प्रकृति दाहाल

फाल्गुन १०, २०७७नेपालमा सञ्चालित क्याफेमा पहिलोपटक रोबर्टले सेवा दिन थाल्यो । रोबर्टलाई हेर्न र ऊसँग फोटो खिच्ने क्याफेमा मानिसको भीड हुन थाल्यो । रोबर्टले बोल्ने र टेबलमा अर्डर लिन आइपुग्दा ग्राहकहरू रोमाञ्चित हुन थाले । सामाजिक सञ्जालमा पनि रोबर्टको निकै चर्चा भयो । झन्डै दुई वर्षअघिको कुरा हो यो । पिपुल्स प्लाजामा सञ्चालित केकेएफसीले पहिलो पटक रोबर्ट भित्र्याएको थियो । क्याफेमा रोबर्ट भित्र्याउने व्यक्ति थिए केकेएफसीका सञ्चालक अमर शाह । २२ वर्षीय युवाले जापानमा देखेको प्रविधिलाई नेपालमा भित्र्याएका थिए । अमरले नेपालमा प्रविधियुक्त क्याफे सञ्चालनका लागि रोबर्टलगायतका अन्य उपकरणहरू पनि सञ्चालनमा ल्याए । उनले क्याफेमा नौला उपकरणहरू मात्रै भित्र्याएनन् आफ्नो कर्मभूमि अस्ट्रेलिया छाडेर स्वदेशमै उद्यमीको बाटो रोजे ।

व्यवस्थापनमा प्लस टु सकेर उनी थप पढाइका लागि अस्ट्रेलिया पुगेका थिए । त्यहाँ उनले केएफसीदेखि सुपरमार्केट सम्म काम गरे । अस्ट्रेलियामा उनको मासिक आम्दानी ६ लाखभन्दा बढी थियो । उनले थुप्रै कामको अनुभव बटुले पनि केएफसीको अनुभवले उनलाई उद्यमी बन्ने बाटो खुलाइदियो । रेस्टुराँमा काम गर्दा नयाँ प्रविधिसँग काम गरे । विदेशी रेस्टुराँमा मान्छे कम प्रविधि बढी रहेको उनले देखे । तर, केएफसीको अनुभवले भने उनलाई स्वदेशमै उद्यमको हुटहुटी जगाइदियो । स्वदेशी उत्पादनलाई नै कसरी अन्तर्राष्ट्रिय ब्रान्ड बनाउनेतर्फ उनी अनुसन्धान गर्न थाले । त्यसैक्रममा उनी स्वदेश फर्किए ।

उनी भन्छन्, ‘विदेशका क्याफे देखेर नेपालमा राम्रो क्याफे सञ्चालन गर्ने सोच पलायो, यही सोच पछ्याउँदै केकेएफसीको अवधारणा बनाए ।’ केकेएफसी अर्थात् (क्रिस्पी, क्रन्ची, फ्राई, चिकेन) । स्वदेशी ब्रान्ड, लोकल स्वाद र अन्तर्राष्ट्रिय स्तरको क्याफे यसका विशेषता हुन् । यी तीन कुरालाई आत्मसात् गर्दै उनी उद्यमीको बाटो कोर्न थाले । तर, उनले सोचेजस्तो क्याफे सञ्चालनका लागि सहज भने पक्कै थिएन । प्रविधि ल्याउन एजेन्सीहरूसँग रातभर कुरा गरिरहे । कुरा मिलेपनि प्रविधि ल्याउन भन्सारमा उस्तै समस्या । प्रविधि चलाउने जनशक्तिको अभाव । यतिसम्म भयो कि रोबर्ट चलाउन पनि आफैले सिक्नुपर्‍यो उनलाई । उनी भन्छन्, ‘यति समस्या भयो कि कामै छोडेर विदेश जाऊँझैं भएको थियो ।’ तर उनलाई परिवारको साथले अघि बढ्न हौसला दिइरह्यो । उनको परिवार पनि व्यावसायिक पृष्ठभूमिको हो । उनको परिवार त्यतिबेला आइसगोलाको व्यापारमा संलग्न थियो । आइसगोलाको पारिवारिक व्यवसाय अहिले केकेएफसीमा परिणत भएको छ ।

दुई वर्षअघि तीन करोड लगानी गरी सुरु गरेको केकेएफसीमा अहिले ३० करोड लगानी पुगेको छ । काठमाडौंमा मात्रै ६ वटा आउटलेट सञ्चालनमा छन् । बुटबलमा फ्रेन्चाइज चलिरहेको छ । केकेएफसीले झन्डै दुई सय जनालाई रोजगार दिएको छ । सामान्यतया क्याफेहरूमा अनुभवका आधारमा मात्रै रोजगार दिइन्छ । तर, अमर भने अनुभवका आधारमा मात्रै रोजगार दिने तर्क गलत रहेको बताउँछन् । ‘रोजगार नदिई कसरी अनुभव बटुल्ने ?’ उनी भन्छन्, ‘मेरो क्याफेमा फ्रेस व्यक्तिहरूले पनि रोजगार पाउँछन्, यसका लागि हामी तालिम दिन्छौं ।’ क्याफेले स्टाफहरूलाई न्यूनतम पारिश्रमिकदेखि अन्य सुविधा पनि प्रदान गर्छ । अमर भन्छन्, ‘व्यवसायलाई सफलतातिर डोर्‍याउनु छ भने स्टाफलाई खुसी बनाउनैपर्छ, स्टाफ खुसी भएनन् भने व्यवसायी खुसी हुनै सक्दैनन् ।’

क्याफेका लागि आवश्यक मेसिनहरू सिंगापुर, जापान, अस्ट्रेलिया, चीन आदि देशबाट अमरले आयात गरेका छन् । उनी भन्छन्, ‘पकाउन तेल अड्कल्नेदेखि सबै सामग्रीको तयारी मेसिनले नै गर्छ, यहाँ मानिसलाई मेसिनले चलाउँछ ।’ उपत्यका हुँदै बाहिर फैलँदै गएको केकेएफसी अब अन्तर्राष्ट्रिय ब्रान्ड बन्ने बाटोमा छ । यति छोटो समयमा राम्रो व्यवसाय हुनुको कारण हाइजेनिक फुड पस्कनु र ग्राहकहरूसँग गर्ने व्यवहार रहेको उनी बताउँछन् । ग्राहकहरूलाई सेवा दिन अमर आफै पनि अग्रसर हुन्छन् । यो क्याफेले ग्राहकहरूलाई क्रिस्पी फ्राइड चिकेन, ग्रिल्ड चिकेन, बर्गर आदि परिकार उपलब्ध गराउँछ । ‘क्याफेहरूले आफूलाई स्थापित बनाउन ग्राहकहरूको स्वास्थ्य र उनीहरूलाई गर्ने व्यवहार राम्रो हुनुपर्छ,’ उनी भन्छन्, ‘ग्राहकहरूको सन्तुष्टिले नै हाम्रो व्यवसायको सफलता हो ।’

व्यवसायमा राम्रोसँग स्थापित हुनका लागि यसप्रतिको अनुसन्धान र रुचि महत्वपूर्ण कुरा भएको उनी बताउँछन् । अरुको देखेर मात्र व्यवसाय सञ्चालन गर्न नसकिने उनको भनाइ छ । उनी भन्छन्, ‘अहिले रेस्टुराँको क्षेत्रमा धेरै प्रविधि आइसकेका छन्, अब हामी पनि प्रविधिसँगै अघि बढ्न सक्नुपर्छ ।’