जमेको जोडी

लक्ष्मी भण्डारी

मंसिर ५, २०७७ जिम्पाटस्थित होटल सांग्रिलाको साम्बाला गार्डेनमा नारीका लागि ब्राइडल पोज दिदै थिए, नायिका पूजा शर्मा र नायक आकाश श्रेष्ठ । ‘सम्हालिन्छ कहिले मन’ र ‘सम्झना बिर्सना’ गरी दुई ठूला चलचित्र रिलिजको तयारीमा रहेका यी दुई कोरोना भाइरस महामारीले सबैभन्दा बढी असर चलचित्र क्षेत्रलाई नै पारेको बताउँछन् ।

५ वर्षदेखि चलचित्र क्षेत्रमा सक्रिय दाङका आकाशले अहिलेसम्म ८ वटा ठूलोपर्दाका चलचित्रमा अभिनय गरिसकेका छन् । त्यसबाहेक यिनको टेक्सटायल व्यवसाय छ । बाल्यावस्थामा शिक्षिका, नभए एअरहोस्टेज बन्ने चाहना राखेकी कुसुन्ती ललितपुरकी पूजा आरजे, भिजे हुँदै ७ वर्षअघि ‘मधुमास’ मा लिड रोल गर्दै चलचित्रमा प्रवेश गरेकी हुन् । यो अवधिमा उनले ११ वटा फिचर फिल्ममा अभिनय गरिसकेकी छिन् ।

‘नारी सहनशीलताका प्रतीक हुन्’, पूजा भन्छिन्, ‘नारीहरू हरेक परिस्थितिमा आफू सम्हालिन र अरूलाई सम्हाल्न सक्षम छन् ।’ यसबाहेक धैर्यशील हुनु नारीको अर्को गुण भएको उनी बताउँछिन् । सय दिन पार गरेको ‘ब्लकबस्टर’ चलचित्र ‘पोइ पर्‍यो काले’ मा पूजाले गरेको अभिनयलाई दर्शकले निक्कै मन पराए । तर, पूजालाई भने आफ्नै कथामा बनेको चलचित्र ‘प्रेम गीत’ मा निर्वाह गरेको भूमिकाबाट बढी सन्तुष्टि मिलेको छ ।  

आकाश भन्छन्, ‘नारीको भावना र भूमिका मानव जीवनका लागि अपरम्पार छ । तसर्थ म नारीलाई भगवान्का रूपमा लिन्छु ।’

‘ब्राइडल थिम’ फोटोसुटका लागि दुलहा–दुलही पहिरनमा सजिएका यो जोडीले विवाहले मानिसलाई थप जिम्मेवार बनाउने धारणा व्यक्त गर्दै भने–

‘ विवाहपछि हरेक कुरामा समान हिस्सेदार भइन्छ ।’

पूजाले विवाह भनेको कसैमाथि आफूले हक जमाउन लाइसेन्स पाउनु भएको बताइन् । ‘तर यसका लागि दुई आत्माको मिलन अनिवार्य छ’ उनले भनिन् । पाइलट बन्ने सपनासँगै काठमाडौं छिरेका आकाश विवाहलाई आपसी समझदारी र हरेक कुरामा समान हक–अधिकार प्राप्त गर्ने कानुनी बाटोका रूपमा लिन्छन् । एक–अर्कालाई राम्ररी चिनेर/बुझेर बेस्ट फ्रेन्ड हुन पुगेको बताउने यो जोडी एक–अर्काका कमीकमजोरीलाई दुवै मिलेर सुधार्दै आपसमा भएका सकारात्मक बानी र क्षमतालाई पछ्याउँदै अगाडि बढिरहेको छ । धैर्य, अवसर चिन्ने क्षमता, लगनशीलता तथा परिश्रमले सफलता प्राप्त गर्न सकिने बताउने आकाश पूजालाई धैर्य हुन र अरुलाई छिट्टै विश्वास नगरिहाल्न सुझाउँछन् । पूजा भने गम्भीर विषयलाई पनि हल्का रूपमा लिने आकाशको बानीमा सुधार गरे करियरलाई थप उचाइमा पुर्‍याउन सहयोगी हुने धारणा व्यक्त गर्छिन् ।

तस्बिर : महेश प्रधान

मेकअप तथा हेयर : पूनम श्रेष्ठ, पूनम ब्युटी एकेडेमी, नयाँ बानेश्वर

गहना : रानीशृंगार, विशालबजार, न्यूरोड

पहिरन : ड्रिम्स वेयर, कुपण्डोल

स्थान : सांग्रिला होटल, लाजिम्पाट

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्


?>