सोना अमात्य
सोना अमात्य व्यवसायीका रूपमा परिचित छिन् । मार्केटिङ एजेन्सी सञ्चालन गरिरहेकी उनी गायन क्षेत्रमा पनि सक्रिय छिन् । हालै उनको र्‍याप गीत ‘आइएम सुपर स्टार’ सार्वजनिक भएको छ । यसैको सेरोफेरोमा रहेर उनीसँग गरिएको कुराकानीः
र्‍याप गीत ‘आइएम सुपर स्टार’मा कसरी जोडिनुभयो ?
रियालिटी सो ‘नेपप को श्रीपेच’ मा मैले व्यवसायीका रूपमा अपरेसन डाइरेक्टरको भूमिका निभाएकी थिएँ । त्यसमा बालेन शाह, गिरीश खतिवडा निर्णायक थिए । त्यतिबेलादेखि म र्‍याप गीतमा रमाउन थालें ।मलाई र्‍याप गाउन गिरीश खतिवडा दाइले सहयोग गर्नुभयो । मैलेगीत पहिलेदेखि नै गाउँथें । एउटा गायक भर्सटाइल हुनुपर्छ भन्ने लागेर र्‍याप गाउनुका साथै भिडियोमा मोडलिङ पनि गरें । हरेक मानिस सुपरस्टार हुन्छन्। यसलाई नै थिम बनाएर काम गरेको हो ।

कस्तो प्रतिक्रिया पाउनुभएको छ ?
राम्रा नराम्रा दुवै प्रतिक्रिया पाएकी छु ।अभिनय मन पराएर कमेन्ट आएका छन् ।तर गाली पनि उत्तिकै खाएकी छु । अरुको दुःख एवं संघर्ष नबुझी कमेन्ट गर्नेकोसंख्या बढेको छ । यसप्रति दया लाग्छ ।
‘सुपरस्टार’ अभियान चलाउनुभएको छ । यो कस्तो अभियान हो ?
नाम–दाम कमाएकाहरू मात्र सुपरस्टार हुँदैनन् । हरेक मानिस कसैको सुपरस्टार हुन्छन् । गायन क्षेत्रमा मेरा लागि मदन दाइ सुपरस्टार हो । यही कुरा देखाउन सामाजिक सञ्जालमा आफ्नो सुपरस्टारको फोटो राखेर ह्यासटग गर्ने र अभियान चलाउने उद्देश्य हो ।
कसरी गीत गाउन सुरु गर्नुभयो ?
गीत गाउने रहर र प्यासन सानैदेखिको हो । तर गायक बन्छु भन्ने सोच थिएन । तर गायन प्रतिस्पर्धामा पनि भाग लिइरहन्थें । मदनकृष्ण श्रेष्ठसँग गायनमा मोडिएपछि उहाँको सहकार्यमा मेरो पहिलो गीत पलपलबाट यात्रा सुरु भयो । त्यसपछि दुईवटा एल्बम निकालें । मेरो माया करोडमा, लगाउने हो फन्को आदि गीतहरू आइसकेका छन् ।
व्यवसाय र गायन क्षेत्रलाई कसरी एकसाथ लिएर जानुभएको छ ?
गायनमा मेरो प्यासनले नै मलाई अगाडि बढाइरहेको छ भने म्युजिक र रियाज मेरो जीवनशैलीसँग जोडिएको छ । व्यवसाय मेरो करिअरका रूपमा अगाडि बढिरहेको छ । समय व्यवस्थापन गरी बिहान रियाज गर्छु र दिउँसो आफ्नो व्यवसायमा लाग्छु । म्युजिक एउटा थेरापी हो । यसले अनुशासन सिकाउँछ र व्यवसायलाई पनि सहयोग गर्छ ।