मञ्जु बञ्जारा, ड्रिम वेयर बुटिक, कुपन्डोल

तीज गर्मी मौसममा पर्ने भएकाले हल्का पहिरन नै रोज्नुपर्छ । पहिले विवाहिता महिलाहरूले तीजका दिन वा दरका कार्यक्रमहरूमा साडी नै लगाउनुपर्छ भन्ने मान्यता थियो तर अहिले साडीका साथमा लङ कुर्ता पनि धेरैको रोजाइमा पर्न थालेको छ । यस्ता लङ कुर्ती लेगिन्स, प्लाजो, चुज पाइन्ट, लेहेंगा स्कर्टदेखि जिन्सहरूमा समेत आकर्षक देखिन्छन् । उमेर तथा इच्छानुसार तीजको मौकामा लङ कुर्ती लगाउन सकिन्छ । लङ कुर्ती टिनएजरदेखि मिडिल एजसम्मका लागि एकदमै राम्रो देखिन्छ । मोटा महिलाहरूलाई स्लिम देखाउन सहयोग गर्ने लङ कुर्ती सजिलो पनि हुन्छ । अनारकल्ली कुर्ता, ब्लाउजजस्तो टाइट फिटिङ नहुने भएकाले गर्मीमा शीतलता महसुस हुन्छ । लङ कुर्ती दरका कार्यक्रमहरूमा जाँदा निकै सहज अनुभव गराउने पहिरन हो । सजिलै नाचगान गर्न सकिने हुँदा यो पहिरन  धेरैको रोजाइमा परेको छ । राता कुर्तीमा ह्यान्ड वर्क गरेर, सेल्फ इम्ब्रोइडरी गरेका नेट, जर्जेटका फेब्रिकहरूमा कुर्तीहरू बनाउन सकिन्छ जसले रिच लुक्स पनि दिन्छ । रातोमा एल्लो, ग्रिन, गोल्डेन, रोयल ब्लु एकदमै सुहाउने रंग हुन् । यी रंगलाई मिक्स गरेर पनि न्यू लुक्सका साथ तीजका पहिरन डिजाइन गर्न सकिन्छ ।

अफिसबाट दर खान जान

अहिले महिनौंअघिदेखि आफन्त वा साथीहरूकहाँ दर कार्यक्रमहरू आयोजित हुने भएकाले कतिपय कामकाजी महिलाहरूले अफिसबाटै दर खान जानुपर्ने हुन्छ । अफिसमा साडी तथा लङ कुर्ती लगाएर जान अप्ठ्यारो हुन्छ । त्यसैले दरका लागि सी कट गरिएका छोटा कुर्ती पाइन्टका साथ लगाएर जान सकिन्छ । अरू रंगका कुर्ती लगाए पनि ब्यागमा रातो सल बोकेर जान सकिन्छ । दर खान जाने बेला रातो सल लगाई आफूमा तीज लुक्स सिर्जना गर्न सकिन्छ ।

व्रत बस्नेलाई साडी नै राम्रो

व्रत बस्ने महिलाहरूले व्रतका दिन साडी नै लगाउनु उपयुक्त हुन्छ । ब्राइडल वा पार्टी वेयरजस्तो हेभी तथा धपक्क भएको साडी भने लगाउनु हुँदैन । तीजमा व्रतालु महिलाहरू दुलहीजस्तै सोर्‍ह शृंगार गरी सजिने हुँदा साडीमा हल्का ह्यान्ड वर्क भएका राता साडी नै आकर्षक देखिन्छन् । रातोमा विभिन्न कलर मिक्स गरी प्याच वर्क वा ह्यान्ड वर्क गरी साडी तयार पार्न सकिन्छ । साडीलाई सितारा, डफकाको काम, बोर्डर वर्क, लेस प्याच गरेर समेत डिजाइन गर्न सकिन्छ । साडी लगाउन वा क्यारी गर्न नसक्नेहरूले मुजा फिक्स भएको साडी लगाउन सक्छन् । आफूसँग भएको फिक्स मुजा साडी झर्ने समस्या हुँदैन । लेहेंगा लगाउने हो भने आफ्नो शरीरको बनावट तथा स्किन कम्प्लेक्सन सुहाउँदो डिजाइन गराएर लगाउँदा अझ आकर्षक देखिन सकिन्छ । अहिले लङ आउटरसँग लेहेंगाको फेसन ट्ेरन्डमा छ ।  व्रतका दिन स्लिभलेस वा हाफ ब्लाउज उपयुक्त हुन्छ । यतिबेला ओपन डिजाइनमा रसिल्क तथा पोलिस्टर नमिसिएको सिल्कको ब्लाउज लगाउनुपर्छ ।

टिनएजका लागि 

तीजमा टिनएजरहरूका लागि आउटर लेहेंगा, लङ कुर्ती तथा वान पिसहरू फेसनमा छन् । लेहेंगामा सफ्ट नेट नै बढी रुचाइएको छ । गोल्डेन आउटरमा चोलीको भित्री फेब्रिक रातो राखी लेहेंगा पनि रातै लगाउँदा आकर्षक देखिन्छ । यो उमेरकाहरूका लागि रातो, हरियोका साथमा पिच, रोयल ब्लु, लाइट अरेन्ज, पर्पल, मजेन्दा, गोल्डेन, सिल्भरमा रेड मिक्स गरेर तयार पारिएका आउटर लेहेंगाहरू पनि आकर्षक देखिन्छन् । टिनएजरहरूले फेब्रिकमा सेल्फ डिजाइन तथा वर्क भएको बढी मन पराउँछन् । टिनएजरहरूलाई लङ वेस्ट कोट स्टाइलको आउटर लेहेंगा पनि आकर्षक देखिन्छ, जसमा सल क्यारी गर्नुपर्ने झन्झट हुँदैन । रातोमा इम्ब्रोइडरी गरेर ग्रिन वा गोल्डेन टच दिइएका वान पिसहरू, वर्क नेटमा स्ट्रेट निलेन्थ वान पिसहरू पनि राम्रा देखिन्छन् । लङ कुर्तीलाई चुज पाइन्ट तथा जिन्समा लगाई तीज फेस्टिब लुक्स प्राप्त गर्न सकिन्छ ।