बेडरुम घरको महत्वपूर्ण हिस्सा हो । त्यसैले बेडरुमको सजावट जरुरी हुन्छ । कोठा ठूलो हुनेहरूले आफ्नो इच्छा र आवश्यकतानुसार सजाउन सक्छन् । तर सानो कोठामा सामान मिलाएर राख्न सकिएन भने कोठा भद्रगोल देखिन्छ । त्यसैले सानो कोठालाई व्यवस्थित राख्न सही तरिकाले सजावट गर्नुपर्छ । सानो कोठामा भारी फर्निचर, गाढा रंगको पर्दा बेडसिट, गलैंचाको प्रयोग गर्नुहुँदैन । कोठा जति खुल्ला भयो त्यति नै ठूलो देखिन्छ ।
रंगको सही छनोट
सानो कोठालाई ठूलो देखाउन रंगको महत्वपूर्ण भूमिका रहन्छ । त्यसैले कोठाको रंग छनोट गर्दा सावधानी अपनाउनुपर्छ । धेरैले आफ्नो रुचिअनुसार रंगको छनोट गरेको पाइन्छ । जुन एकदमै गलत हो । सानो कोठालाई ठूलो देखाउन हल्का रंगको छनोट गनुपर्छ । गाढा रंगले ठूलो कोठालाई पनि सानो देखाउँछ । सकेसम्म बेडरुमका भित्ताहरूमा सेतो, क्रिम, हल्का हरियो, बेबी पिंक, हल्का नीलो वा अन्य हल्का रंगको प्रयोग गर्नुपर्छ ।

स्टोरेज भएको वेडको प्रयोग
सानो बेडरुमलाई ठूलो आकारमा देखाउन बेडमा धेरै स्टोरेज भएको हुनुपर्छ । जसले गर्दा बाहिर सामान राख्न पर्दैन सबै बेडमा राख्दा यताउति धेरै सामान देखिँदैन । जसले कोठा ठूलो देखिन्छ । बेडको दायाँ–बायाँ स्टुलहरूको प्रयोग गर्न सकिन्छ । यसमा पनि सामान अटाउन सकिन्छ ।

झुमरले सजाउने कोठा
झुमर प्रायः हल वा ड्रइङ रुममा राम्रो देखिन्छ । तर कोठा सानो छ भने झुमरलाई बेडरुममा पनि झुन्डाउन सकिन्छ । धेरै ठूलो होइन ठिक्कको साइजको झुमरको छनोट गर्नुपर्छ । यसको प्रकाशले सबै कोठा उज्यालो देखाउँछ र कोठा ठूलो पनि देखाउँछ । कोठामा प्रवेश गर्नेबित्तिकै तपाईंको ध्यान भुइँमा सट्टा माथि झुमरतिर केन्द्रित हुन्छ र कोठा ठूलो देखिन्छ ।

धेरै फर्निचर नराख्ने
त्यसो त बेडरुमा धेरै फर्निचर राख्दा राम्रो देखिँदैन । सानो कोठामा धेरै फर्निचर राख्दा झन् कोठा साँघुरो देखिन्छ । साइड टेबलको आवश्यकता छैन भने नराखे पनि हुन्छ । सानो कोठामा एउटा बेडमात्र भएपनि पुग्छ । एकदमै आवश्यक फर्निचर मात्र राख्दा कोठा ठूलो देखिन्छ । बेडको छनोट गर्दा होचो साइजको गनुपर्छ यसले कोठालाई ठूलो देखाउँछ ।

पोर्टेबल फर्निचरको प्रयोग
सानो वा कम स्पेस घर भएकाहरूलाई ठूला फर्निचर अटाउने ठाउँ हुँदैन । यस्तो घरमा फर्निचर व्यवस्थित तरिकाले राख्न चुनौतीपूर्ण हुन्छ । साँघुरो कोठामा बहुउपयोगी फर्निचर छनोट गर्नुपर्छ । यस्ता फर्निचरले धेरै ठाउँ ओगट्दैनन् साथै कोठा फराकिलो र आकर्षक देखिन्छ । योफर्निचरको तौल हल्का हुने भएकाले यताउति सार्न सजिलो हुन्छ ।

वलपेपरको प्रयोग
सानो बेडरुम छ भने कोठाको एकापट्टिको भित्तामा वालपेपरको टाँस्न सकिन्छ । प्याट्रन भएको वालपेपरले कोठालाई ठूलो देखाउन सहयोग गर्छ । क्यानभास प्रिन्ट भएको वालपेरले कोठालाई ठूलो र आकर्षक देखाउ“छ । त्यसका साथै स्काई वालपेपर तारा र जुन भएको सिलिङमा टाँस्न सकिन्छ । कोठामा फरक–फरक पेन्टिङले सजाउनु भन्दा एउटा ठूलो आकारको पेन्टिङ राख्न सकिन्छ । बेडको पछाडिको भागमा पेन्टिङ टाँग्दा कोठा ठूलो र आकर्षक देखिन्छ ।

पर्दाको सही छनोट
सानो कोठालाई ठूलो देखाउन पर्दाको भूमिका अहम् हुन्छ । सानो कोठामा जहिल्यै पनि हल्का पर्दाको प्रयोग गर्नुपर्छ । भारी र बाक्लो फेब्रिकको पर्दाले कोठाको साइज सानो देखाउ“छ । त्योस“गै कोठालाई आकर्षक र ठूलो देखाउन हल्का रंगको पर्दा छनोट गर्नुपर्छ । आवश्यक नभए पर्दा नलगाए पनि हुन्छ । यसले कोठा ठूलो देखिन्छ ।

थप लेखहरू

वातावरणमैत्री घरको निर्माण

जाडोमा कोजी लुक

काठको ढोकाको डिजाइन

सपना सापकोटा, इन्टेरियर डिजाइनर
हल्का रंगको प्रयोगले कोठा ठूलो देखाउँछ
सानो कोठालाई ठूलो देखाउन पर्दा, बेडसिट, भित्ताको रंग सबै हल्का रंगको हुनुपर्छ । कुसनको फेब्रिक भने हाइलाइट गर्ने रंगको हुनुपर्छ । कोठामा प्रयोग हुने मुख्य फेब्रिक हल्का रंगको हुनुपर्छ । गाढा रंगले आँखाको नजिकै छ जस्तो महसुस गराउँछ । त्यसैगरी कोठामा ऐनाको प्रयोग गर्न सकिन्छ । ऐनाको रिफ्लेक्सनले गर्दा कोठा ठूलो देखिन्छ । यसो भन्दैमा धेरै ऐनाको प्रयोग भने गर्नुहुँदैन । सानो कोठामा वुडन सिलिङले हेभी फिल गराउँछ । वुडनको प्रयोग गर्ने हो भने कुनै कुनै ठाउँमा मात्र गर्नुपर्छ । धेरै भारी फर्निचरहरू प्रयोग गर्नुहुँदैन । कोठामा धेरै सामानहरू राख्नुहुँदैन । फर्निचरहरू सानो छरितो खालको राख्नुपर्छ । फोल्डिङ हुने फर्निचर राख्न उपयुक्त हुन्छ । ठूला झुमरहरू भन्दा साना झुमरको प्रयोग गर्नुपर्छ । कोठामा साधारण लाइटहरूको प्रयोग गर्नुपर्छ ।