लक्ष्मी भण्डारी
‘कियान आएको छ जिन्दगीमा, खुसी नै खुसी छ ।’
नेपाली फुटबल टिमका कप्तान किरण चेम्जोङ तथा उनकी जीवनसँगिनी उद्यमी कञ्चन निरौलाले कुराकानीको सुरुवातमै प्रफुल्ल मुद्रामा यसरी खुसी व्यक्त गरे । कियान अर्थात् किरण–कञ्चनको एक वर्षे छोराको आगमनपछि यो दम्पतीलाई सांसारिक सुख मिलेको छ, मनमा शान्ति र आनन्द मिलेको छ ।
यी दुईको भेट, प्रेम र विवाह अनि अभिभावक बन्दासम्मको कथा निकै रोचक छ ।
लकडाउनको बेला थियो । यिनीहरूको सामाजिक सञ्जालमार्फत कुराकानी हुन थाल्यो । ७ महिनापछि उनीहरू प्रत्यक्ष रूपमा भेट्ने निष्कर्षमा पुगे । बानेश्वरको थाकखोलामा मुसलधारे पानीमा यी दुईको भेट भयो । उतिबेला कञ्चन श्री एअरलाइन्समा एअरहोस्टेसको काम गर्थिन् । किरणलाई भेट्न आउँदा उनको स्कुटर चिप्लिएर लडेको पनि उनलाई याद छ ।
‘जातका कारण विवाह होला भन्ने त सोचेकै थिएनौं । यत्तिकै कफी भेट मात्रै थियो त्यो, सामान्य कुराकानीपछि छुट्टियौं,’ कञ्चन भन्छिन्, ‘त्यसपछि म किरणसँग बोल्न छाडिसक्या थिएँ । त्यही बेला थ्री नेसनल गेम हुँदैथियो । मेरो साथीले पास दियो । मैले एउटा खेलाडी थियो, म एकपटक सोध्छु है त भनेर किरणलाई म्यासेन्जरमा खोजें र अर्को पास उपलब्ध भयो । अनि हामी रंगशाला गेम हेर्न पुग्यौं ।’
कञ्चन रंगशाला पुग्दा माहौल अर्कै थियो । दसौं हजार मान्छे किरणको नाम लिएर हुटिङ गरिरहेका थिए । उनलाई मनैदेखि लाग्यो यस्तो मान्छेलाई मैले इन्कार गरेंछु । गेम सकिएपछि किरणलाई भेट्न पुग्दा उनी हजारौं मान्छेले घेरिएका थिए । बोलाइदिन भन्दा उनी ३ पटकसम्म आएनन् । बल्लतल्ल कञ्चनले किरणलाई भेटाइन् । फोटो खिच्न खोज्दा नारीलाई सम्मान गर्ने, अलि अलग्गै रहने बानी तथा शालीन र नम्र स्वर कञ्चनलाई मन पर्‍यो । कञ्चन भन्छिन्, ‘घर आउँछुत जताततै भाइरल भइसकेंछु । रुटिने (रुटिन अफ नेपाल बन्द)ले हालिदिएछ क्याप्टेनको गर्लफ्रेन्ड भनेर । अनि लभ पर्‍यो ।’
त्यसपछि यो जोडी गहिरो प्रेममा पर्‍यो । उनीहरू काठमाडौं वरपरका विभिन्न स्थानदेखि लिएर पोखरासम्म डेटिङमा जान थाले । सन् २०२१ मा किरण सोल्टी होटलको क्लोज क्याम्पमा थिए । लकडाउनले जताततै ठप्प थियो ।कञ्चनसँग एअरलाइन्सको आइडी कार्ड भएकाले उनी बेफिक्री स्कुटर हुइँकाउँथिन् । कहिले सेलरोटी, अचार त कहिले चकलेट बोकेर उनी बानियाँटारदेखि सोल्टी धाउँथिन् । ‘एकदिन त सोल्टीको रिसेप्सनमा किरणको वाइफ आउँदैछभनिदिएछ,’ रमाइला क्षण सम्झिएर मुस्कुराउँदै कञ्चनले भनिन्, ‘मैले ल्याइदिएका खानेकुरा प्रेमपूर्वक मीठो मानेर स्विमिङ पुलको छेउमा बस्दै कुटुकुटु खाइरहन्थ्यो । मलाई निकै माया लाग्न थाल्यो । यो क्रम बढ्दै जाँदा विवाहको फिलिङ्स आयो ।’
