‘दे से द्याट इन ट्युनिसिया, सम पिपुल रिसिभ हेभी हेनडेड ट्रिटमेन्ट ।’ यही स्लोगनसँगै अर्धनग्न युवतीले मसाज लिइरहेको तस्बिर राखेर ट्युनिसियाले लन्डनमा गुड्ने बसमा अनौठो विज्ञापन गर्‍यो । बाह्य पर्यटक आकर्षित गर्ने उद्देश्यले गरिएको उक्त विज्ञापनले धेरैको ध्यान त खिच्यो नै, ‘उत्तेजक भएको’ भन्दै धेरैले त्यसको विरोध पनि गरे । आखिर जे भए पनि ट्युनिसियाको यो प्रचार रणनीति अन्तत: फलदायी साबित भयो । आन्तरिक द्वन्द्वका कारण सुस्ताएको पर्यटन व्यवसायलाई उकास्न त्यसले राम्रै टेवा पुर्‍यायो । 

विज्ञापनको सन्दर्भमा पर्यटन बोर्डले पर्यटकहरूलाई खुला हृदयले आमन्त्रण गर्दै भन्यो–‘ट्युनिसियामा तानाशाही छैन, अब त्यो समाप्त भैसकेको छ । त्यसैले पर्यटकले नयाँ ट्युनिसिया अवलोकन गर्न पाउनेछन् ।’ २०१० को डिसेम्बरमा प्रारम्भ भएको लामो जनविद्रोहका कारण त्यहाँको पर्यटन व्यवसाय धराशायी भएको थियो । 

ट्युनिसियाको अर्थव्यवस्थामा पर्यटनको विशेष महत्व छ । त्यहाँ पर्यटनबाटै लाखौं मानिसले आफ्नो जीविका चलाइरहेका छन् । भनिन्छ–पर्यटन उद्योगले ट्युनिसियाको अर्थव्यवस्थामा अढाइ अर्ब डलरको योगदान गर्छ । 

किन जाने ट्युनिसिया ?

समुद्री तटमा बसेर ‘सूर्य स्नान’ को आनन्द लिन चाहनेहरूका निम्ति ट्युनिसिया राम्रो गन्तव्य हो । उत्तरी अफ्रिकी महाद्वीपको यो अरब मुलुकमा १२ सय किलोमिटर लामो समुद्री तट छ, जसले पर्यटकहरूलाई आमन्त्रण गरिरहेको हुन्छ । यो मुलुक भूमध्यसागरको किनारमा छ । 

ट्युनिसियाको सबैभन्दा लोकप्रिय पर्यटनस्थल हो भूमध्यसागर तटको सहर–मोनस्तिर । त्यहाँ वर्षभरि नै पर्यटकको ताँती लाग्ने गरेको छ । धेरैजसो पर्यटक न्यानो घाम ताप्न र आराम गर्न मोनस्तिर पुग्छन् जहाँ होटलमै पनि ठूला–ठूला स्वीमिङ पुलमा डुबुल्की मार्न सकिन्छ । कतिपय सी वाटर स्पोर्टस्मा रमाउँछन् भने कतिपय आकाशमै प्यारासुटको आनन्द लिन्छन् । 

त्यसो त ट्युनिसियामा त्यस्ता थुप्रै स्थान छन् जसले पर्यटकहरूलाई सजिलै लोभ्याउँछन् । आधुनिक संरचना मात्र होइन, प्राचीन सहरको पनि अवलोकन गर्न पाइन्छ यहाँ । रोमन युगको सबैभन्दा संरक्षित रंगशाला र साउदी अरबपछि संसारकै सबैभन्दा पुरानो मस्जिद ट्युनिसियाका आकर्षक हुन् । रोमन युगको रंगशाला अल जेममा आफैमा अद्भूत छ भने प्राचीन मस्जिद हेर्न क्यारुआन सहर पुग्नुपर्छ । 

दुई हजार वर्ष पुरानो रोमन युग र आठौं शताब्दीको अरब युगको अवशेष प्रत्यक्ष अवलोकन गर्न पाउनु ट्युनिसिया भ्रमणको अर्को रोमाञ्चक पक्ष हो । सी डाइभिङ, राइडिङ, सर्फिङ, हाइकिङ आदिका लागि पनि यो मुलुक उपयुक्त गन्तव्य हो । 

ट्युनिसिया सांस्कृतिक विविधाताले सम्पन्न छ । त्यहाँ तीन हजार वर्ष पुरानो इतिहास छ जसलाई ध्वनि, प्रकाश र अभिनयको एक कार्यक्रममार्फत प्रस्तुत गरिन्छ । पर्यटकका लागि मोनस्तिरका आसपासमा छुट्टै गाउँ बनाइएको छ । त्यहाँ झुपडीमा तन्दुरमा स्वादिष्ट रोटी पकाइरहेका महिलाहरूसँग साक्षात्कार गर्न सकिन्छ । एउटा ठूलो मैदानमा रोमन रंगशाला र ओपन एयर रंगमञ्चको मिल्दोजुल्दो रूप हेर्न पनि रमाइलो हुन्छ । 

ट्युनिसियामा अनौठो खालको जालिदार इँटा पनि प्रख्यात छ । यस किसिमको इँटा अन्य कुनै पनि मुलुकमा बनाइँदैन । खासगरी गर्मी मौसममा हावा आवतजावत गर्ने भएकाले यहाँ घर निर्माणका निम्ति यस्ता इँटा प्रयोग गरिन्छ । 

ट्युनिसियाका बासिन्दा मिलनसार र विनम्र हुन्छन् । सहयोगका लागि उनीहरू हार्दिकताका साथ उपस्थित हुन्छन् । यद्यपि उनीहरू अंग्रेजी भाषा त्यति बुझ्दैनन् । त्यहाँ अरबी एवं फ्रेन्च भाषा बोलिन्छ । 

ट्युनिसिया अरब मुलुक हो । यहाँ सन् १८८१ मा फ्रान्सले अधिकार जमाएको थियो र आठ–नौ दशकसम्म त्यसलाई उपनिवेश बनाएर राखेको थियो । त्यसैले यहाँको राष्ट्रभाषा अरबी भए पनि दोस्रो भाषाका रूपमा फ्रेन्च भाषा प्रचलित छ । 

उपयुक्त मौसम 

ट्युनिसिया भ्रमणका लागि वैशाख महिना उपयुक्त हुन्छ । यो महिनामा न धेरै गर्मी हुन्छ, न चिसो नै । पानी पनि धेरै पर्दैन । स्वास्थ्यवद्र्धक जलवायु यो मुलुकको अर्को आकर्षण हो ।