थापागाउँस्थित मण्डला थिएटरमा नाटक ’मासिन्या’ को विशेष मञ्चन गरिएको थियो ।
बुधबार साहित्य, कला, संगीत,राजनीति र सञ्चार क्षेत्रका व्यक्तित्वहरुको उपस्थितिमा नाटकको विशेष मञ्चन गरिएको थियो । नाटकमा विशेषतः तामाङ समुदायले भोग्दै आएको उत्पीडनको कथालाई प्रस्तुत गरिएको छ । साथै समुदायको जीवनपद्धति, संस्कृति, लय तथा परिवेश नाटकमा देख्न सकिन्छ ।
तामाङ समुदायमाथि गरेको विभेद र अत्याचारको जीवन्त प्रस्तुत नाटकमा रहेको विशेष मञ्चनमा सहभागी लोकतान्त्रिक समाजवादी पार्टीका वरिष्ठ नेता राजेन्द्र महतोले बताए । ’यो नाटक मात्र होइन पीडा हो । यसलाई युवा पीढीले बुझ्नुपर्यो’, उनले भने, ’यस्तो पीडाको विरुद्धमा संघर्ष गर्नुभन्दा अरु उपाय नै छैन । यो देशभरी देखाउनुपर्छ र आफ्नो अधिकार पहिचानको लागि संघर्ष गर्नुपर्छ ।’ उनले तामाङ समुदायमाथि मासिन्या भनेर राज्यले गरेको विभेद प्रायोजित व्यवहार रहेको समेत धारणा राखे । उनका अनुसार आफ्नो समुदाय र नागरिकलाई नाटक जस्तो माध्यम नै जनचेतना बढाउने उपाय हो ।
नाटकले सडकमा उभिएर आन्दोलन र भाषण गरेभन्दा पनि शक्तिशाली सन्देश दिएको तर्क गर्दै आदिवासी अभियन्ता आङकाजी शेर्पाले सम्पूर्ण तामाङ समुदाय र विश्वभर आदिवासी माझ यसलाई पु¥याउन आव्हान गरे । उनले भने,’यो हाम्रो उत्पीडनको कथा हो । यही कुरा राज्यले बुझेको भए आज सडकमा आन्दोलन गर्नुपर्ने अवस्था आउने थिएन । नाटकका यी दृश्य प्रचण्ड र आङकाजीले बोलेको भाषणभन्दा शक्तिशाली छ । यसलाई प्रत्येक तामाङ बस्तीमा लानुपर्छ ।’
ताम्सालिङ संघर्ष समितिका सदस्य सचिव तथा नेपाल तामाङ घेदुङका अध्यक्ष मोहन गोले तामाङले नाटकलाई अभियानकै रूपमा सम्भव भएसम्म सातै वटा प्रदेशमा पु¥याउने सुनाए ।
राजु स्याङ्तान, लक्ष्मी रुम्बा र राबतको लेखन रहेको नाटकको परिकल्पना तथा निर्देशन बुद्धि तामाङ र सोनाम लामाले गरेका छन् । नाटक माघ २८ गतेसम्म मञ्चन हुनेछ । नाटकमा रुपेश तामाङ, रोहनी लामा, सुनिल तामाङ, विष्णु मोक्तान, रमिला मोक्तान, रविन दोङ,विकास लामा,इंगीहोपो कोइच सुनुवार, शीतल थोकर, विजय नेपाल, निर्मल साउद लगायतका कलाकारको अभिनय रहेको छ ।