किरणलाई भने कञ्चनको मायालु स्वभाव र केयरिङ नेचरले तान्यो । यसै पनि मेरो विवाह गर्ने बेला भएको छ । कोही न कोही त चाहिन्छ नै, आफूलाई केयर गर्ने मान्छे किन नरोज्ने ? किरणको मनमा यो कुराले निकै छोयो । ‘मलाई त्यस्तो लागेपनि परिवारका विरुद्ध नजाने अडान थियो । परिवार मान्दैन भने नगरौं भन्ने सल्लाह हुन थाल्यो । कञ्चनले आफ्नी आमालाई भनिन् । उनका बुवा भने मेरो इन्टरभ्यु हेरेर मात्रै कन्भिन्स हुनुभाको रे,’ किरण भन्छन्, ‘मलाई पहिलोपटक फेमिली मिटिङमा घरमै बोलाए । राम्रो व्यवहार भयो । कञ्चन पनि मेरो अनुपस्थितिमा बैंक जानेदेखि घरका अन्य काममा मेरी आमालाई सघाउन आइराख्थिन् । यसले पारिवारिक नातासमेत बलियो हुँदै गयो । सन् २०२२ मा कञ्चनले मेरी आमा र आफ्नी आमालाई लिएर माल्दिभ्स आइन्, जतिबेला म त्यहीँ गेम खेलिरहेको थिएँ ।’
त्यो दिन किरणले कञ्चनलाई वेलड्रेसअप गर्न भनिरहेका थिए । कञ्चनलाई भने केही नै थाहा थिएन तर पनि उनको मन भने कस्तोकस्तो भइरहेको थियो । माल्दिभ्स नेसनल स्टेडियममा खेलिरहेका किरणले सबैलाई चकित पार्ने गरी ग्राउन्डबाटै चिच्याए ‘कञ्चन विल यु म्यारी मी?’ घुँडा टेकेर हातमा हीराको औँठी बोकिरहेका किरणलाई सबैले एकतमासले हेरे । कञ्चन खुसी भएर फुटबल ग्राउन्डमा पुगिन् । ‘म त सरप्राइज होइन सक्ड नै भएँ,’ कञ्चन भन्छिन्, ‘मेरा लागि जीवनकै अविस्मरणीय पल...त्यसपछि माल्दिभ्समा बिताएका हरेकपल मेरा लागि सुन्दर छन् । म उसका लागि लक्की चार्म हो । म गएका हरेक गेम जितेकै हुन्छु । माल्दिभ्समा पनि त्यतिबेला त्यही भयो ।’
जतभातमा विश्वासमा नगर्ने किरण आफ्ना सन्तानले दुःख नपाए पुग्यो भन्ने सोच राख्छन् । यिनीहरूको विवाहमा बाहुनले लिम्बूको खुट्टा ढोग्ने, छुने वा गोडाको पानी खाने भन्ने सवालमा वादविवाद भयो । कञ्चनले उसको खुट्टा नधुने भए मेरो पनि धुन दिन्न भनेर अड्डी कसिन् । अन्ततः हात पुछेर हातैमा ढोग्ने भन्ने निष्कर्ष निस्कियो र सबैले त्यसै गरे । उनीहरूको बाहुन र लिम्बू दुवै संस्कार पूरा गरी विवाह सम्पन्न भयो ।
कञ्चन भन्छिन्, ‘हामीले दुवै संस्कारलाई विधिवत् रूपमै पूरा गरेका थियौं तर पछि बाहुन संस्कारमा गर्नुपर्ने किन लिम्बू संस्कारमा गरियो भनेर थुप्रै कमेन्ट पनि आए । तर हामीले सनातन हिन्दू संस्कारमै सबै सम्पन्न गरेका थियौं ।’ विवाहपछि सानो परिवारमा भएकाले आफूलाई कुनै असहज नभएको कञ्चनको अनुभव छ । किरणका अनुसार कञ्चन आफ्नो प्रेम, सम्मान, इज्जत र घरको खम्बा हो, उनीबिना जीवन असम्भव छ । किरण भन्छन्, ‘कञ्चनबाट पाएको बेस्ट गिफ्ट माया, केयर र समझदारी हो । त्यसैले उनीप्रति मेरो जिम्मेवारी धेरै छ ।’
बुवाको मायाको अभावमा हुर्किएका किरणलाई बाबु बन्ने ठूलो रहर थियो । कियान जन्मिएपछि लाइफको नेक्स्ट एडभेन्चर इन्जोय गरिरहेको उनले बताए । कञ्चनलाई भने आमा बनेको केही दिन गाह्रो भयो । पोस्टपार्टम एन्जाइटीले सताएको उनले बताइन् । बच्चाको सवालमा किरण अत्यन्तै सहयोगी र संवेदनशील छन् । अहिलेदेखि वर्षदिन नपुगेको बच्चालाई महँगा ब्रान्डेड सामग्रीको थाक लगाउने किरणको बानीमाथि कञ्चन कहिलेकाहीँ प्रतिक्रिया जनाइरहेकी हुन्छिन् ।
यो जोडीलाई लाग्छ, आपसी माया, प्रेम, सद्भाव, समझदारी र विश्वास नै दाम्पत्य जीवनलाई बलियो बनाउने सूत्र हुन् । उनीहरू आजसम्मआपसमा झैझगडा नगरेको बताउँछन् । जहाँ गए पनि दुवै जना सँगै जान्छन् । एक–अर्कालाई प्रशस्त समय दिन्छन् । आजको दिनसम्म एक–अर्कालाई कुनै पनि कुरामा रोकतोक नगरेको उनीहरूले बताए ।

