आसाममा स्थापित भैसकेकी गायिका मिलन नेवारले विवाह भएर काठमाडौं आएपछि आफ्नो सांगीतिक यात्रालाई अघि मात्र बढाइनन्, उनी लोकप्रिय गायिका पनि भैसकेकी छिन् । मिलनको नेपाली भाषाको दोस्रो एल्बम मधुर मिलन भर्खरै बजारमा आएको छ जसमा राजुबाबु श्रेष्ठको शब्द तथा सुनील मास्केको संगीत सुन्न सकिन्छ । भाइब्स क्रियसनले बजारमा ल्याएको यो एल्बमको संगीत संयोजन सचिन सिंहले गरेका हुन् भने यो एल्बममा प्रेम प्रसंगका मधुर गीतहरू समावेश छन् ।

चलचित्र : रंगबैजनी

१२ वर्षपछि नेपाली चलचित्रमा फर्किएका शम्भु प्रधानले चलचित्र रंगबैजनीको निर्देशन युवापुस्ताको माया-प्रेमलाई लक्षित गरेर गरेका छन् । चलचित्रमा गरिमा पन्त, सुमिना घिमिरे तथा दिक्पाल कार्कीको मुख्य भूमिका छ । नूतन प्रधानको कथा तथा निर्माणमा तयार भएको यो चलचित्र त्रिकोणात्मक प्रेम कथामा आधारित छ ।

कला

कलाकार प्रमिला बज्राचार्यको नवौं एकल कला प्रदर्शनी गत महिना पार्क ग्यालेरी, पुल्चोकमा सम्पन्न भयो । यो उक्त प्रदर्शनीमा राखिएका २८ वटा चित्रमध्ये एउटा चित्र हो । कला प्रदर्शनीका क्रममा बंगलादेश पुग्दा उनले त्यहाँ स्थानीय पहिरनमा सजिएर नृत्य गरिरहेका युवतीहरू देखेर नै यो डान्सिङ सिरिज तयार गरेकी हुन् । प्रमिलाले ज्यापू युवतीहरूले लगाउने हाकु पटासी लगाएर डान्स गरिरहेको यो चित्र बनाएकी हुन् । आफ्नो संस्कृति जोगाउनुपर्छ भन्ने मान्यताका साथ महिलाहरू स-साना कुरामा कसरी खुसी हुन्छन् भन्ने कुरा यो चित्रमा देखाइएको छ ।   

पुस्तक : सरुको चिसो घाम

सानैदेखि साहित्यमा रुचि राख्ने सरु पोखरेलले थुप्रै कविता लेखेकी छिन् । कविता लेखनबाट साहित्यिक यात्रा प्रारम्भ गरे पनि पोखरेल कथा लेखनबाट आफ्नो पहिचान बनाउने जमर्को गर्दैछिन् । चिसो घाम शीर्षकको यो कथा संग्रहमा १९ वटा कथा समावेश छन् जसमा वृद्धावस्था, घरेलु हिंसा, महिला, वैदेशिक रोजगारी आदि समस्याहरू प्रस्तुत गरिएको छ । समाजशास्त्रकी अध्यापक सरु विभिन्न एफएममा साहित्यिक कार्यक्रम पनि चलाउँछिन् । यो पुस्तक अध्ययन गर्दा पोखरेल कथामा नयाँपन दिने प्रयासमा छिन् भन्ने कुरा स्पष्ट हुन्छ । शब्दहार क्रियसनले बजारमा ल्याएको यो संग्रहको मूल्य २ सय ५० रुपैंयाँ छ ।