प्रतिष्ठा ‘तृष’ राउत

सेकेण्ड रनरअप, मिस इंग्ल्याण्ड—२०१९ 

नेपाली छोरी प्रतिष्ठा ‘तृष’ राउतले गत वर्ष बेलायतको नेपाली समाजलाई गर्व गर्ने अवसर जुराइदिइन् । २० हजार आवेदकमध्येबाट उनी बेलायतको प्रतिष्ठित सौन्दर्य प्रतियोगिता ‘मिस इंग्ल्याण्ड—२०१९’ का लागि छानिइन् । अन्तिम प्रतिस्पर्धाका लागि टप ४० मा छनोट भएकी उनले प्रतिस्पर्धात्मक प्रतियोगितामा फाइनलमा प्रवेश गर्दै सेकेण्ड रनरअपसहित ‘पब्लिसिटी क्वीन’को उपाधि समेत जितिन् ।

भूपु गोर्खा प्रकाश राउत र मीना राउतकी एक्ली छोरी प्रतिष्ठा हङकङमा जन्मिएकी हुन् । उनी ५ वर्षको हुँदा उनको परिवार बेलायत बसाइ“ सरेपछि उनी त्यहीँ हुर्किइन् । संखुवासभा पुर्खौली घर भएकी २६ वर्षीया प्रतिष्ठा ५ फिट ७ इन्च अग्ली छन् । १६ वर्षदेखि मोडलिङमा लागेकी उनले युनिभर्सिटी अफ ब्राइटनबाट इन्टेरियर आर्किटेक्चरकी स्नातक हुन् । बेलायतको अल्डरसट निवासी उनी पेसाले पार्लोर प्लान आर्किटेक्टका रुपमा कार्यरत छन् । 

९ वर्षको उमेरमा आमा र दाजुसँगै नेपाल आएर विराटनगरमा बसेको र नेपाली सिकेको उनी बताउँछिन् । यसपटक दुई साताका लागि नेपाल आउँदा नारीसँगको भेटमा उनले आफूमा नेपाली भाषाको भोक रहेको मात्रै बताइनन्, केही समयमै नेपाली टेलिभिजनका प्रस्तोताहरुझै स्पष्ट नेपाली बोल्ने बताइन् । मःम, पानीपुरी र चटपटे उनलाई खुबै मन पर्छ । उनलाई नेपालका विविध सांस्कृतिक पहिरन र खानपिनले लोभ्याउँछ । भन्छिन्, ‘नेपाली वेडिङ त मलाई सबैभन्दा मन पर्छ ।’ 

प्रतिष्ठा राउतसंग गरिएको कुराकानीको भिडियो