नेपालीहरूको जीवनशैलीमा परिवर्तन आइरहेको छ । नेपालीहरूको रहनसहन, लवाइखवाइ तथा जिउने तरिकामा पनि निकै फरक भएको छ । एक दशकअघि मात्रै पनि नेपाली समाज यस्तो प्राविधिक तथा फेसनमय थिएन । एक दशकमा नेपाली बजार तथा उपभोक्ताहरूमा आकाश–जमिनको फरक आएको छ । यसबीच नेपालमा बहुराष्ट्रिय कम्पनीका आधिकारिक शोरुमहरू खुल्ने क्रम तीव्र भएको छ । दरबारमार्ग, पुतलीसडक, कुमारीपाटी तथा नेपालका अधिकांश मलमा अनेकौं ब्रान्डेड शोरुम खुलेका छन् । सम्भवत: नेपालमा सबै प्रसिद्ध ब्रान्डेड उत्पादनका शोरुम छन् । दरबारमार्गलाई नियाल्ने हो भने त यो ब्रान्डहरूको परेड नै बनेको छ । यहाँ सबै प्रसिद्ध बहुराष्ट्रिय ब्रान्डका आउटलेट छन् । ब्रान्डेड सामग्रीहरूले आफ्नो विश्वसनीयता तथा गुणस्तरीयता विश्वव्यापी रूपमा प्राप्त गरेकाले पनि मानिसहरू ब्रान्डेडतर्फ आकर्षित भएका हुन् । ब्रान्डेड सामग्रीहरू एकपटक खरिद गरेपछि लामो समयसम्म उस्तै रूपमा प्रयोग गर्न सकिन्छ । त्यसको रंग जाने, चाँडै बिग्रने सम्भावना हुँदैन । लामो समयको अनुसन्धानपछि मात्र सामग्री उत्पादन गरिने भएकाले ब्रान्डेड सामग्री गुणस्तरीय हुन्छन् । त्यसैले ब्रान्डेड उत्पादनहरूले नेपाली उपभोक्तालाई बिस्तारै आफूतिर तान्दैछन् । कुनै समय मानिसहरू ब्रान्डेड शोरुममा छिर्न हिच्किचाउँथे । आवरण तथा संरचना पनि आकर्षक भएकाले हम्मेसी जोकोही यस्ता शोरुममा छिर्दैनथे तर अब स्थिति त्यस्तो छैन । अहिले यस्ता ब्रान्डेड शोरुमहरूमा ग्राहकको भीड अरू पसलमा झैं हुन्छ । लगाउने कपडा मात्र होइन घडी, चस्मा, ब्याग, जुत्ता, सौन्दर्य प्रसाधन, अन्तर्वस्त्र तथा अन्य एसेसरिजहरूका ब्रान्डेड शोरुमको कमी छैन नेपालमा । दिलीप पाण्डेले विगत १ दशकदेखि रिबोकका सामान बिक्री गर्दै आएका छन् । रिबोकले स्पोटीबाहेक महिलाहरूलाई लक्षित गरेर विविध रेन्ज बजारमा उतारेको छ । विशेषगरी रिबोकका जुत्ता, टिसर्ट तथा चस्मा नेपाली ग्राहकहरूले बढी रुचाएको पाइन्छ । समय सुहाउँदा विभिन्न किसिमका सामगं्री आयात गर्ने यो शोरुमले आफ्ना शाखा विविध स्थानमा बिस्तार गरेको छ । पाण्डे भन्छन्, रिबोकका सामग्रीहरू लामो समयसम्म टिक्छन् र भनेजस्ता रंगमा उपलब्ध छन् ।’
ब्रान्ड भनेको कुनै सामग्रीको चिनारी भन्ने बुझिन्छ । यसले आफ्नो परिभाषा आफै बोक्छ । कतिपय ब्रान्डको नामै काफी छ । यसलाई कुनै अरू चिनारीको आवश्यकता पर्दैन । आँखा चिम्लिएर ग्राहकहरूले त्यसलाई स्वीकार गर्छन् । ब्रान्डले एक वस्तुबाट अर्को वस्तुलाई छुट्याउने काम गर्छ । बजारीकरणमा ब्रान्डले विशेष अर्थ तथा महत्व राख्छ । लोकप्रिय ब्रान्डका सामग्रीहरूको विक्री तीव्र हुन्छ भने त्यससँग सम्बन्धित अरू सामग्रीको माग पनि उच्च हुन्छ । कुनै पनि ब्रान्डले बजारमा लोकप्रियता पाएपछि अरू सामग्री उत्पादन गर्न निकै विचार पुर्याउनुपर्ने हुन्छ । ब्रान्डमा कमसल सामग्री उत्पादन भए भने त्यसले बजार बिगार्न सक्छ । कुनै पनि उत्पादनको नाम, लोगो, संकेत, स्लोगन, रंग, स्वाद, वासना, आकार, ग्राफिक्स ब्रान्डको पर्याय बन्न सक्छ जसलाई देख्नेबित्तिकै जोकसैले यो ब्रान्ड भनेर चिन्छन् । तैपनि ब्रान्डेड सामग्रीको मुख्य विशेषता के हो भने यिनले उपभोक्ताहरूको विश्वास जितेका हुन्छन् । कुनै ब्रान्डले कुनै उपभोक्ताको विश्वास जित्छ भने उक्त ब्रान्डले उत्पादन गरेका अरू सामग्री उनीहरू आँखा चिम्लिएर स्वीकार गर्छन् । त्यसैले ब्रान्ड बजारीकरणको सशक्त अस्त्र हो ।
