गामबेसीका कवि क्षेत्रप्रताप अधिकारीको स्मरणमा स्थापना भएका विभिन्न पुरस्कार हस्तान्तरण गरिएको छ ।
ललितपुरको नेपाल कलेज अफ म्यानेजमेन्टको प्रांगणमा भएको कार्यक्रममा ‘गामबेसीका कवि क्षेत्रप्रताप अधिकारी साहित्य पुरस्कार २०८१’ र ‘गामबेसीका कवि क्षेत्रप्रताप अधिकारी युवा प्रोत्साहन २०८१’ हस्तान्तरण गरिएको थियो ।
‘गामबेसीका कवि क्षेत्रप्रताप अधिकारी युवा प्रोत्साहन २०८१’ राष्ट्रिय महिला फुटबल खेलाडी ‘अनसङ हिरो’का रूपमा परिचित रेनुका नगरकोटीलाई हस्तान्तरण गरिएको छ ।

१८ वर्षदेखि फुटबल खेल्दै आएकी रेनुकाले व्यक्तिगत रूपमा पहिलोपटक खेलाडीका रूपमा पुरस्कृत भएकोमा निकै खुशी लागेको बताइन् । उनले भनिन्, ‘खेलकै कारण एक्लै पुरस्कृत भएको पहिलोपटक हो ।’
त्यसैगरी ‘क्षेत्रप्रताप अधिकारी साहित्य पुरस्कार २०८१’बाट कवि सिजन श्रेष्ठको ‘हावामा अल्झिएको स्वर’ले जितेको थियो । ३५ वर्ष भन्दामुनिका कविका २०८० फागुन १ देखि २०८१ फागुन १ सम्म प्रकाशित कविता संग्रहबाट उत्कृष्ट चार कविता संग्रहमध्ये ‘हावामा अल्झिएको स्वर’ अति उत्कृष्ट ठहर्‍याएको एक निर्णायक अमनप्रताप अधिकारीले बताए । उनले भने, ‘गामबेसी कवि क्षेत्रप्रताप अधिकारीको नाममा पुरस्कार स्थापना तथा हस्तान्तरणले नयाँ पुस्ताका लेखक, कवि तथा खेल जगतमा लागेर राष्ट्रलाई चिनाउादै आएका खेलाडीलाई हौसाउने छ ।’ विजेता कविले नगद ५० हजार रुपैयाँ, ट्रफी र प्रमाणपत्र प्राप्त गरेका छन् ।
कार्यक्रममा कवि विप्लव प्रतीकलाई दोसल्ला ओढाएर सम्मान गरिएको थियो भने उनले केही कविता पनि वाचन गरेका थिए । डान्स र कभर सङ प्रतियोगितासमेत रहेको कार्यक्रममा करिब एक दर्जन कविले कविता वाचन गरेका थिए । गुरुकुल एजुकेशन फाउण्डेसनद्वारा आयोजित कार्यक्रममा प्रमुख अतिथिका रूपमा कवि क्षेत्रप्रताप अधिकारीको फोटोलाई स्थान दिइएको थियो ।