नेपाली चलचित्र उद्योगमा सुपरिचित, सुन्दर एवं अभिनयमा दक्ष नायिका सञ्चिता लुइँटेल केही समय कलाकारिताबाट टाढिइन्। पहिलो विवाह असफल भएपछि नायक निखिल उप्रेतीसँग लगनगाँठो कसेकी सञ्चिता त्यसपछि चलचित्रको संसारबाट केही पछाडि हटिन्। ४ वर्षको उक्त अवधिमा २ सन्तानकी आमा बनेकी सञ्चिता अहिले फेरि उही रूप-रंग एवं जिउडाल लिएर चलचित्रमा देखापर्ने क्रममा छिन्। जीवनमा प्रशस्त उतारचढाव भोगेकी सञ्चितालाई विवाह, सम्बन्ध र सन्तान विधाताले नै निश्चित गर्ने कुरा हो भन्ने लाग्छ। नारीका लागि ६ वर्षपछि पुनरागमन गर्दै कभर फोटो खिचाउँदा उनमा किशोरीको झैं मादक सौन्दर्य झल्कन्थ्यो। अझ त्यसमाथि थपिएको परिपक्वताले उनको सौन्दर्यमा थप निखार आएको देखिन्थ्यो। टिनएजमै चलचित्र क्षेत्रमा पाइला चालेकी सञ्चिताको अनुहारको चमकमा अहिले पनि कुनै कमी देखिँदैन। हाल ३ वर्षको छोरा र २ वर्षकी छोरीसँग खेल्दै रमाइरहेकी सञ्चिता केही चलचित्रबाट प्रस्ताव आए पनि आफू अझ राम्रो प्रोजेक्टको पर्खाइमा रहेको बताउँछिन्। केही समयअघि आमा शीर्षकको म्युजिक भिडियोमा देखा परेकी सञ्चिता अभिनयबाहेक अन्य कुरा आफूले सोच्न पनि नसक्ने बताउँछिन्। आमा भएपछि महिलाहरूको शरीर बिग्रने, भद्दा देखिने र चार्म हराउने कुरा सञ्चिताको हकमा लागू हुँदैन। समयको सदुपयोग गर्न जान्ने सञ्चिता हरेक दिन जिमका लागि गौशालास्थित कलिउड प्लानेट पुग्छिन्। उनको पुनरागमन चलचित्र उद्योगका लागि सकारात्मक साबित हुने आशा गर्न सकिन्छ।

प्रस्तुति : सिर्जना दुवाल श्रेष्ठ

तस्बिर : महेश प्रधान

पहिरन : सुष्मा सिंह, वुमन्स प्लानेट, दरबारमार्ग

गहना : नटराज ज्वेलर्स

लोकेसन : पाटन म्युजियम क्याफे, पाटन दरबार स्क्वायर