गोपालका गीत संग्रह सार्वजनिक

नारी संवाददाता

भाद्र १३, २०७९  

काठमाडौंमा आयोजित एक कार्यक्रममा चर्चित गीतकार, संगीतकार, गायक एवं वाद्यवादक गोपाल योञ्जनको ‘गोपालय' गोपाल योञ्जनका गीतहरू’ नामक पुस्तक तथा ‘हर नाद’ गीत सार्वजनिक गरिएको छ । पुस्तक र गीत गोपालको २५ औं स्मृति दिवसको अवसरमा सार्वजनिक गरिएको हो ।

‘हर नाद’ गीतको रेकर्डिङ भारत र नेपालमा भएको हो । त्यतिबेला प्रयोग गरिएका वाद्यवादनमै रेकर्ड गरिएका गीतको म्युजिक भिडियोसमेत सार्वजनिक गरिएको छ । यो गोपालको अन्तिम आध्यात्मिक गीत हो । यो गीत लेखेर रफ रेकर्ड गरी उनले आफ्ना चेलाहरूलाई सिकाएका थिए । त्यसताका रेकर्डिङभने गरिएको थिएन । हाल गोपाल योञ्जनकी नातिनी तथा सिर्जनासिंह योञ्जनकी छोरी नवश्री सिंहको स्वरमा यो गीत रेकर्ड गरिएको हो ।

गोपालको निधन भएपछि धेरैले उनको पुस्तक निकाल्नुपर्ने आवाज उठाएका थिए । तर, पुस्तक निकाल्न उनको परिवारलाई चुनौती थियो । सबै पक्षलाई समेट्दै पुस्तक निकाल्ने कि ?भन्ने अन्योलकै बीच हाल परिवारले उनले लेखेका गीतहरूको पुस्तक प्रकाशित गर्ने निर्णय ग¥यो । हुन त यसअघि केही प्रकाशकले ‘गोपाल योञ्जनका १० गीत’ भन्दै पुस्तकहरू सार्वजनिक गरिसकेका छन् । गोपालको निधनलगत्तै श्रीमती रेन्छिन योञ्जन र छोरी सिर्जनासिंहले उनका पुराना गीतहरू खोज्दै संकलन गर्न थालेका थिए ।

बुवाको निधन भएको दुई वर्षसम्म सिर्जनाले पीडासँग जुध्न रेडियो, टेलिभिजनमा कुनै पनि गीत नसुनेको बताइन् । त्यसपछि केही त गरौं भन्दै विस्तारै ‘मलाई माफ गरिदेऊ’ बोलको गीत रि–रेकर्ड गर्ने र आमाले गरेको काममा उनले सहयोग गर्दै गइन् । बुवाका गीतहरू सुन्दै जाँदा उनलाई अर्थपूर्ण लाग्न थालेको उनले बताइन् । कुनै–कुनै गीत त कसरी लेख्नुभयो होला भनेर सिर्जना घोत्लिन्थिन् । उनले भनिन्, ‘मेरी आमाले यो पुस्तक संगीतका विद्यार्थीका लागि लक्षित गरेर निकाल्ने उद्देश्य राख्नुभएको हो ।’

गोपालका करिब साढे दुई सय गीत पुस्तकमा समेटिएका छन् । उनले लेखेका गीत मात्र होइन, संगीत भरेका गीतहरू,  विदेशका केही कार्यक्रमका लागि बनाइएका गीत खोजी गर्ने क्रम जारी छ । ‘उहाँको निधन भएको २५ वर्ष भइसक्यो । तर, खोज्ने क्रममा परिवार नै अग्रसर हुनुपर्दो रहेछ,’ सिर्जनाले भनिन्, ‘कसैले मेरा लागि गीत लेखिदिनु न भन्दा पनि बुवाले गीत लेखिदिनुभएको थियो । ती गीतहरू एक–दुई पटक गाइयो होला तर ज–जसले लिएर जानुभयो उहाँसँगै सीमित छन् ।

उहाँहरूलाई त्यो गीतको सम्झना छ भनेर सोध्दा, ओहो बिर्सिसकें, आधा मात्रै आउँछ भन्ने थुप्रै गीतहरू छन् ।’ उनले त्यस्तै व्यक्तिहरूलाई  झकझकाउँदै गीतहरू संकलन गर्ने जमर्को गरेको बताइन् ।

‘पुलिस क्लबमा छँदा रचना गरिएका गीतहरूको समेत खोजी गर्दा सबै त भेटेनौं तर केही संकलन गर्न सफल भएका छांै’ उनले भनिन् । ‘यसमा समय भने धेरै लाग्यो ।’ अमेरिकाको कर्णेल युनिभर्सिटीमा योञ्जन परिवारले गोपालका गीतहरू अर्काइभ गर्दै आएको छ ।

 

 

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्


?>