चिनियाँ नयाँ वर्ष २०२६ को अवसरमा आयोजित नेपाल–चीन मैत्रीपूर्ण फुटबल खेल कार्यक्रममा महिला, बालबालिका तथा ज्येष्ठ नागरिक मन्त्री श्रद्दा श्रेष्ठले पूर्वाधार, पर्यटन र जनस्तरीय सहकार्यमा चीन नेपालको महत्त्वपूर्ण साझेदार रहेको बताएकी छन् ।

नेपालस्थित चिनियाँ दूतावासका कार्यवाहक राजदूत ९चार्जे द’अफेयर्स० झोउ पान को उपस्थितिमा कार्यक्रमलाई सम्बोधन गर्दै मन्त्री श्रेष्ठले खेलकुद र संस्कृतिले भाषा, भूगोल र राजनीतिक सीमाभन्दा माथि उठेर जनस्तरमा मित्रता र विश्वास निर्माण गर्ने प्रभावकारी माध्यमको रूपमा काम गर्ने उल्लेख गरिन्। उनले नेपाल–चीन सम्बन्ध शान्तिपूर्ण सहअस्तित्वका पाँच सिद्धान्तमा आधारित रहेको र विकास, पूर्वाधार, शिक्षा, संस्कृति तथा पर्यटनमार्फत सम्बन्ध थप मजबुत हुँदै गएको बताइन्।

मन्त्री श्रेष्ठले २०१५ को भूकम्पपछिको मानवीय सहायता तथा पुनर्निर्माणमा चीनले दिएको सहयोगप्रति आभार व्यक्त गर्दै चिनियाँ पर्यटकले नेपालको पर्यटन र आर्थिक विकासमा योगदान पुर्‍याइरहेको उल्लेख गरिन् ।

मैत्रीपूर्ण खेलमा नेपाल यू–२० महिला राष्ट्रिय टोलीले चीनको युनान प्रान्तको युथ महिला टोलीलाई ३–१ गोलले पराजित गर्‍यो। खेलअघि ड्रागन नृत्य र पञ्चेबाजासहित नेपाल–चीनका सांस्कृतिक प्रस्तुतिहरू पनि देखाइएको थियो।