त्रिभुवन विश्वविद्यालय क्याम्पस कीर्तिपुरमा स्वतन्त्र विद्यार्थी युनियनको चुनाव नजिकिइसकेको छ । यही चैत्र ८ हुने भनिएको स्ववियु निर्वाचनमा पहिलो पटक सभापतिमा महिला स्वतन्त्र उम्मेदवारको दावी परेको छ । स्याङ्जामा जन्मिएकी पदमा भुसाल स्वतन्त्र रुपमा सभापतिको उम्मेदवार बनेकी हुन ।
‘विद्यार्थी एकता, समावेशिता, लैङ्गिक समानता, सुरक्षित, सुसंस्कृत विश्वविद्यालय क्याम्पस क्षेत्र, अपाङ्ग मैत्री भौतिक संरचनाहरू, छात्र छात्राहरूको व्यवस्थित र सुरक्षित छात्रावास, निष्पक्ष र समानता को आधारमा छात्रवृत्ति कोषको वितरण, भ्रष्टाचारमुक्त प्रशासन, राजनीतिक हस्तक्षेप मुक्त, बिभेदमुक्त र न्यायोचित नियुक्तिहरू लगायतका धेरै विषयमा बहस गर्न सबल र दरिलो रुपमा विद्यार्थीहरूको प्रतिनिधित्व गरेर उपस्थिति जनाउन एक निर्भिक, साहसी, प्रलोभन मुक्त, जिम्मेवार र अनुभवी नेतृत्व यस विश्वविद्यालय क्याम्पसको स्ववियुमा आवश्यक छ ।’ चुनावी माहँैलमा व्यस्त पद्मा भन्छिन–‘यसकै लागि मैले आउंदै गरेको स्वतन्त्र विद्यार्थी युनियनको निर्वाचनमा सभापति पदमा स्वतन्त्र उम्मेदवारको रूपमा उम्मेदवारी दिएकी हुं ।’
![]()
त्रिभुवन विश्वविद्यालय क्याम्पस कीर्तिपुरमा स्वतन्त्र विद्यार्थी युनियनको कोषाध्यक्ष को रुपमा आफ्नो दुई वर्षे कार्यकाल पूरा गर्दै गरेकी उनी बायोटेक्नोलोजी र ग्रामीण विकासकी विद्यार्थी हुन् । स्नातक तहको पढाइ अमृत क्याम्पसबाट सकेकी पदमा पहिलो कार्यकाल नेपाल विद्यार्थी सङ्घको प्रतिनिधित्व गर्दै कोषाध्यक्षमा निर्वाचित भएकी थिइन । अहिले भने लैङ्गिक विभेदता तथा भ्रष्टाचारमुक्त प्रशासन, अपाङ्गमैत्री भौतिक संरचना, २४ सै घण्टा सुरक्षित र शान्तिपूर्ण विश्वविद्यालय क्षेत्र, व्यवस्थित र सुरक्षित छात्रावास, विभेदमुक्त र नियमसंगत छात्रवृत्ति कोष, राजनीतिक हस्तक्षेप मुक्त र निष्पक्ष कर्मचारी नियुक्ति, विश्वविद्यालयका सेवाहरू पूर्णरूपमा प्रविधिमैत्री लगायतका विद्यार्थीसंग सम्बन्धित विविध नाराहरु लिएर स्वतन्त्र सभापतिको उम्मेदवार बनेकी हुन ।
पदमा भन्छिन, ‘विद्यार्थी माझ घुलमिल रहेको, निरन्तर अध्ययन गरिरहेको विद्यार्थी भएको नाताले तथा स्ववियुमा पदाधिकारीको रुपमा एक सफल कार्यकाल पूरा गरेको हिसाबमा पनि मलाइ एक अब्बल र सशक्त उम्मेदवार को रुपमा हेरिएको छ भन्ने महसुस गरेकी छु । विश्वविद्यालयका प्राध्यापक, प्रजातन्त्र समानता र निष्पक्षतामा विश्वासरत सम्पूर्ण विद्यार्थीहरूले मलाइ सघाउनेमा विश्वस्त छु ।’
उनले जीत–हार जे भए पनि आफू सधै स्वतन्त्र तथा स्वयत्त शिक्षामा जोड दिइरहने र विश्वविद्यालय क्याम्पसको गरिमा र प्रतिष्ठालाई उचाइमा पुर्याउका लागि सदा योगदान रहिरहने प्रतिबद्धता व्यक्त गरिन ।