गर्भवती हुँदा यी दुईले गोवामा सुन्दर समय बिताए, जुन किरणले कञ्चनको खुसीका लागि गरेका थिए भने उनले म्यारिज एनिभर्सरीमा चिया टाइम क्याफे उपहार दिए । यस्ता कुराले श्रीमान्–श्रीमतीबीचको सम्बन्ध अझ रोमान्टिक र निकट हुने कञ्चनले महसुस गरेकी छिन् । परिवार नै सबथोक हो, यसलाई खुसी राख्न जस्तोसुकै मेहनत गर्नुपर्छ भन्ने किरणको सोच र स्वभाव कञ्चनलाई असाध्यै मन पर्छ भने कञ्चनको परिपक्वता र जिम्मेवारीपूर्ण व्यवहारले किरणलाई बाँधेर राखेको छ । यिनीहरू एकापसमा मिल्ने साथीजस्तै छन्, राम्रा नराम्रा हरेक कुरा सहजै सेयर गर्न सक्छन् । दुवै भन्छन्, ‘एकले अर्कालाई प्रेम, विश्वास र सम्मान गर्दै एक–अर्काको भावना बुझ्न सक्यो भने वैवाहिक जीवन रमाइलो र सफल हुन्छ ।’

किरणको नजरमा कञ्चन
बलियो पक्ष : आत्मविश्वासी र सधैं हँसमुख (जली स्वभाव) ।
कमजोरी : झनक्क रिसाउने ।
मनपर्ने च्यानल र कलाकार : कलर्स तथा शाहिद कपूर ।
मनपरेको चलचित्र : कवीर सिंह ।
लत : कफी ।
मनपर्ने खाना : नेवारी परिकार ।
कस्ती श्रीमती ? : कम्प्लिट प्याकेज ।
के भएको हेर्ने रहर छ ? : खुसी सफल उद्यमी ।

थप लेखहरू

‘रोजगारीको खानी हो आइटी क्षेत्र’

 प्रकृति दाहाल 

फोटो पत्रकार प्रधानलाई मातृशोक

रङमा रमेकी आना

कञ्चनको नजरमा किरण
बलियो पक्ष : फुटबल तथा कडा मेहनती।
कमजोरी : सजिलै ऋण दिइहाल्ने ।
मनपर्ने फुटबलर : क्रिस्टियानो रोनाल्डो ।
मनपर्ने फुटबल टिम : नेपालको राष्ट्रिय टिम ।
ड्यासिङ महिला : मेलिना मानन्धर ।
लत : वर्कआउट र ट्रेनिङ
मनपर्ने एपेटाइट : एभोकाडो तथा फलहरू ।
कस्ता श्रीमान् ? : अत्यन्तै सम्मान गर्ने, खुसीको वास्ता गर्ने र भरोसायोग्य पारिवारिक व्यक्ति ।
के भएको हेर्ने रहर छ ? : आफ्नो क्षेत्रमा अझै सफल र खुसी भएको ।