काठमाडौंको शिवपुरी डाँडागाउँस्थित ‘ग्रिन भ्याली रिसोर्ट’ पछिल्लो समय पर्यटकको आकर्षक गन्तव्य बन्दै गएको छ । शिवपुरी राष्ट्रिय निकुञ्जको काखैमा रहेको यो रिसोर्टबाट गणेश हिमाल नियाल्न सकिन्छ । २२ रोपनी क्षेत्रफलमा फैलिएको रिसोर्टमा २० वटा रुम र चार वटा टेन्ट छन् । बालबालिकाका लागि छुट्टै पार्कको पनि व्यवस्था छ । 

काठमाडौंबाट १६ किलोमिटर दूरीमा रहेको यो रिसोर्टमा एक पटकमा ८० जनासम्म अट्न सक्ने क्षमता छ । यहाँ पिकनिक गर्न सकिने व्यवस्था छ । रिसोर्टको मुख्य विशेषता भनेको अर्गानिक खाना हो । रिसोर्टको वरपर तामाङ संस्कृति नियाल्न सकिन्छ । साथै तामाङ होमस्टेहरूमा पनि बस्न सकिन्छ । 

दुई ठाउँमा यहाँबाट हाइकिङ जान सकिन्छ । यहाँबाट ४५ मिनेटमा विष्णुद्वार र तीन घन्टाको यात्रा गरी बागद्वार पुग्न सकिन्छ । यहाँबाट नुवाकोटको गुर्जे र काठमाडौंको सुन्दरीजल पनि पुग्न सकिन्छ । रिसोर्टमा कटेजभित्र टेन्ट फिट गरिएको छ । रिसोर्टका अपरेसन इन्चार्ज गणेश श्रेष्ठका अनुसार एउटा टेन्टमा चारदेखि छ जनासम्म बस्न मिल्छ । रिसोर्टको प्याकेजअन्तर्गत भने व्यक्ति कसरी बस्न रुचाउँछन् सोहीअनुसार शुल्क निर्धारण गरिएको उनले बताए । ‘रिसोर्ट शान्त र निकुञ्ज नियाल्न सकिने भएकाले यहाँ स्वदेशी तथा विदेशीहरूको आकर्षण बढ्दै गएको हो’ उनले भने, ‘पर्यटकलाई थप सेवा दिने उद्देश्यले रिसोर्टले डिजे हल, सिसाको रेस्टुरेन्ट, स्वीमिङ पुल, ज्याकुजी निर्माण गर्दैछ ।’