उँभो–उँभो जाँदा लेक लाग्यो

सुनपातीको सुगन्धले

पटुकी फुस्क्यो, जिउ सुक्यो

तीन तले घरको धन्दाले ......

पुरातन समाजमा गृहिणीको दुःखको चित्रण यो गीतमा छ । जति ठूलो घर, उति धेरै कामको बोझ । घरका सदस्यका लागि खाना पकाउनु, जुठा भाँडा माझ्नु, कुचो लगाउनु, लुगाफाटो मिलाउनु सबै एक्लै गृहिणीले नै गर्नुपर्थ्यो । पहिले महिलाहरू काम गर्दागर्दै हैरान हुन्थे । हुन त पछिल्लो समय पनि यस्तो दुःख पूर्णरूपमा टरेको छैन । तर अहिले धेरै समस्याको हल भएको छ ।

समाजको पारिवारिक संरचना केही बदलिएको छ । अहिले आमा वा बुहारीले मात्र घरको काम भ्याउनुपर्छ भन्ने छैन । सबैजना मिलिजुली भात पकाउने, कुचो लगाउने, लुगा धुने काम गरिरहेकै हुन्छन् । पछिल्लो समय यसमा आधुनिक विज्ञानका आविष्कार (घरायसी उपकरणहरू) सहयोगी बनेका छन् । घरको कामलाई सहज अनि छरितो पनि बनाइदिएका छन् । 

घरको सरसफाइमा कुचोको साटो भ्याकुम क्लिनर प्रयोग गर्न थालिएको छ । यसले घरको फोहोर–मैला र धूलो सफा गर्छ । वासिङ मेसिनले लुगा धुने झन्झटबाट मुक्त गराइदिएको छ । यस्ता धेरै उपकरण छन्, जसले घरको काममा सघाउँछन् । त्यस्तै ग्यास चुल्हो, रेफ्रिजिरेटर, मिक्स्चर ग्राइन्डर, डिसवासरले भान्सालाई छरितो बनाइदिएका छन् । धेरैको भान्सामा पानी तताउने कित्ली वा जगले पानी तताउन सजिलो र छरितो बनाइदिएको छ । 

चाडपर्वमा घरको बोझ कम गर्न विभिन्न कम्पनीले बजारमा विद्युतीय सामग्रीहरू ल्याएका छन् । सिजी इलेक्ट्रोनिक्सभित्र मात्र दशवटा ब्रान्ड छन् । त्यसभित्र आठ सयभन्दा बढी मोडलका सामान उपलब्ध छन् । कम्पनीका बजार प्रबन्धक गौरव हमालले पछिल्लो समय जीवनलाई सहज बनाउने उत्पादनमा जोड दिएको बताए । उनले भने, ‘अहिले मानिसहरूमा व्यस्तता बढेको छ । सबैतिर भ्याउनुपर्ने भएकाले कामको बोझ बढी हुन्छ ।’ अझ गृहिणीमाथि पूरै परिवारको स्वास्थ्यको जिम्मेवारी पनि भएकाले यस्ता उपकरणले उनलाई सहज बनाउने गौरव जिकिर गर्छन् । 

कम्पनीले स्वास्थ्यमैत्री उपकरण ‘भाइरोसिल’ बजारमा भित्र्याएको छ । कोरोनाको भय अझै कायम रहेकाले यो उपकरण यतिबेला उपयोगी हुन सक्छ । यसले भाइरस र ब्याक्टेरिया नष्ट गर्ने दाबी कम्पनीको छ । मिनी फ्रिज जस्तो साइज हुने भएकाले जहाँ पनि राख्न मिल्ने खालको छ । यसले सामानलाई किटाणुरहित बनाउँछ । यसभित्र सामान राखेर बटम अन गर्नुपर्छ । दुईदेखि छ मिनेटसम्ममा सामान किटाणुमुक्त हुन्छन् । परावैजनी किरण उत्सर्जन गर्ने यो उपकरण आइएसओद्वारा सर्टिफाइड छ । स्वचालित यो उपकरणको प्रभावकारिता ९९ दशमलव ९ प्रतिशत रहेको दाबी कम्पनीको छ ।

छरितो बन्यो भान्सा 

विगतमा परम्परागत चुल्होमा खाना पकाउनुपर्ने बाध्यता थियो । हुन त अहिले पनि ग्रामीण क्षेत्रमा चुल्होमै खाना पकाइन्छ । तर, यो बाध्यकारी भने छैन । दूरदराजसम्म ग्यास चुल्हो उपलब्ध छन् । सबैजसोको भान्सामा ग्यास चुल्हो राम्रो विकल्प बनेको छ । 

