अभिनेता शैल अली खानको चलचित्र ‘एजेन्ट विनोद’ ले सोचेअनुरूपको सफलता हात नपारे पनि उक्त चलचित्रमा अभिनेतृ करिना कपूरले आफ्नो कम्मर मर्काइ र लुकबाट सबैको ध्यान आकर्षित गरिन् । करिना उक्त चलचित्रमा मुजरा लुकमा प्रस्तुत भएकी थिइन् । त्यतिबेला करिनाको लुकलाई पूर्णता प्रदान गरेको थियो, उनको निधारमा लट्किएको वन पिस ज्वेलरीले । उक्त गीतमार्फत झुमरले बलिउडमा पुन: चम्कने अवसर प्राप्त गरेको थियो । करिनाकी बेस्ट फ्रेन्ड अमृता अरोडाकी दिदी अर्थात् अभिनेतृ मलाईका अरोडाले पनि झुमरको प्रयोगलाई लोकप्रिय बनाएकी छिन् । साजिद खानद्वारा निर्देशित चलचित्र ‘हाउसफुल–२’ को गीत ‘अनारकली डिस्को चली’ मा मलाईका अरोडाको डान्स एवं लुकलाई पनि खुबै रुचाइएको थियो । उनको सेक्सी लुकलाई अझ उजागर गर्न शिरमा प्रयोग गरिएको ज्वेलरी ‘झुमर’ लाई बिर्सन सकिँदैन । आफ्नो ब्याकलेस चोलीमा जब उनी फर्केर सेक्सी अन्दाजमा सलामको मुद्रामा प्रस्तुत हुन्छिन्, तब कानमा प्रयोग भएको झुम्कासँगै म्याच गरेको झुमरले उनको लुक्सलाई अझ आकर्षक बनाएको छ ।

अभिनेतृ ऐश्वर्या रायले पनि ‘झुमर’ लाई आफ्नो सुन्दरतालाई अझ फराकिलो र लोभलाग्दो अन्दाजमा प्रस्तुत गर्न एकपटक मात्र होइन दुईपटक प्रयोग गरेको पाइन्छ । पहिलो पटक चलचित्र ‘बन्टी और बब्ली’ को आधुनिक शैलीको मुजरा ‘कजरा रे कजरा रे’ मा र दोस्रो पटक चलचित्र ‘उमरावजान’ मा । ऐश्वर्याको त्यो स्टाइल आजसम्म धेरैको मस्तिष्कमा ताजै छ, जसमा उनी आफ्नो ओठलाई अत्यन्त सेक्सी पोज दिँदै विशेष शैलीमा हेर्छिन् । त्यतिबेला उनले शरीरमा प्रयोग गरिएको झुमरले उनको स्टाइललाई जबर्जस्त बनाएको थियो ।

नयाँ उमरावजानको चर्चा गर्दा पुरानो उमरावजानलाई बिर्सन सकिँदैन । मुजफ्फर अलीको कवितामय क्लासिक–चलचित्र उमरावजानमा अभिनेतृ रेखाले झुमरको प्रयोग गरी सबैको मन जितेकी थिइन् । रेखाको उक्त लुकलाई आज पनि धेरैले उत्तिकै रुचाउँछन् । पुराना हिन्दी चलचित्रमा झुमर लगाउनुको अर्थ कोठीको चरित्रलाई सिद्ध गर्नु हुन्थ्यो । त्यसैले पनि चलचित्र पाकिजामा मीनाकुमारीको यादगर छवि सबैका सामु ताजै छ जसमा मीनाले आफ्नो शरीरमा झुमर लगाएकी थिइन् । उनको त्यो ठूलो आकारको झुमरले फिल्मी कोठीको चरित्रलाई पहिचान प्रदान गरेको थियो । त्यसैले पनि जब सञ्जयलीला भन्सालीले माधुरी दीक्षितलाई चलचित्र देवदासमा कोठीको चरित्र चन्द्रमुखीको भूमिका दिए, तब उनको शिरमा झुमर पहिर्‍याउन छुटाएनन् । शरदचन्द्र चट्टोपाध्यायको उपन्यासमा आधारित चलचित्र देवदासमा उक्त झुमरले चलचित्रकै चमक–दमक बढाएको थियो । झुमरलाई रानी मुखर्जीले पनि प्रयोगमा ल्याइन् । चलचित्र ‘मङ्गल पाण्डे द राइजिङ’ मा उनले हीराको भूमिकामा सुनको झुमर प्रयोग गरेकी थिइन् । यद्यपि चलचित्र मङ्गल पाण्डेले कुनै प्रभाव छोड्न सकेन ।

अभिनेतृ कटरिना कैफले पनि आफूद्वारा अभिनीत एक हास्य चलचित्रमा झुमर लगाएकी थिइन् । फरहा खानका श्रीमान् शिरीष कुन्दराको चलचित्र ‘तीस मार खान’ मा कटरिनाले झुमर लगाएर आफ्नो लुकमा परिवर्तन ल्याइन् । उनले आफ्नो उक्त लुकबाट मांगरिका नलगाए पनि झुमरमा सजिन सकिन्छ भन्ने कुरा प्रमाणित गरेकी थिइन् । झुमरको कुरा गर्दा सोनिया जहाँलाई पनि बिर्सन सकिँदैन । मुगलहरूको कथामा आधारित चलचित्र ‘ताजमहल’ का निर्देशक अकबर खानले अभिनेतृ सोनिया जहाँलाई झुमर प्रयोग गर्न दिएका थिए । सोनियाको गरिमामय मुहारमा झुमर त्यसरी नै सेट भएको देखिन्थ्यो मानौं त्यो कुनै मुगल महारानीको निधारमा विशेष रूपले विराजमान छ । अफविट चलचित्रका लागि परिचित अभिनेतृ कोकणा सेन शर्मा एउटा फेसन शोको र्‍याम्पमा झुमर लुकमा प्रस्तुत हुँदा धेरैले उनको प्रशंसा गरेका थिए । मिस इन्डिया रहिसकेकी अभिनेतृ गुल पनागले दुलहीको अभिनय गर्नुपर्दा झुमर नै प्रयोग गरेकी थिइन् । गुलको उक्त लुकलाई धेरैले रुचाएका थिए ।