बालुवाटारकी सुनयना शाह भन्छिन्–महँगा भए पनि मलाई ब्रान्डेड सामग्री नै मन पर्छन् । व्यापार वृत्तकी शाह आफनो स्ट्याटसका लागि पनि ब्रान्डेड नै लगाउनुपर्ने कुरा बताउँछिन् । सुनयना पहिले विदेश गएका बेला आफूलाई चाहिने सबै सामग्री त्यतै खरिद गरेर ल्याउँथिन् तर अहिले नेपालमा सबैजसो अन्तर्राष्ट्रिय ब्रान्डका शोरुम खुलेकाले आफूलाई चाहिने सामग्रीहरू नेपालमै किन्छिन् । किनमेलका लागि उनी दरबारमार्ग जान्छिन् जहाँ ब्रान्डेड सामग्री ढुक्क भएर खरिद गर्न सकिन्छ । उनका प्रिय ब्रान्ड भर्साजे, फोसिल्स, एडीडास, डी एण्ड जी, ली भिटेन, पुमा तथा बेली हुन् । दसंैको मौकामा यस्ता ब्रान्डेड शोरुमले विभिन्न अफर दिने भएकाले उनी त्यसको फाइदा उठाउने योजनामा छिन् । यद्यपि कहिलेकाहीँ महँगो सामान खरिदपछि सामान कमसल भएको जनगुनासो नभएको चाहिँ होइन । कुनै–कुनै सामग्री मोटो रकम तिरेर खरिद गरे पनि रंग जाने, भुवा आउने, चाँडै बिग्रने, नकारात्मक असर गर्ने आदि समस्या देखिन्छन् । त्यसैले यसमा अनुगमनको खाँचो भएको व्यवसायी बताउँछन् ।
दसंैको रमझम बढ्दै जाँदा यस्ता ब्रान्डेड शोरुमहरूले पनि विभिन्न अफर दिइरहेका छन् । ड्युकले २ को खरिदमा एक सित्तैमा प्रदान गरिरहेको छ । एडीडासले ५० प्रतिशतसम्म छुट दिइरहेको छ । गोसले १ लिपिस्टिकको खरिदमा १ फ्रिमा दिने अफर अगाडि ल्याएको छ । नेपालमा भारतीयदेखि अमेरिकीसम्म सबै देशका आधिकारिक शोरूम खुलेका छन् । यस्ता आउटलेटका लेआउटदेखि रंग संमिश्रणसमेत विदेशकै झझल्को दिने खालका हुन्छन् ।
नेपालमा उस्तै ब्रान्ड नेमका नक्कली सामानको पनि बिगबिगी छ । उस्तै लेभल तर सस्ता सामग्री खरिद गर्दा ग्राहकहरू आफै सजग हुनुपर्छ अन्यथा ठूलो रकम खर्चिए पनि कमसल सामग्री हात लाग्नसक्छ ।
ब्रान्डेड सामग्री खरिद गर्दा
आधिकारिक शोरुम पहिचान गरी सामान खरिद गर्ने निर्णय गर्नुपर्छ ।
लेभल तथा त्यसमा देखाइएको रंगअनुसारकै सामान खरिद गर्नुपर्छ ।
मूल्यको तुलना गर्नुपर्छ ।
ग्यारेन्टीका विषयमा जानकारी लिनुपर्छ ।
सामान प्रयोग गर्ने तरिकाका सम्बन्धमा सोधपुछ गर्नुपर्छ ।
सामान कमसल देखिए तुरुन्तै शोरुममा सम्पर्क गर्नुपर्छ ।
ट्रेडमार्क तथा ब्रान्डका विषयमा जानकारी लिनुपर्छ ।
आममहिलालाई लक्षित गरी महिलाको विषयवस्तु सम्बन्धित म्यागेजिनको संख्या न्यून रहेको अवस्थामा नारी मासिकको परिकल्पना गरिएको हो । कान्तिपुर पब्लिकेसन्सको सह–प्रकाशन नारी मासिकले महिलाका विविध आयामलार्ई समेट्दै आएको छ ।महिलाका विषयवस्तुमा प्रकाशित म्यागेजिनको संख्या न्यून रहेको अवस्थामा यसले महिलाका विभिन्न विषयलार्ई समेट्दै आफूलार्ई अग्रस्थानमा राख्न सफल भएको छ ।
© Copyright narimag.com.np |