त्यसो त ग्यास चुल्हो मात्र होइन, विद्युतीय चुल्होले पनि खाना पकाउने कामलाई सहज अनि छरितो बनाइदिएको छ । नाकाबन्दीका बेला इन्डक्सन चुल्होको प्रचलन व्यापक भयो । परम्परागत र ग्यास चुल्होको राम्रो विकल्प हो यो । 

ग्यास चुल्हो, इन्डक्सन चुल्होजस्तै खाना पकाउन राइस कुकर पनि हरेकको भान्सामा उपलब्ध छ । यसमा भात बसाइदिए पुग्छ । राइस कुकरमा भात बसाएर गृहिणीहरूले अरु काम पनि सजिलै सिध्याउन सक्छन् । 

खाना तताउन, पकाउनका लागि माइक्रो ओभन पनि सहज विकल्प बनेको छ । यससँगै बार्बी क्यु, ग्रील मेसिनले खानेकुरालाई भिन्न–भिन्न स्वादमा बनाउने सुविधा दिएको छ । अचार वा मरमसला पिस्नका लागि सिलौटो नै चाहिन्छ भन्ने छैन । ढुंगाको सिलौटो वा काठको ओखलमा मरमसला, अचार पिस्नुपर्ने बाध्यता मिक्स्चर ग्राइन्डरले हटाइदिएको छ । पछिल्लो समय अधिकांशको घरमा यो उपकरण उपलब्ध छ । त्यसो त अचार पिस्न मात्र नभै जुस बनाउन समेत यो उपयोगी छ । 

घरधन्दाको बोझ घट्दै

जुठा भाँडा सफा गर्नु, कुचो लगाउनु अनिवार्य काम हुन् । झट्ट हेर्दा सामान्य लागे पनि यस्तो कामले गृहिणीको दैनिकीलाई बोझिलो बनाइरहेको हुन्छ । पटक–पटक यस्तो काम गर्नुपर्दा उनीहरू हैरान हुन्छन् । 

दैनिक तीन–चार छाक खाना पकाउनु र उत्ति नै पटक जुठा भाँडा सफा गर्नु झन्झटिलो हुन्छ । तर, अब यो झन्झटलाई पार लगाइदिएको छ, ‘डिसवासर’ ले । यो स्वचालित रूपमा भाँडा धुने उपकरण हो । आधुनिक भान्साका लागि डिसवासर अनिवार्य बन्दै आएको छ । आफ्नो आवश्यकतानुसार ठूलो, सानो जस्तोसुकै आकार र गुणस्तरमा उपलब्ध हुने डिसवासरले जुठा भाँडा माझ्नुपर्ने बाध्यतालाई टारिदिएको छ । 

भान्साका खानेकुरालाई चाँडै सड्न, गल्न, कुहिनबाट बचाउन रेफ्रिजेरेटरले सहयोग गर्छ । सागसब्जी भण्डारण गरेर ताजा खानका लागि होस् वा बाँकी रहेका खानेकुरा राख्न, यो राम्रो विकल्प भएको छ । कुनै पनि पेयलाई अरु चिसो बनाएर खानका लागि पनि रेफ्रिजेरेटर उपयोगी छ । 

समय र श्रमको बचत

भात–भान्सा एवं घरधन्दाको काम निकै झन्झटिलो हुन्छ । झिनामसिना लाग्ने यी कामले श्रम र समय पनि निकै खर्च गराउँछन् । त्यसैले त कतिपय गृहिणी घरधन्दाको कामबाट दिक्क हुन्छन् । 

घरको काम गरिरहँदा अन्य काम गर्न भ्याउँदैनन् । उत्तिकै थकान पनि लाग्छ । तर, पछिल्लो समय उपलब्ध विद्युतीय उपकरणले गर्दा घरको काम सहज बनाइदिएको छ । यसले समय र श्रम बचाइदिएको छ । यी घरायसी उपकरणहरू बिजुलीबाट चल्ने भएकाले अन्य इन्धन खर्च हुँदैन । साथै गृहिणीको स्वास्थ्यमा पनि यसको सकारात्मक प्रभाव छ । 

यही कुरालाई मध्यनजर गर्दै विभिन्न कम्पनीले बजारमा नयाँ–नयाँ उपकरणहरू भित्र्याउँछन् । चाडपर्वका समयमा पाहुनाहरू आवतजावत गरिरहने भएकाले धेरै परिकार पकाइरहनुपर्ने हुन्छ । धेरै परिकार एकैपटक पकाएर राख्दा स्वादिलो नहुन सक्छ । यस्तोमा ‘एयर फायर’ उपयोगी हुन सक्छ । जसले गर्दा पर्खेर पकाइरहनुपर्ने र डढ्छ कि भनेर हेरिरहनुपर्ने झन्झट हुँदैन । यसमा मासु वा आलु फ्राई गर्न सकिन्छ । तेलमा तारेको जस्तै डिप फ्राई हुने भएकाले अहिले यसको माग बढेको बाल्ट्राका बजार प्रबन्धक सम्विद सौरभले बताए । बाल्ट्राको ‘एयर फायर’ विभिन्न मोडलमा उपलब्ध छ । 

