कुल–कुल समर फेसन

सुजाता मुखिया

जेष्ठ ११, २०७८ समी तापक्रम २५ डिग्री सेल्सियसबाट उकालो लाग्दै गर्दा आङको लुगा छोटिँदै, घट्दै र पातलिँदै जान्छ । यो मौसमकै माग हो । फेसन डिजाइनर तेन्जिङ छेतेन भुटिया भन्छन्, ‘मौसम सुहाउँदो पहिरनले फेसन बजार चलायमान बनाइरहन्छ ।’

मौसममा परिवर्तनसँगै फेसन–शैली पनि फेरिँदै जाने उनको बुझाइ छ । मौसमी चक्रजस्तै वर्षभरमा फेसन–शैलीले एक फन्को लगाउँछ । जाडोमा बाक्लो र न्यानो, झरीमा वाटरप्रुफ र खुला, गर्मीमा हल्का र पातलो । डिजाइनर तेन्जिङका अनुसार हरेक मौसममा उही पहिरन शैली पुनरावृत्ति हुन्छ । ‘मौसम फेरिँदा एकदमै नयाँ र पृथक् शैलीको फेसन चल्छ भन्ने होइन’ उनी भन्छन्, ‘अघिल्लो मौसममा जस्तो चलेको हो, त्यही किसिमको चल्ने हो । तर त्यसमा थोरै मोडिफाइ भने हुनसक्छ ।’

धेरैजसो अवस्थामा मौसमले नै फेसनको शैली र रूपरंग तय गर्छ । कतिपय फेसन भने सदाबहार हुन्छ, जो बाह्रैमास चल्छ । जस्तो कि, जिन्स सर्ट, पाइन्ट । कति फेसन क्षणिक हुन्छ, जुन निश्चित समयमा चल्छ र हराउँछ । यस्तो फेसन सेलिब्रेटी, चलचित्र वा ग्ल्यामर दुनियाँबाट प्रभावित हुन्छ । मौसमी फेसनको भने आयु लामो हुन्छ ।

मौसमको माग बुझेर त्यहीअनुसार सुहाउँदो पहिरन शैली अपनाउनुपर्ने फेसन डिजाइनर राजेश धाख्वाको सुझाव छ । उनलाई लाग्छ, ‘त्यसरी पहिरन लगाउँदा स्टाइलिस र फेसनेबल देखाउँछ ।’ फेसन भन्नासाथ अरूभन्दा पृथक्, स्टाइलिस भनेर मात्र बुझ्न नहुने डिजाइनरहरूको धारणा छ । उनीहरू भन्छन्, ‘फेसन आफूलाई सहज लाग्ने र मौसमअनुकूल हुनुपर्छ ।’

शैली : खुला, हल्का र पातला

यतिबेला धर्तीमा गर्मीको राप बढ्दैछ । यो सँगै फेसन बजार पातलो, हल्का, खुकुलो र उज्यालो रंगका पहिरनले सजिँदैछ । गर्मीको पहिरन छरितो, उज्यालो र खुला हुनुपर्ने डिजाइनर राजेश बताउँछन् । ‘गर्मीको पहिरन छनोट गर्दा त्यसको डिजाइन, फेब्रिक र रंगमा ध्यान दिनुपर्छ’ उनी भन्छन्, ‘त्यसले छरितो र सुहाउँदो देखिन्छ ।’ उनका अनुसार गर्मीको पहिरन आफूलाई कुल, स्टाइलिस र फेसनेबल देखिने हुनुपर्छ । यसका लागि पहिरनको संयोजनमा पनि उचित ध्यान दिनुपर्छ ।

फिटिङ्स र बाक्लो पहिरन गर्मीका लागि उपयुक्त हुँदैन । गर्मीमा हिँडडुल गर्दा, काम गर्दा खुकुलो पहिरन सहज लाग्छ । यस्तो पहिरन लगाउँदा पसिनाको समस्या पनि नहुने डिजाइनर तेन्जिङ बताउँछन् । ‘गर्मीमा पसिनाका कारण दुर्गन्ध आउने समस्या हुन्छ’ उनी सुनाउँछन्, ‘त्यसैले सकेसम्म पसिना नआउने वा पसिना सोस्ने खालका लुगा लगाउनुपर्छ ।’ यसका लागि खुकुलो, हल्का पहिरन उपयुक्त हुन्छ । फेब्रिकको सन्दर्भमा कटन सही हुन्छ, जसले पसिना सोस्छ ।

कतिपयले भने पसिनाको दुर्गन्धबाट बच्न परफ्युम वा बडी स्प्रे प्रयोग गर्छन्, जुन गलत हो । एकातिर पसिनाको दुर्गन्ध, अर्कोतिर परफ्युम । ‘एकातिर गर्मीको राप’ डिजाइनर तेन्जिङ भन्छन्, ‘अर्कोतिर दुवैको मिश्रित गन्ध । कति असहनीय हुन्छ ?’

