‘ब्रेभ बेनिशा’

जब बेनिशाले खाने, बस्ने, जीवन जिउने, करियर बनाउने थुप्रै संघर्ष गर्नुपर्‍यो । त्यसपछि उनलाई वास्तविक जीवन अर्कै भएको अनुभव भयो ।

‘अहिलेका तीज गीतमा विकृतिको मिश्रण छ’

प्रस्तुती– उपासना घिमिरे

भदौ महिनाको राशिफल

प्रीति आत्रेय ज्ञवाली, फलितज्योतिषाचार्य

ऐना युनिसेक्स सलुनको वार्षिकोत्सव सम्पन्न

लक्ष्मी भण्डारी

फिचर फिल्म, म्युजिक भिडियोलगायत थुप्रै विज्ञापनमा अभिनय कलाको जादु छरिसकेकी नायिका बेनिशा हमाल पर्दामा मात्रै नभएर वास्तविक जीवनमा पनि बहादुर र आत्मविश्वासी छिन् । उनी बच्चैदेखि पढाइ, लेखाइ, डान्स, वक्तृत्वकला, वादविवाद, हाइजम्प–लङजम्प, क्विज कम्पिटिसनमा अब्बल थिइन् । चितवनबाट प्लस टु सकेपछि महत्वाकांक्षी बेनिशाको मनमा केही गर्छु भन्ने अठोट थियो र उनी हान्निइन् काठमाडौंतर्फ ।
चितवनका भेषबहादुर हमाल र शकुन्तला शाही ठकुरीले छोरीलाई राम्रो वातावरणमा हुर्काए, पढाए, लेखाए । उनका एक भाइ पनि छन् । ‘त्यो समयमा धेरैको घरमा पितृसत्तात्मक प्राक्टिस हावी हुन्छ भनेका बेला हाम्रोमा मातृसत्तात्मक व्यवहार हुन्थ्यो । मेरा जिजुबुवाले मेरा फुपूहरूलाई राम्रो स्कुलमा पढाउनुभयो, छोरीहरूलाई जेठी, माहिली, कान्छी महारानी भन्दै तिमी सम्बोधन गरिन्थ्यो,’ आफू हुर्किएको वातावरण र व्यवहारले पनि आफूलाई यत्तिको बलियो हुन सिकाएको बताउँदै बेनिशा भन्छिन्, ‘मलाई घरमा कहिल्यै तिमी छोरी हौ, त्यस्तै मात्रै हुनुपर्छ भनेर सिकाइएन । त्यसैले म विद्यालयकै प्रथम छात्रा थिएँ । एकपटक स्कुलको अभिभावक दिवसमा मैले ७ वटा विधामा पुरस्कार प्राप्त गरेकी थिएँ । लगातार मेरै मात्र नाम माइकमा उच्चारण भइरहँदा मेरी मामुको अनुहारमा गर्वको भाव झल्किएको थियो । यद्यपि मामुलाई पहिले नै थाहा थियो म त्यसका लागि डिजर्भिङ मान्छे हो भनेर ।’