छुट तथा अफर

चाडपर्वलाई लक्षित गरी विभिन्न ‘होम एप्लाइन्सेन्स’ ले छुट तथा अफर बजारमा ल्याएको छ । एलजी, टीएसएल, गोदरेज, साओमी, बाल्ट्रा, बेको, केन्टले नयाँ तथा पुराना उत्पादनमा नगद छुट र उपहार योजना ल्याएको छ । 

बाल्ट्राले सुनको सिटी अफर ल्याएको छ । यो योजनाअन्तर्गत कम्पनीले बाल्ट्राको कुनै पनि सामग्री खरिद गर्दा ‘लक्की ड्र’ मार्फत ग्राहकहरूलाई आकर्षक उपहार प्रदान गर्ने योजना छ । यसका लागि ग्राहकले बाल्ट्रा स्पेस प्यान वा भ्याट बिल नम्बर र आनो नाम टाइप गरी ३४००१ मा एसएमएस गर्नुपर्नेछ । कम्पनीले हरेक साता फेसबुक, इन्स्ट्राग्राम र युट्युबमार्फत लाइभ गरेर विजेता छनोट गर्ने जनाएको छ । विजेताले चार ग्राम तौल भएको २२ क्यारेट सुन पाउने कम्पनीको भनाइ छ । बाल्ट्राको कुनै पनि सामान खरिद गर्ने ग्राहक सहभागी हुन पाउनेछन् । 

त्यसैगरी एलजी, टीसीएल, गोदरेज, केन्टको आधिकारिक विक्रेता सीजी इलेक्ट्रोनिक्सले पनि छुट तथा अफर योजना ल्याएका छन् । एलजीको ‘हार्दिक बधाई तपाईंलाई यस चाडबाड विशेष सबैलाई’, टीसीएलको ‘यस दसैं–तिहार, टीसीएलमा क्यास ब्याक र बम्पर उपहार’, गोदरेजको ‘नाउ इज वाउ फेस्टिबल, कम खर्च धेरै बचत’ र केन्टको चाडबाड विशेष योजना छ । 

एलजीले एसी, वासिङ मेसिन र हिटरको खरिदमा निःशुल्क जडान सुविधा, नगद छुट र उपहारको योजना ल्याएको छ । कम्पनीले एलजीका सामानमा ५ करोडभन्दा बढीको उपहार योजना ल्याएको छ । यसका साथै क्यास ब्याकको पनि व्यवस्था गरेको छ । गोदरेजले आफ्नो उत्पादनमा ३१ प्रतिशतसम्मको क्यास ब्याक दिनुका साथै तीन जना विजेताले ५५ इन्चको टीसीएल कर्भ स्मार्ट एलइडी टिभी पाउनेछन् । त्यसैगरी टीसीएल ब्रान्डका कुनै पनि सामग्री किन्दा ५८ हजार ७ सय रुपैयाँसम्मको क्यास ब्याक जित्न सकिन्छ । यो योजनाअन्तर्गत बम्पर उपहारमा दुई जना ग्राहकले ५५ इन्चको टीसीएल कर्भ स्मार्ट एलइडी टिभीसमेत जित्न सक्नेछन् । 

त्यस्तै, ‘यो उत्सवमा घरलाई बनाऔं सीजी स्मार्ट होम’ को नारासहित सीजीले कुनै पनि सामग्रीको खरिदमा क्यास ब्याक र उपहार योजना ल्याएको छ । यो योजनाअन्तर्गत ग्राहकले हरेक १५–१५ दिनमा लक्की ड्रमार्फत सीजीको डबल डोर रेफ्रिजेरेटर पाँच जनालाई र बम्परमा तीन जोडीले दुई रात र तीन दिनको मेघौली सेराइको प्याकेज पाउनेछन्, जित्न सक्नेछन् । यस कम्पनीको एलइडी टीभी, रेफ्रिजेरेटर, चेस्ट फ्रिजर, सोकेस, कुलर र भ्याकुमको खरिद गर्दा ग्राहकले दुई हजारदेखि चार हजार रुपैयाँसम्म क्यास ब्याक पाउने कम्पनीका बजार प्रबन्धक गौरव हमालले बताए ।