यसैगरी गर्मीमा धेरैले छोटा पहिरन लगाउँछन् । यसलाई पनि उपयुक्त मान्दैनन् डिजाइनरहरू । उनीहरूका अनुसार गर्मीमा पहिरन पूरा शरीर ढाक्ने हुनुपर्छ, जसले घामको सोझो किरणबाट छालाको रक्षा गर्छ । ‘गर्मीमा घामको सोझो प्रभावबाट बच्न स्लिभलेस वा छोटा पहिरनभन्दा पूरै शरीर ढाक्ने पातला र हल्का पहिरन हुनुपर्छ’ धाख्वा भन्छन्, ‘घामले छाला कालो र सुख्खा बनाउनेमात्र नभएर छालाको क्यान्सर हुने जोखिम पनि बढाउँछ ।’

रंग : उज्यालो र रंगीचंगी

गर्मीमा घामको किरण परावर्तन गरेर शरीरलाई शीतल राख्ने भएकाले उज्यालो रंग प्रयोग गर्नुपर्ने डिजाइनरको सुझाव छ । ‘सेतो, रातो, पहेंलो, हरियो, नीलो जस्तोसुकै रंग भए पनि उज्यालो हुनुपर्छ’ उनीहरू भन्छन्, ‘यसले कुल लुक्स दिन्छ ।’

धर्ती नै रंगीचंगी भइरहेको मौसममा सोहीसँग आफूले लगाउने पहिरनको रंगलाई पनि समायोजन गर्न सकिने डिजाइनरहरू बताउँछन् । ‘प्रकृति नै रंगीचंगी हुने मौसममा त्यस्तै किसिमको पहिरन अपनाउँदा सुहाउँछ’ तेन्जिङ भन्छन्, ‘गर्मीका लागि कलरफुल एवं फ्लोरल प्रिन्टेट पहिरनले फेसनेबल देखाउँछ ।’

कपडा : कटन, लेनिन

गर्मीबाट बच्न पहिरन स्वास्थ्यमैत्री हुनु जरुरी भएको डिजाइनर राजेशको भनाइ छ । उनी गर्मीमा प्राकृतिक धागोबाट बनेको पहिरन लगाउनुपर्नेमा जोड दिन्छन् । कटन, लेनिनबाट बनेको पहिरन लगाउन उनी सुझाउँछन् । ‘लेनिन एक प्रकारको वनस्पति हो’ उनी भन्छन्, ‘यसको रेसाबाट बनाइएको धागोलाई लुम वा पावर लुमबाट बुनेर कपडा तयार गरिन्छ । लेनिनबाट बनेको पहिरनले अल्ट्रा भ्वाइलेट सूर्यको विकिरणबाट बचाउनुका साथै शरीरलाई शीतलता दिन्छ ।’ यसको विशेषता भनेको धूलोमिश्रित हावालाई रोकेर स्वच्छ हावा हाम्रो छालासम्म पुर्‍याउनु पनि हो ।

गर्मीमा जतिसक्दो प्राकृतिक फेब्रिक नै रोज्नुपर्ने डिजाइनर तेन्जिङको पनि जोड छ । उनी भन्छन्, ‘गर्मीमा सिल्क, स्याटिन, पोलिस्टर, नाइलन र भेल्भेटबाट बनेका पहिरन उपयुक्त हुँदैनन् ।’

वानपिसदेखि कुर्ता–प्लाजोसम्म

गर्मीमा अक्सर युवतीका लागि जम्प सुट, वानपिस, कुर्ती, टप्स, हाफ पाइन्ट, स्कर्ट र पुरुषका लागि हाफ पाइन्ट, टिसर्ट, लेनिन तथा कटन पाइन्ट, कुर्ता–पाइजामा आदि सुहाउँदा हुन्छन् ।

कुर्ता र प्लाजो वा पेन्टको कम्बिनेसनले ट्रेडिसनल लुक दिन्छ । जुनसुकै अवसरमा पनि लगाउन योग्य कुर्ताले स्टाइलिस एवं कुल देखिन सकिन्छ । कुर्ता पुरानो पहिरन हो । यसको फेसन कहिल्यै सकिँदैन । यो समयसँगै विभिन्न डिजाइनमा उपलब्ध हुन्छ ।

तेन्जिङले यो वर्ष दुई वर्षअघिकै फ्लोरल प्रिन्ट चल्ने अनुमान गर्छन् । ‘फ्युजन लुकका लागि कटन गाउन लगाउन सकिन्छ, यसले पूरै शरीर ढाक्नुका साथै ट्रेन्डी लुक पनि दिन्छ’ उनी भन्छन्, ‘स्ट्रेप्स गाउनको पनि फेसन चल्नेछ । उचाइ कम भएका युवतीहरूले यस्ता गाउन लगाउन सक्छन् ।’

उनका अनुसार फुल जम्पसुट दुई वर्षअघि फेसनमा थियो । अघिल्लो वर्ष हाफ जम्पसुट फेसनमा रह्यो । यो वर्षपनि हाफ जम्प सुट चल्नेछ । यसले कुल, सहज र स्टाइलिस लुक दिने उनको भनाइ छ । फेसन डिजाइनर धाख्वा गर्मीमा वानपिस एन्कल लेन्थ, स्कर्ट, टप्स, अफ सोल्जर टप्स, स्पागेटी टप्स, रफल्स टप्स आदि लगाउने सल्लाह दिन्छन् । उनी भन्छन्, ‘गर्मीमा हाप पाइन्टसँग टिसर्ट, जम्पसुट, जिन्ससँग टप्स, कुर्ती वा टिसर्ट लगाउन सकिन्छ ।’

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्


?>