लक्ष्मी मगर
साइकिलिस्ट एथलेट
साइकल चलाउन कठिन स्थान नुवाकोटकी लक्ष्मी मगर विश्वकै टप–५ जटिल याक अट्याक साइकिल रेस शीर्षकको अन्तर्राष्ट्रिय स्पर्धामा प्रथम भइन् जुन हाई अल्टिच्युट र अत्यन्तै कठिन रेस मानिन्छ । भर्खरै उनी श्रीलंकाको रम्बल इन द जंगल नामक चार दिने अन्तर्राष्ट्रिय प्रतिस्पर्धामा प्रथम स्थान हासिल गरी नेपाल फर्किएकी छिन् । महिला–पुरुष गरी ४० जना सहभागी भएको उक्त प्रतिस्पर्धामा जंगलभित्रका अप्ठ्यारा बाटा, गोरेटा, खोल्साखोल्सी तथा रक माउन्टेनमा साइकिलिङ गर्नुपरेको थियो । माउन्टेन बाइक ट्ेरकिङ गाइड तथा पौडीकी सहायक प्रशिक्षक लक्ष्मी फाइन आर्टमा स्नातकोत्तरकी विद्यार्थी हुन् । उनी सुन्दर चित्र कोर्छिन् । सन् २०१५ मा भारतमा भएको अन्तर्राष्ट्रिय प्रतिस्पर्धामा तेस्रो भएपछि उनले भूकम्प प्रभावितहरूका लागि च्यारिटी प्रदान गरेकी थिइन् । सन् २०१५ मा लद्धाखमा भएको हाइअल्टिच्युट अन्तर्राष्ट्रिय प्रतिस्पर्धामा पनि उनले प्रथम स्थान हासिल गरिन् ।
स्कुल–कलेज जाँदा रहरै रहरमा साइकल चलाउन थालेकी लक्ष्मी उतिबेला स–साना साइकल रेसमा भाग लिन्थिन् र त्यसमा जब उनले पुरुषहरूलाई उछिन्थिन् अनि उनमा साहस थपिन्थ्यो । हाल यसैलाई पेसा बनाउन प्रयासरत लक्ष्मी सरकारले समग्र युवालाई क्षमताअनुसार कार्य विभाजन गरी जिम्मेवारी सुम्पिएको खण्डमा युवा बेरोजगारी घट्ने तथा युवाहरू बिदेसिनबाट रोकिने तर्क गर्छिन् । लक्ष्मी भन्छिन्–आधुनिक प्रविधिसँग खेलेका, बलियो तालिम लिएका सयौं विदेशीलाई स्पर्धामा जितेकी छु जसले नेपालको नाम उँचो बनाएको छ । सरकारले तालिम आदि प्रदान गरेर क्षमता अभिवृद्धि गरिदिए अनि सोहीअनुसार काम दिए मजस्ता हजारौं युवा जन्मिन्थे जुन राष्ट्रका लागि गौरव साबित हुनसक्छ ।
जीवनयापनमा जटिलता आउन थालेपछि हिमालयन एक्सन ट्ेरक्स एण्ड टुर्स सुरु गरेकी लक्ष्मी यो महँगो खेल भएकाले यसमा पूर्व तयारीका साथ प्रवेश गर्नुपर्ने बताउँछिन् । उनका अनुसार यसका लागि चाहिने उपकरण तथा तिनको मर्मत–सम्भार खर्चिलो छ ।
नेपाल चिनाएको क्षण
जब म महिला–पुरुष गरी ४० जना सहभागी रहेको प्रतिस्पर्धामा थिएँ त्यतिबेला फ्रान्स, अस्ट्ेरलिया, जर्मन, श्रीलंका आदि थुप्रै विकसित मुलुकका उच्च तालिम प्राप्त स्पर्धी पनि सँगै थिए । मनभित्र चिसो पसिसकेको थियो । म न त टेक्निकल्ली दक्ष थिएँ न आधिकारिक तालिम नै लिएकी थिएँ । त्यति बेला जंगलभित्रका अप्ठ्यारा बाटा, गोरेटा, खोल्साखोल्सी र रक माउन्टेनमा साइकिलिङ गर्नुपर्ने थियो । त्यतिबेला मलाई अन्य कुराभन्दा पनि नेपालको सम्झना र आफूभित्रको आँटले जितायो । त्यतिबेला मैले नेपालका सम्बन्धमा बोलेकी पनि थिएँ कतिले त नेपाल कहाँ पर्छ भनेर पनि सोधे । अर्को गर्व गर्न लायक क्षण विश्वकै टप–५ मा पर्ने कठिन रेस, याक अट्याक साइकिल रेस जुन हाइअल्टिच्युट र अत्यन्तै जोखिमपूर्ण मानिन्छ त्यसमा प्रथम हुँदा हो ।