आकर्षक व्यक्तित्वकी धनी पूजा सेढाईं (२५) झापाको तोपगाछीमा जन्मिएकी हुन् । फरासिली, सबैसँग घुलमिल हुनसक्ने क्षमताका अतिरिक्त उनमा अभिनय कला पनि छ । आफ्नो व्यवसायिक जीवन र करियरलाई सँगै अगाडि बढाइरहेकी पूजाले विगतमा टेलिसिरियलमा पनि अभिनय गरेकी छिन् । अभिनय एवं नृत्यमा रुचि राख्ने पूजा एडभरटाइजिङ एजेन्सीमा कार्यरत छिन् । उनले हिजोआजका कुरा, क्राइम स्टोरी, गंगाजमुनाजस्ता आधा दर्जनभन्दा बढी टेलिशृंखलामा काम गरिसकेकी छिन् । सशक्त अभिनय तथा कुशल नृत्य क्षमताकी पूजा कलालाई साधनाका रूपमा लिने कुरा बताउँदै भन्छिन्, 'नेपालमा मनोरञ्जन संसारको भविष्य राम्रो छ । पढेलेखेका र राम्रा घरानाका युवतीहरू पनि यो क्षेत्रमा आइरहेकाले यसको गुणस्तर वृद्धि हुँदै गएको कुरामा दुईमत छैन । यसका लागि राम्रा तालिम, गोष्ठी एवं कार्यशालाहरू संचालन गर्ने टे्रन्ड वृद्धि हुनुपर्छ भने कर्पोरेट हाउसहरूको लगानी पनि भित्रिनुपर्छ ।

रसुमिलालाई बनायो संघर्षले सफल

अधिराज्यका होलसेल बिक्रेतालाईर् लेडिज आइटमको तयारी पोसाक दिएर वितरकका रूपमा काम गर्दै आएकी बालाजु ढुङ्गेधाराकी रसुमिला श्रेष्ठ सफल व्यवसायी हुन् । विगत ३० वर्षदेखि अनवरत रूपमा यो व्यवसायमा लागेकी ४९ वर्षीया श्रेष्ठले १५ हजार रूपैंयाँमा डेरा बसेर पसल भाडामा लिई काठमाडौंको वटु टोलमा सानो थोक बिक्रेताका रूपमा व्यवसाय सुरु गरेकी थिइन् । त्यसपछि उकाली-ओरालीमा नथाकी व्यवसायमा लागेकी श्रेष्ठ आज एक सफल व्यवसायीका रूपमा परिचित छिन् । बाटिक इन्टरनेसनलकी प्रोपराइटर रसुमिलाका श्रीमान् भरतकुमार श्रेष्ठ धौलागिरी विजनेस प्रा.लि.का प्रबन्ध निर्देशक हुन् । आज आफूलाई यो ठाउँसम्म ल्याइपुर्‍याउने आफ्ना श्रीमान् नै भएको श्रेष्ठ बताउँछिन् । दुई छोराकी आमा श्रेष्ठले व्यवसायमा लागेदेखि कहिल्यै घाटा बेहोर्नुपरेको छैन । उनी आजको काम भोलिलाई बाँकी राख्दिनन् । आँटिली स्वभावकी श्रेष्ठ हरेक महिलाले बाहिरको काम पनि उत्तिकै गर्नसक्नेे बताउँछिन् । महिलाहरू आर्थिक पक्षमा सबल बन्नसके पुरुषसरह समुदायमा स्थापित हुने कुरामा उनी विश्वस्त छिन् ।

सरस्वती कटुवाल

शोभाको अभियान

६ सन्तानमध्येकी जेठी छोरी शोभा राई गुरुङका बुबा बेन्जो, गितार तथा हार्मोनियमका सौखिन थिए । त्यसैले उनले बाल्यावस्थादेखि नै संगीतसँग साक्षात्कार हुने अवसर प्राप्त गरिन् । जीवन नदीझैं निरन्तर बगिरहन्छ कहिल्यै सुकेर जाँदैन, शरीर मरेर गए पनि कृति मर्दैन भन्ने शोभा लामो समयदेखि राष्ट्रभक्ति गीतमा लागिपरिरहेकी छिन् । उनले हाम्रो देश नेपाल शीर्षकको गीति संग्रह पनि तयार पारेकी छिन् । त्यसपछि उनले सुपर डायमण्ड कलेक्सन भिसिडी निर्माण गरिन् । धार्मिक आस्था भएकी राई नेपालमा क्रिक्रेट रंगशाला निर्माणका निम्ति सांगीतिक वल्र्ड टुर गर्ने तयारीमा छिन् । राई संगीतका माध्यमद्वारा शेर्पा क्लाइम्बरहरूका लागि आर्थिक सहयोग जुटाउने अभियानमा पनि सक्रिय छिन् । शोभा भन्छिन्, ज्यानको बाजी राखेर शरीरले थेग्नेभन्दा बढी भार बोकी सगरमाथा उक्लने साहसी शेर्पाहरूलाई राज्यले दिने सुविधा निक्कै कम छ । उनीहरू नै हाम्रो मुलुकको पर्यटकका लागि खम्बा हुन् । यही कुरालाई मध्यनजर गरी मैले यो नयाँ अभियान थालनी गर्ने निधो गरेकी हुँ ।'