भ्यालेन्टाइन डेको अवसर पारेर त्रिपुरेश्वरस्थित मुड्स लाउन्जमा पाँचजना नव प्रवेशी फेसन डिजाइनरहरूले फेसन डिजाइनिङ क्षेत्रमा आफ्नो व्यावसायिक उपस्थितिको पहिलो पाइला सारेका छन् । उत्कृष्ट खड्का, वंशी खड्का, रिया महर्जन, सावना बेगम र अनिता लोहनीले सो फेसन कार्यक्रम आफ्नो फेसन सिक्रेट्स सार्वजनिक गरेका हुन् । नेपाल इन्स्टिच्युट अफ फेसन (नीफ) को आयोजना तथा आशिष पाण्डेको व्यवस्थापनमा संचालित भएको सो कार्यक्रममा उल्लेखित डिजाइनरले आ–आफ्नो

एकल कलेक्सन तथा सामूहिक कलेक्सन गरी ८ वटा सिक्वेन्स मार्फत् आफ्ना सृजना सार्वजनिक गरे । कालो, खैरो, रातो, पहेंलो, अक्वा ब्लु, पिन्क, ग्रीन आदि विभिन्न शेड्समा खेलिएका पहिरनहरू प्रस्तुत गरिए ।  मुख्य गरी फिटेड, लुज फिटेड, ए लाइन तथा आवर ग्लास सिलहुट्सको प्रधानता रहेका पहिरनहरूले स्थान पाएको उक्त फेसन कार्यक्रममा अर्गानिक कटन, सिफन, लाइक्रा ब्लेन्ड सिफन, नेट, भेल्भेट, रअ सिल्क, प्रिन्टेड जर्जेटजस्ता फ्याब्रिकलाई प्राथमिकता दिइएको थियो ।

नव प्रवेशी डिजाइनरहरूको सीप, क्षमता अभिवृद्धिका साथै फेसन डिजाइनिङ क्षेत्रको व्यावसायिक पाटोलाई विस्तारित गर्न सो कार्यक्रमको आयोजना गरिएको कुरा आयोजक संस्था नीफका प्रबन्ध निर्देशक एवं टेक्सटाइल इन्जिनियर अमित झाले बताएका छन् । राति अबेरसम्म आफ्टर पार्टी झुमेको सो कार्यक्रममा अभिनेत्री वर्षा सिवोकोटी, अभिनेता सिड खरेल, इन्टरनेसनल नेपाली मोडल दिपक घिमिरे र अनिता लिम्बु तथा मोडल एवं सञ्चारकर्मी शुभ आचार्य शो स्टपरका रूपमा र्‍याम्पमा प्रस्तुत भएका थिए । कार्यक्रमलाई कलाकार महादेव त्रिपाठी, गायकहरू निर्णय श्रेष्ठ, रवि रिमाल प्रशान्त मिस्ट लगायतका गायकहरूले मनोरञ्जक बनाएका थिए । 

भ्यालेन्टाइन डेको अवसर भएकाले सो फेसन कार्यक्रमको पहिलो अध्यायमा सहभागी पुरुष तथा महिला मोडलहरू जोडीका रुपमा प्रस्तुत भएका थिए । जसमा उनीहरूको पर्फमेन्स र हावभावमा रोमान्स तथा आत्मीयताको झलक पाइएको थियो । पहिरनहरू पनि युगल जोडीलाई सबै अवसरका लागि सुहाउने खालका थिए । कार्यक्रमको मेड इन नेपाल शीर्षकको सिक्वेन्समा भने नेपाली मौलिक फ्याब्रिकमा तयार पारिएका परिहनहरूको  प्रधानता थियो । अन्तिम सिक्वेन्सलाई रोयल शीर्षक दिइएको थियो । जसमा पहिरनहरू मूलत: राजकीय शैली, सम्पन्नता एवं चरित्र चित्रणअनुरूपका थिए ।

तस्विरहरु: नवराज वाग्ले