जीवनलाई सजिलो बनाउने क्रेडिट कार्डको गलत प्रयोगले समस्या उत्पन्न हुन सक्छ । त्यसैले यो प्लास्टिक मनीलाई सही ढंगले प्रयोग गर्नुपर्छ । यसलाई लिएदेखि नै प्रयोगमा सावधानी अपनाउनुपर्छ । 

क्रेडिट कार्ड लिएपछि त्यसमा आफ्नो हस्ताक्षर दिनुपर्छ । यसो गर्दा अरूले यसलाई गलत हिसाबले प्रयोग गर्न सक्दैनन् । यसो गर्दा कसैले हस्ताक्षर चोर्न पनि सक्दैन । कार्डसँग सम्बन्धित कार्ड नम्बर, अवधि सकिने मिति, पिन नम्बरजस्ता कुराको जानकारी आफ्नो कुनै गोप्य स्थानमा नोट गर्नुपर्छ । 

कार्डलाई दुवैतर्फबाट फोटोकपी गर्नुपर्छ जसले गर्दा कार्ड हरायो भने ब्लक गर्न सजिलो हुन्छ । 

एटियम स्लिप, बदर गरिएको चेक, बैंक स्टेटमेन्ट तथा क्रेडिट कार्डको स्टेटमेन्ट आदि प्रयोग हुँदैनन् भने तिनलाई च्यातेर फाल्नुपर्छ । यसलाई त्यसै राख्नु घातक हुन सक्छ । 

पुरानो ग्याजेट वा फोन फाल्नुभन्दा पहिले त्यसमा प्रयोग भएका डाटा मेट्नुपर्छ । बैंकबाट आएको जानकारी एसएमएस तथा इमेलबाट जोकसैले आफ्नो गोप्य जानकारी प्राप्त गर्न सक्छ । 

क्रेडिट कार्डको पासवर्ड कसैले थाहा नपाउने गरी छनोट गर्नुपर्छ । 

आफ्नो पासवर्ड समय–समयमा परिवर्तन गर्नुपर्छ । हरेक स्थानमा एउटै पासवर्ड प्रयोग गर्नु हुँदैन । कतिपय अवस्थामा ह्याकरहरूले पासवर्ड पत्ता लगाउन सक्छन् । आफूले प्रयोग गर्ने वेभ साइडलाई बुकमार्कमा राखी आफ्नो व्यक्तिगत कम्प्युटरमा राख्नुपर्छ । कुनै पनि साइट बन्द गर्नुभन्दा पहिले त्यसलाई लग आउट गर्नुपर्छ । 

आफ्नो कम्प्युटर साथीसित शेयर गरिन्छ भने ब्राउजर केस तथा हिस्ट्रीको हरेक सेसनपछि त्यसलाई डिलिट गर्नुपर्छ । कार्डबाट किनमेल गर्दा आफ्नो कारोबारका सम्बन्धमा सचेत रहनुपर्छ । पसलमा कार्ड दिँदा पर्याप्त नजर राख्नुपर्छ । कार्डलाई आफ्नो आँखाबाट ओझेल हुन दिनु हुँदैन । 

आफूले गरेको कारोबारको बिल तथा रसिद सुरक्षित राख्नुपर्छ । आफ्नो स्टेटमेन्टलाई उक्त बिलसँग मिलान गर्नुपर्छ । 

स्टेटमेन्ट आफूसँग भएको बिलभन्दा बढी छ वा बिल तथा स्टेटमेन्ट मेल नखाए तुरुन्तै बैंकमा सम्पर्क गर्नुपर्छ । कार्ड चोरी भए तुरुन्तै बैंक तथा वित्तीय संस्थामा सम्पर्क राख्नुपर्छ । सम्पर्क गरिएन भने यसबाट हुने क्षतिको जवाफदेही वित्तीय संस्था हुँदैन । 

आफ्नो कार्ड हराएको सूचना दिइएको कस्टम केयर अधिकारीको नाम तथा नम्बर नोट गर्नुपर्छ । 

आफूले गरेको गुनासोका आधारमा  चाँडै कार्ड इस्यु भएन भने बैंकमा सम्पर्क गर्नुपर्छ । 

आफ्नो गुनासो सुनुवाइ भएन भने राष्ट्र बैंकमा सम्पर्क राख्न सकिन्छ ।