कागती 

भान्सा सफा राख्न लेमन ट्रिटमेन्ट राम्रो विकल्प हो । यसले भान्सा छिट्टै सफा हुनुका साथै मन्द–मन्द वासना पनि आउँछ । किचन क्याबिनेटका लागि आधा कप तातोपानीमा बराबर मात्रामा कागतीको रस मिसाएर सफाइ गर्ने । 

बेकिङ सोडा 

किचन स्लेबमा जमेको फोहोर सफा गर्न मनतातो पानीमा बेकिङ सोडा मिसाएर स्लेबमा छर्कने र १० मिनेटपछि स्क्रबको सहायताले सफा गर्ने । यसबाट स्लेब चम्कन्छ । 

बोरेक्स 

बोरेक्सले कम समयमै भान्सालाई चम्काउँछ । यसका लागि १ कप बोरेक्समा एक चौथाइ कागतीको रस मिसाएर पेस्ट बनाउने । त्यसपछि उक्त पेस्टले प्लेटफर्म, स्लेब, फर्स आदि सफा गर्ने । 

पत्रपत्रिका 

पुराना पत्रपत्रिका पढिसकेपछि बेच्ने चलन छ । पत्रपत्रिकाले धेरै काम दिन्छन् । पत्रपत्रिकाले भान्साका सिसा तथा सिसाका भाँडा सफा गर्न सकिन्छ । 

आलु 

आलु जुन तरकारीसँग पनि मिल्छ । खानका लागि मात्र होइन सफाइका लागि पनि आलु प्रयोग गर्न सकिन्छ । भान्सामा भएको फोहोर लागेको चीजलाई आलुको सहायताले सजिलै सफा गर्न सकिन्छ । यसका लागि आलुलाई स्लाइस आकारमा काट्ने र फोहोर भएको सामानमा रगड्ने । यसले सजिलै फोहोर सफा गर्छ । आफूले फलामको पुरानो कराही, तरकारी काट्ने चक्कु आदिमा लागेको फोहोर पनि सजिलै हटाउँछ । 

इमली 

इमली (तित्री) सफाइका लागि पनि प्रयोग गर्न सकिन्छ । चाँदी, पित्तल एवं तामाका भाँडा तथा अन्य उपकरणलाई इमलीको गुदीले सफा गर्न सकिन्छ । 

चाइनिज भिनेगर 

हिजोआज खानामा चाइनिज भिनेगर प्रयोग गरिन्छ । यसले खानाको स्वाद बढाउनुका साथै भान्सा पनि चम्किलो बनाउँछ । एक चौथाइ भिनेगर तथा १ कप पानी माइक्रोवेब प्रुफ बाउलमा भरेर ५ मिनेट हाइमाइक्रो गर्ने । भिनेगर तथा पानीको वाफले माइक्रोवेबबाट आएको दुर्गन्ध कम हुन्छ हुन्छ भने दाग–धब्बा पनि नरम हुन्छ । भिनेगर तथा पानीको मिश्रण चिसो भए पनि कपडा तथा स्पन्ज डुबाएर माइक्रोवेबको सरफेस, डोर तथा बाँकी भाग सफा गर्न सकिन्छ । 

टुथपेस्ट 

बिहान–बेलुकी दाँत सफा गर्ने टुथपेस्ट भान्साको सफाइमा पनि काम आउँछ । भान्साको भित्ता सफा गर्न टुथपेस्ट प्रयोग गर्न सकिन्छ । चिसो कपडामा टुथपेस्ट लगाएर भित्ता रगड्ने । यसो गर्दा भान्सको भान्साको पर्खाल (भित्ता) मा लागेको दाग सफा हुन्छ । 

नुन 

नुनले खानाको स्वाद बढाउनुका साथै सफाइको काम पनि गर्छ । घरमा भएको फलामको भाँडा जस्तो तावा, कराही धेरै प्रयोगमा आउँछन् । नुन यस्ता भाँडाका लागि उपयोगी हुन्छ । नुनमा तातोपानी मिसाएर पेस्ट तयार गर्ने । फलामको भाँडामा लागेको दागमा रगड्ने । भान्साको फर्स सफा गर्न पानीमा नुन हालेर पुछ्ने । यसले भान्सा सफा हुनुका साथै घरमा सकारात्मक ऊर्जा आउँछ । 

हाइड्रोजन पेरोक्साइड 

भान्साको प्लेटफर्म तथा टाइल्स सफा गर्न हाइड्रोजन प्याराक्साइड प्रयोग गर्न सकिन्छ । सबैभन्दा पहिले फर्स प्लेटफर्ममा हाइड्रोजन प्याराक्साइडको केही थोपा छर्कने र सफा कपडाले पुछ्ने । यसले कडाभन्दा कडा दाग पनि सजिलै हट्छ । 

टिप्स

• मिक्स्चरको धार तेजिलो बनाउन महिनाको एकपटक नुन हालेर चलाउने ।
• कागती काट्नुअघि केही समयका लागि तातोपानीमा राख्ने । यसो गर्दा कागतीबाट पर्याप्त रस निस्कन्छ । 
•  नुडल्स उमालेपछि चिसो पानी मिसाउने, यसले नुडल्स आपसमा टाँसिदैन । 
•  किचन प्लेटफर्ममा कुनै टाँसिने कुरा पोखिए त्यसमाथि ब्लिच राखेर थोरै समयपछि ब्रसको सहायताले सफा गर्ने । 
•  खुर्सानीको डिब्बामा थोरै हिङ हाले खुर्सानी लामो समयसम्म बिग्रदैन ।
• काटेको स्याउमा कागतीको केही थोपा हाले स्याउ कालो हुँदैन ।
• डिनर गरेपछि राति नै भाँडा सफा गर्नुपर्छ । बिहान गर्छु भनेर नछोड्ने । यसो गर्दा अनेकौं रोगबाट जोगिन सकिन्छ । 
• चिनीको डिब्बामा ६–७ वटा ल्वाङ राख्दा कमिला लाग्न पाउँदैन । 
• लसुन काट्नुअघि हल्का तातो बनाउँदा लसुनको बोक्रा निकाल्न सजिलो हुन्छ ।
• खानामा आलुको पराँठा बनाउने हो भने आलुको मिश्रणमा थोरै कसुरी मेथी मिसाउने, यसले पराँठाको स्वाद बढाउँछ ।     

क्विक टिप्स

• डढेका भाँडा सफा गर्न त्यसमा साबुन पानी तथा बेकिङ सोडा मिसाएर रातभर छोड्ने । बिहान भाँडा धुने । दाग पूर्णरूपमा निस्कन्छ ।
• डस्टबिनको गन्धबाट जोगिन त्यसमा कागतीको बोक्रा राख्ने ।