बहिनी कान्ति थापा, प्रशासनिक निर्देशक, के ल्याब 

दाइ ज्योतिबहादुर गुरुङ, प्रहरी निरीक्षक

जाडो अनुभव गराउने रमाइलो मौसममा पर्ने चाड तिहारलाई कान्ति थापा तथा ज्योतिबहादुर गुरुङ मीठो तर छिटो सिद्धिने चाडका रूपमा सम्झन्छन् । काठमाडौंको ठमेलमा जन्मिएकी कान्ति तथा उनका दाइ ज्योतिको बाल्यकाल पनि त्यही सेरोफेरोमा बित्यो । त्यसैले बाल्यकालका धेरै तिहार उनीहरूले ठमेलमै मनाए । दाजुबहिनीले एकै स्वरमा जुन चाडपर्व पनि बाल्यावस्थामै रमाइलो हुने बताए । दुवै नोस्टाल्जियामा पुग्दै भन्छन्–‘सानो छँदा बिनाकुनै भार मनाएको चाडपर्वको रौनक तथा उल्लास बेग्लै हुन्छ ।’ यसो भन्दैमा ठूलो भएपछि चाडपर्वको मज्जा नहुने भन्ने पनि नभएको उनीहरूले प्रस्ट पारे । ठूलो भएपछि रमाइलो गर्ने शैली परिवर्तन र जिम्मेवारीले गर्दा चाडपर्वको रौनक कम हुने कुरा पक्कै हो ।

तस्बिर: महेश प्रधान

सानैदेखि अहिलेसम्म कान्ति र उनका दाइबीच कुनै कुरामा मनमुटाव भएको छैन । उनीहरू खुसीका साथ उन्नतिको मार्गमा अघि बढिरहेका छन् । जताततै झिलिमिली हुने, लक्ष्मीको पूजा गरिने, देउसी भैली आदि कारणले गर्दा कान्तिलाई तिहार विशेष मन पर्छ । त्यो भन्दा पनि ठूलो कुरा दाइलाई टीका लगाउन र आफ्नै हातले विभिन्न परिकार बनाएर ख्वाउन पाइने भएकाले तिहार उनलाई मन परेको हो । १५ दिनअघिदेखि नै उनी तिहारको तयारीमा जुट्छिन् । कान्ति तथा उनका दाइ ज्योति तिहारलाई दिदीभाइ तथा दाजुबहिनीको प्राइभेट चाड भन्न पनि रुचाउँछन् । बहिनी कान्तिको हातबाट तिहारको टीका थाप्न ज्योति उनको घरमा पुग्छन् । तीन–चार वर्षको तिहारमा कान्ति अमेरिकामा भएकीले ज्योतिले निधार खाली राख्नुपरेको थियो । त्यतिबेला बहिनी धेरै मिस भएको उनले बताए । फोनमै कुरा गरेर चित्त बुझाउनुपरेको थियो ।