कला–अभिव्यक्तिको माध्यमबाट गरिने उपचार (Expressive Arts Therapy):

परिचय:
कला–अभिव्यक्तिको माध्यमबाट गरिने उपचार (Expressive Arts Therapy) यो एक प्रकारको मनोचिकित्सा हो । जहाँ मानिसहरूले आफ्ना भावना, विचार र अनुभवहरूलाई शब्दमा मात्र नभई कलाका विभिन्न माध्यमहरू जस्तैः चित्रकला, नृत्य, संगीत, नाटक, लेखन आदिको प्रयोग गरेर व्यक्त गर्छन् । यो विधि (Therapy) ले मनमा दबेका, गुम्सिएका मनोभावनाहरूलाई सहजै बाहिर पोख्न र त्यसको पहिचान तथा समाधान गर्न सहयोग गर्छ ।

- मानसिक पीडा, तनावहरूलाई सिर्जनात्मक कलामार्फत व्यक्त गर्न वा बाहिर ल्याउन सहयोग गर्छ ।
- यो थेरापीले मानिसलाई आफूभित्रका परि वर्तनहरू, आफूप्रतिको धारणा, सोचहरूबारे समयमै सजग बनाउँछ । साथै आफूप्रतिको माया, सद्भाव र आत्मसम्मान कायम राख्न सहयोग गर्छ ।
- सामुहिक सहभागिताबाट सम्बन्धहरू सुधार गर्छ र जसले गर्दा एक्लोपन, उदासीनता, डर–भयजस्ता मानसिक रोग लाग्नबाट बचाउँछ ।
- समस्याहरूको समाधान गर्न, मानसिक स्वास्थ्य उपचार प्रक्रिया अघि बढाउन साथै दैनिकी तनावहरू व्यवस्थापन गर्न निकै सहयोग गर्दछ ।

हरितालिका तीज परम्परा, संस्कृति र अभिव्यक्तिको पक्ष : 

हरितालिका तीज नेपाली हिन्दू महिलाहरूको एक महान् चाड हो । यो भाद्र शुक्ल द्वितीयादेखि पञ्चमीसम्म मनाइने गरिन्छ । यो पर्व दर खाने दिनबाट सुरु हुन्छ । मुख्यत ः व्रत, पूजा र ऋषिपञ्चमीसम्म मनाइन्छ । तीजको मुख्य दिनमा महिलाहरू रातो–हरियो वस्त्रमा सजिएर, नाचगान गर्दै, निराहार व्रत बसेर शिव–पार्वतीको पूजा गर्छन् । यो पर्व पति–पत्नीको दीर्घायु, सुखी दाम्पत्य जीवन र अविवाहितहरूका लागि सुयोग्य वरको कामनाका साथ पूजा गर्ने चलन छ । धार्मिक आस्थाका साथ राखिने व्रतले आत्म–अनुशासन र आत्म–चिन्तनको अवसर प्रदान गर्दछ, जसले महिलाहरूलाई आफ्नो भित्री मनसँग जोड्न र शान्ति महसुस गर्न सहयोग गर्दछ । यो एक प्रकारको ध्यान–मेडिटेसन हो जसले एक सकारात्मक ऊर्जा, मानसिक शान्ति, आत्मसन्तुष्टि र आफूप्रतिको अहोभाव प्रदान गर्दछ ।