राजधानी छिरेपछि कहाँ के गर्ने भन्ने निर्णयमा पुग्न नसकेको उनी बताउँछिन् । त्यसपछि उनी वसुन्धरास्थित मामाघरमा बसेर ब्याचलर पढ्न थालिन् । चितवनको कालिका एफ.एम. मा कार्यक्रम प्रस्तोताको काम गरेको १ वर्षे अनुभव उनीसँग थियो । त्यसैले उनी च्यानल नेपालमा भिजेको काम गर्न थालिन् । चलचित्रसम्बन्धी प्रोग्राम होस्टका रूपमा उनले आफूलाई निखार्दै लगिन् । त्यही सिलसिलामा एउटा म्युजिक भिडियोको प्रस्ताव आएपछि उनले त्यसलाई स्वीकार गरिन् । उनी भन्छिन्, ‘त्यसपछि त कामको अफरको कमी भएन । धमाधम काम पाउन थालियो । मिडिया इन्डस्ट्रीमा कामको समयसीमा नहुने, राति ढिला घर आउँदा पनि मेरा मामा–माइजू नखाइकन कुरेर बस्नुहुन्थ्यो । म आज यहाँ हुनुमा मेरा ममी–ड्याडी, परिवारलगायत मेरा मामा–माइजूको पनि ठूलो हात छ,’ मामा–माइजूको त्यो केयरिङ नेचरले आफूलाई निकै इमोसनल बनाएको उनी बताउँछिन् ।
त्यसपछि उनी ड्याडीसँग सल्लाह गरेर अपार्टमेन्टमा एक्लै बस्न थालिन् । उनी टिभी, म्युजिक भिडियोलगायतको सुटिङमा जाँदा थुप्रै महिला दिदीबहिनीसँग भेटघाट र कुराकानी हुन्थ्यो तब उनलाई लाग्यो आफूले त निकै प्रिभिलेज्ड लाइफ बिताएकी रहिछिन् । जब उनले खाने, बस्ने, जीवन जिउने, करियर बनाउने थुप्रै संघर्ष गर्नुपर्‍यो । त्यसपछि उनलाई वास्तविक जीवन अर्कै भएको अनुभव भयो ।
त्यो त्यस्तो समय थियो, नेपाली चलचित्र पनि मान्छेले हेर्छन् र ? नेपाली फिल्म पनि चल्छ र ? चलचित्र क्षेत्रको यस्तो संक्रमणकालीन समयमा उनलाई फिचर फिल्मको अफर आयो । उनले ‘स्वर’ मा उत्कृष्ट अभिनय गरिन्, फिल्म रिलिज भए पनि जताततैबाट उनको कामको प्रशंसा भयो साथसाथै गल्ती औंल्याउने साथीसंगी पनि भए, जसले आफूलाई अझै सुधार्ने मौका मिल्यो । उनले रेडियो, टिभीमा कार्यक्रम चलाइन्, म्युजिक भिडियो तथा विज्ञापनमा अभिनय गरिन्, चलचित्र खेलिन् यतिसम्म पनि बेनिशालाई मैले किन यी काम गरिरहेकी छु, केका लागि गरिरहेकी छु भन्ने लाग्थ्यो । जब उनी मीन भामको कालो पोथीको सुटिङका लागि मुगु पुगिन्, त्यहाँ यसरी काम भयो कि उनले खुब सिकिन् । यो पो रहेछ वास्तविक काम त भन्ने महसुस गरायो ।

