सानै उमेरमा धेरैतिर सक्रिय नेहा बुढा मोडल हन्ट सिजन ९ की विजेता हुन् । ३१ जना प्रतिस्पर्धीलाई पछि पार्दै उनी विजेता बनिन् । ६ महिनापछि कम्बोडियामा आयोजना हुने मिस्टर एन्ड मिस इन्टरनेसनलमा नेहाले नेपालको तर्फबाट प्रतिनिधित्व गर्नेछिन् ।
एस इन्टरनेट बिजनेस स्कुलमा ब्याचलर पढिरहेकी उनी ३ वर्षदेखि आस ग्रुप नाम गैरसरकारी संस्थामा स्वयंसेवकका रूपमा कार्यरत छिन् भने बास्केटबल खेलाडी पनि हुन् । त्यसबाहेक उनी इभेन्ट अर्गनाइजरको काम पनि गर्छिन् । ‘प्लस टुपछि सबै साथीहरू विदेश गए, म यहाँ एक्लै भएँ । नेपालमै बसेर केही गर्न पाए हुन्थ्यो भन्ने सोच थियो । के गरौं भन्ने सोच्दासोच्दै मोडल हन्टमा आइपुगें र विजेता पनि भएँ,’ उनी भन्छिन्, ‘केही सिक्न, बुझ्न र जान्न विदेश गए पनि नेपालमै केही गर्नुपर्छ । अन्तिम गन्तव्य त नेपालै हो ।’
सुदूरपश्चिमका चाँदनी पुन अखिल बुढाका ३ सन्तानमध्येकी नेहाका दुई दाजु छन् । उनी पाटन हस्पिटलमा जन्मिएकी हुन् । पहिला उनका दिदी पर्नेहरू मोडलिङ गर्थे, त्यसका अलावा उनलाई युट्युब भिडियोमा मोडलले निकै आत्मविश्वासी भएर दिएको प्रस्तुतिले पनि लोभ्यायो । आमाको साथ, सहयोग र प्रेरणाले आफू मोडल हन्ट बन्न सफल भएको उनी बताउँछिन् । अनलाइन पुस्तक पढ्न औधी रुचाउने उनी जित्नका लागि भन्दा पनि सिक्नका लागि मोडल हन्ट स्पर्धामा भाग लिएको बताउँछिन् ।

हाइहिल कि फ्ल्याट : हाइहिल ।
ब्रान्डेड कि नर्मल : नर्मल ।
टीभी कि सोसल मिडिया : सोसल मिडिया ।
म.म. कि सुप : म.म. ।
प्याजेन्ट कि र्‍याम्पवाक : र्‍याम्पवाक ।
परम्परागत पहिरन कि मोडर्न : परम्परागत ।
विज्ञापन कि म्युजिक भिडियो : विज्ञापन ।
पहिरन : मुक्ता श्रेष्ठ, मुकु बुटिक कुपण्डोल ।
हेयर एन्ड मेकअप : पूनम श्रेष्ठ, पुन ब्युटी एकेडेमी नयाँबानेश्वर ।
लोकेसन : बगैंचा रिट्रिट बत्तीसपुतली ।
तस्बिर : महेशमान प्रधान ।