न्यूयोर्क सहरमा आयोजित ‘मिस नेपाल नर्थ अमेरिका २०२४’ प्रतियोगितामा १७ जनालाई पछि पार्दै नेपाली मूलकी अन्ना कोइरालाले उपाधि हात पारेकी छन् । प्रतियोगितामा अमेरिका, क्यानडादेखि अन्य देशका युवती सहभागी भएका थिए । अमेरिकामा बस्दै आएकी अन्ना उपाधि जितेपछि नेपाल आइपुगेको समयमा गरिएको कुराकानी ।
ब्युटी प्याजेन्टमा सहभागी हुन कसरी पुग्नुभयो ?
ब्युटी प्याजेन्टमा मलाई रुचि थियो । यसका लागि समय पाएकी थिइन । ब्याचलरमा मलिकुलर बायोलोजी पढाइ सकेकी थिएँ । खाली समयको सदुपयोग गर्नका लागि प्याजेन्टमा सहभागी हुने योजना बनाएर पुगेकी थिएँ ।
उपाधि हासिल गरेपछि कस्तो प्रतिक्रिया पाउनुभएको छ ?
उपाधि जित्छु भनेर त सोचेकी थिइन । एक हप्ताको वर्कसपले उपाधि हासिल गरिएला भन्ने थिएन । मेरा लागि यो नसोचेको भयो । उपाधि जितेपछि फरक अनुभव गरें । नेपालसँग अझ नजिकिएको महसुस गरें । अमेरिकामा हुँदा थुप्र्रै बधाई र शुभकामनाले नेपालमै भएजस्तो भयो । जब नेपाल फर्किएँ, धेरै मिडियादेखि युवाहरूसँग साक्षात्कार गर्ने मौका पाएँ । यो उपाधिले मलाई नेपालको प्रतिनिधित्व गर्ने अवसर दिएको छ । थप जिम्मेवारी महसुस भएको छ ।

नेपाली युवाको मनाविज्ञान कस्तो पाउनुभयो ?
अहिलेको समयमा नेपाली युवा पनि विश्वव्यापी रूपमा फैलँदै गएका छन् । सोसल मिडियाले सबैलाई एउटै ठाउँमा जोडेको छ । नेपालका युवा अवसरको खोजीमा छन् । राम्रो अवसर पाए, रोजगारीको सुनिश्चिता हुन सके आफ्नै देशमा बसौं र गरौं भन्ने भावना उनीहरूमा छ ।
नेपालका युवा विदेशमै भविष्य खोजिरहेका छन् नि ?
अहिलेका युवाको सोचमा धेरै परिवर्तन भइसकेको छ । कतिपय विदेश जाने लहर देखेर गइरहेका छन् । विदेशका हरेक स्थानमा युवाले अग्रसरता लिइरहेका छन् । अर्कोतर्फ राम्रो लाइफस्टाइल विदेशमा सम्भव छ भन्ने सोचाइ युवामा छ । राम्रो भविष्य बनाउने उद्देश्यले उनीहरू विदेशको बाटो रोजिरहेका छन् ।
विदेशमा युवाको अवस्था कस्तो पाउनुहुन्छ ?
विदेश सोचेजस्तो सहज छैन । विदेशमा पैसा कमाउन सहज छ भन्ने धेरै युवाको सोचाइ हुँदो रहेछ । तर अवस्था त्यस्तो छैन । दुःख धेरै गर्नुपर्छ । महत्वपूर्ण कुरा नेपालबाट गएका धेरै युवा एक्लोपनको सिकार भइरहेका छन् । नेपालको जस्तो पारिवारिक, सामाजिक वातावरण विदेशमा हुँदैन । पछिल्लो समय निश्चित समय बसेर स्वदेश फर्कने युवाको संख्या पनि बढेको छ ।
नेपालमा तपाईं कस्ता काम गरिरहनुभएको छ ?
नेपाल मेरो जन्मभूमि हो । हरेक वर्ष यहाँ आइरहन्छु । नेपालको पब्लिक हेल्थमा मैले फोकस गरेकी छु । सामान्य उपचारबाट नेपाली वञ्चित नहून् भन्ने मेरो उद्देश्य हो । जसका कारण सरकारी अस्पतालमा विभिन्न फन्डमार्फत स्वास्थ्य उपकरण भित्राउन पहल गरेकी छु । भविष्यमा पनि स्वास्थ्य क्षेत्रमै काम गर्ने योजना छ ।
अरु थप योजना ?
मेरो उद्देश्य डाक्टर बन्नु हो । अब आफ्नो पढाइलाई निरन्तरता दिँदै सामाजिक काममा पनि सक्रिय हुनेछु । ब्युटी प्याजेन्टको उपाधिले नेपालमा मलाई चिनाउन सहज भएको छ । भविष्यमा नेपालमै रमाउने मन छ ।