छोरीको जीवनमा बुवाको महत्व

  • बाबा पनि गुरू पनि

सुजाता मुखिया

भाद्र १३, २०७६

‘जो आफ्नो दुःख लुकाएर सन्तानको खुसी खोज्छन्, ती पिता हुन् ।’ नेपाली समाजमा एउटा भनाइ छ–‘छोरीहरू जहिले पनि बुवाका प्यारा हुन्छन् ।’ बुवाले छोरीलाई निकै माया–ममता दिएर हुर्काउँछन् । हाम्रो समाजको परम्परागत चलनअनुरूप छोरीहरू हुर्किएपछि पराई घरमा जान्छन्, सधै आफ्नो साथमा हुँदैनन् । त्यसैले पनि बुवाहरू छोरीको भविष्यप्रति बढी चिन्तित हुन्छन् । छोरीलाई सबल र सक्षम बनाइयो भने पराई घरमा दुःख पाउँदैनन् भन्ने सोच सबैजसो बाबुमा हुन्छ । 

त्यति मात्र होइन, कतिपय बुवा यस्ता हुन्छन् जसले छोरीको सुरक्षा, खुसी, उन्नति, प्रगति एवं प्रतिष्ठाका लागि जीवनभर संघर्ष गर्नुपरे पनि हार मान्दैनन् । मेलिना राईले आज गायनमा सर्वाधिक सफलता हासिल गरेकी छिन् । उनको सफलताका पछाडि बुवा जीवेश राईको त्याग र परिश्रमको कथा पनि जोडिन्छ । 

मेलिना राई, गायिका

बुवा : जीवेश राई 

‘मलाई आज यहाँसम्म ल्याउन मेरा बुवाले धेरै दुःख गर्नुभएको छ’ अहिलेकी सर्वाधिक चर्चित र व्यस्त गायिका मेलिना राई भन्छिन् । ‘कम्मरमाथि पटुकी’, ‘कुटुमा कुटु’, ‘शिरैमा शिरबन्दी’, ‘ठमेल बजार’ जस्ता गीतबाट आफूलाई चिनाएकी मेलिना अहिलेकी महँगी अनि सर्वाधिक माग भएकी गायिका हुन् । चलचित्रको पार्श्वगायनमा होस् वा देश–विदेशको स्टेजमा, मेलिनाको खोजी हुन्छ । मेलिनाको नजरमा जीवेश एक प्रतिनिधि बुवा हुन्, जसले आफ्नी छोरीको भविष्यका लागि आफूलाई समर्पित गरे । 

बाबा पनि गुरू पनि

मेरो बाबा, बाबा मात्र नभएर गुरू पनि हुनुहुन्छ । उहाँ पनि संगीतकर्मी हुनुहुन्छ । बाबाले नै मलाई संगीतमा लाग्न हौसला दिनुभयो । बाबाले म र मेरी बहिनीलाई सानै उमेरदेखि संगीतमा लगाउनुभयो । 

बाल्यावस्थामा हामी दार्जीलिङमा बस्थ्यौं । बाबाको पेसा नै स्कुलमा संगीत सिकाउने थियो । घरमा हामीले बाबासँगै संगीत सिक्नुपर्थ्यो । हरेक बिहान रियाज गर्ने रुटिन थियो जसका लागि बिहान चार बजे नै उठ्नुपर्थ्यो । 

केटाकेटीमा झिसमिसे उज्यालो नहुँदै उठ्न गाह्रो हुन्थ्यो । न्यानो ओछ्यान छाड्नै मन लाग्दैनथ्यो तर बाबा एकदमै कडा स्वभावको हुनुहुन्थ्यो । भनेको नमाने गाली गर्नुहुन्थ्यो । त्यसैले बाबाको डरले ओछ्यान छाडिन्थ्यो । उठेर फ्रेस हुनासाथ बाबा हारमोनियम लिएर बस्नुहुन्थ्यो । हामीले त्यसमा सुरताल मिलाउनुपर्थ्यो । बाबा मेरो आवाजको निकै ख्याल राख्नुहुन्थ्यो । आवाज खराब हुने खानेकुरा खान पाइँदैनथ्यो । चिल्ला, अमिला, धेरै चिसा खानेकुरा खान बन्देज थियो । कोक, फेन्टा पनि पिउन दिइँदैनथ्यो । 

म गायिका बनेको हेर्ने इच्छा म आफैमा भन्दा मेरा बाबामा बढी थियो । त्यसैले कठोर मेहनत गरेर उहाँले मलाई संगीत साधनामा लगाउनुभयो । 

बाबाको स्वभाव कडा भए पनि मलाई कहिल्यै कुनै गुनासो रहेन । बाबाले गाली गर्दा वा पिट्दा एकछिन चित्त दुखे पनि मेरै लागि हो भनेर म आफूलाई सम्झाउँथें । मैले गल्ती गरेर नै गाली खाएँ, कुटाइ खाएँ भनेर रियलाइज गर्थें । आज म जुन ठाउँमा छु त्यसका लागि मेरा बाबाले धेरै संघर्ष गर्नुभएको छ । उहाँले मलाई राम्रो शिक्षा दिनुका साथै असल अभिभावकत्व पनि दिनुभएको छ । उहाँको मेहनतकै कारण आज मलाई धेरैले मेलिना राईका रूपमा चिन्नुभएको छ ।

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्