‘त्यसपछि मलाई यो क्षेत्रको जिम्मेवारी, यसमार्फत समाज र मुलुकलाई दिन सकिने योगदान, यो क्षेत्रको महत्व बल्ल बुझें । अनि म दत्तचित्त भएर काममा घोत्लिएँ । शतप्रतिशत ध्यान दिएर काम गरें । अब आफूलाई यही क्षेत्रमा समर्पित गर्ने सोंच बनाएँ । अनि फर्किएर म वीरेन्द्र हमाल सर र सुनील पोखरेल सरसँग एक्टिङ क्लास ज्वाइन गरें,’ बेनिशाले थपिन् । कालो पोथी रिलिज भयो सर्वत्र चर्चा बटुल्यो । बेनिशाको अभिनयले वाहावाही पायो, त्यसपछि आजसम्म उनले पछाडि फर्केर हेर्न परेको छैन । जब बेनिशा कामप्रति दृढ र केन्द्रिकृत हुँदै गइन् । यसले आफूलाई धेरै कुरा सिकाएको बताउँछिन् । विनम्र हुन, भुइँका कुरा बुझ्न र महसुस गर्न, मान्छेसँग व्यवहार गर्न अनि काममा अझैं मेहनत गर्न आफूलाई यही क्षेत्रले सिकाएको उनको बुझाइ छ ।
हालसम्म बेनिशाले १३ वटा फिचर फिल्म, ३ वटा सर्टभुमी, डेढ दर्जन विज्ञापन र १ सय ८० भन्दा बढी म्युजिक भिडियोमा आफ्नो कला प्रस्तुत गरिसकेकी छिन् । साउन २३ गते रिलिज भएका सिटामोल र मोहर चलचित्रले चर्चा बटुल्दैछन्, दुवैमा उनको लिड रोल छ । जहाँबाट आएको हो त्यो ग्राउन्डलाई नबिर्सिने र जे काम गर्दैछ त्यसैमा शतप्रतिशत समय, श्रम र मेहनतका साथ दृढ हुने आफ्नो बानीले आफूलाई यो उचाइमा पुर्‍याउन सफल भएकोमा उनलाई विश्वास छ । भन्छिन्, ‘कुनै काम गर्नका लागि कहिल्यै ढिलो हुँदैन । भौतिकताभन्दा पनि सन्तुष्टि र खुसी नै सफलता हो भन्ने मैले बुझेकी छु । सन्तुष्ट हुने भन्दैमा एउटा काम सकियो त्यही अडिएर बस्ने होइन । एउटा काममा सफल भइसकेपछि तुरुन्तै अर्को गोल सेट गरिहाल्नुपर्छ त्यसको परिणाम हासिल गर्न कडा मेहनत, संघर्ष र समय खर्चिनैपर्छ । आफू जे गरिँदैछ त्यसमा केन्द्रित हुनुपर्छ ।’
उनका अनुसार यो स्टारको होइन कलाकारको जमाना हो, त्यसैले यो पुस्ता लक्की छ । आफ्नो काममा जो निपुण र दक्ष छ उसले काम नपाउने कुरै छैन । बिगुल र द ब्लुको काम भर्खरै सिध्याएर बसेकी यी नायिका अहिले २ वटा नयाँ स्क्रिप्ट पढिरहेकी छिन्, जुन उनको नेक्स्ट प्रोजेक्ट हो । सर्ट मुभीका लागि डाइरेक्सन गरिसकेकी बेनिशाले आफैं संस्थापक रहेको मौरी पिक्चर्ससमेत चलाइरहेकी छिन्, जुन उनी एक्लैको हो । मौरी पिक्चर्सले सर्ट मुभी, विज्ञापन प्रडक्सन गर्छ । त्यसो त भर्खरै सुटिङ सकिएको द ब्लुमा उनले एक्ज्युकेटिभ प्रोड्युसरको समेत भूमिका निर्वाह गरेकी छिन् । बेनिशा भन्छिन्, ‘यही क्षेत्रमा अझ धेरै काम गर्न बाँकी छ । आफूसँग भएको सीप, कला र क्षमतामार्फत केही योगदान गरौं भन्ने छ । त्यसो त पहिलाको तुलनामा महिलालाई यो क्षेत्रमा सम्मान र कदर बढेको छ । हुन त ‘टपिक अफ कन्भरसेसन’ जहाँ पनि हुन्छन्, महिलामैत्री फिल्म बन्यो भने ओहो ! महिलाका बारेमा बनेको फिल्म रहेछ भनिन्छ । तर त्यसैगरी पुरुषमैत्री फिल्मको कुनै कुरा हुँदैन । यस्ता कुरै हुनु हुँदैन भन्ने मलाई लाग्छ । हामीले स्ट्यान्ड लिन सक्यौं भने आगामी पुस्तालाई सहज हुन्छ हामीले त्यो सहज बाटो निर्माण गर्ने हिम्मत लिन सक्नुपर्छ ।’

पहिरन: लक्की सुनुवार, स्टाइलक्स बुटिक लाजिम्पाट
मेकअप तथा हेयर: पूनम श्रेष्ठ, पूनम ब्युटी एकेडेमी नयाँबानेश्वर
लोकेसन : होटल याक एण्ड यती, दरबारमार्ग
तस्बिरहरू: महेशमान प्रधान

भाद्र १, २०८२