ्नी स्टाइलिस्ट तथा फेसन डिजाइनर सुनीता श्रेष्ठसँग सल्लाह लिन्छिन् । उनलाई सबैभन्दा मन पर्ने पहिरन भने जिन्स पाइन्ट र जिन्स ज्याकेट नै हो साथमा जिन्स, ट्राउजरसँग ब्लाउज र ब्लेजर पनि मन पर्छ । आफूलाई सुहाउने र युनिक पहिरनमा सबैको नजरमा पर्नुपर्छ भन्ने उनको मान्यता छ ।

एसेसरिज

सिल्भर, ह्वाइट गोल्ड तथा फ्युजन ज्वेलरी मन पराउने सारा नेकको एसेसरिज लगाउन बढी रुचाउँछिन् । धेरैजसो मसला विड्सवाट एसेसरिज लिने सारासँग इयरिङको राम्रै कलेक्सन छ । बजारमा कुनै नयाँ राम्रो इयरिङ देखियो कि किनिहाल्ने उनको बानी छ ।

फुट वेयर

सुटिङमा बाहेक उनी कमै मात्र हिल लगाउँछिन् । फ्ल्याट जुत्ता बढी लगाउने साराका प्राय: सबै जुत्ता युकेबाट पठाइएका हुन् । हिलमा त्यति सहज महसुस नहुने भएकाले उनीसँग विभिन्न डिजाइनका फ्ल्याट जुत्ताहरू छन् ।