कोरोना महामारीले विश्व नै आक्रान्त हुँदा हरेक व्यापार व्यवसाय ठप्प भइरहेका बेला २५ वर्षीया नेपाली चेलीले ‘लुक्ला आउटलुक’ नामक नेपाली ब्रान्डको सुरुवात गरेकी छन् । लुक्ला सोलुखुम्बुकी छेची शेर्पाले वर्षअघि सुरु गरेको यो ब्रान्डले छोटो समयमै राम्रो बजार लिन सफल भएको छ । यसको कारण खुलाउंँदै छेची भन्छिन्, ‘हाम्रा पहिरन छिट्टै लोकप्रिय हुनुमा सुलभ मूल्यमा गुणस्तरीय सामान पाउनु नै हो ।’ छेचीलाई जहिले लुगाफाटोमा गुणस्तर र मूल्यबीचको दूरी र त्यसमाथिको नेपाली सोचमा कसरी परिवर्तन ल्याउन सकिन्छ भन्ने लागिरहन्थ्यो । विगतमा रेस्टुराँदेखि अन्य व्यवसायमा समेत समय खर्चिएकी छेची युवामा धैर्य भए एकदिन अवश्य सफल भइन्छ भन्ने उदाहरण आफैं भएको बताउँछिन् । नेपाली कच्चापदार्थ प्रयोग गरी नेपालमै उत्पादित पहिरनलाई विश्वस्तरमा पुर्‍याउने लक्ष्य लिएको ‘लुक्ला आउटडोर’ ले विशेषगरी जाडोमा न्याना पहिरनलगायत ट्रेकिङ र माउन्टेनियरिङका लागि आवश्यक सम्पूर्ण सामान बिक्री वितरण गर्छ । ‘हामीले बालबालिकादेखि वृद्धवृद्धासम्मका लागि विभिन्न भेराइटीका सामग्री उत्पादन गर्छौं’ उनले भनिन्, ‘नेपालमा बनेको भनेपछि गुणस्तरहीन होला भन्ने सोच धेरैमा छ, तर हामीले गुणस्तरमा सम्झौता गरेका छैनौं । गुणस्तरीय सामान सुलभ मूल्यमा दिनु नै हाम्रो विशेषता हो ।’