कोरोना महामारीले सबै ठाउँका मानवजातिलाई प्रभावित पारेको छ । अहिले सबैभन्दा बढी समस्या वा जोखिम ज्येष्ठ नागरिक, गर्भवती, सुत्केरी, पाँच वर्षभन्दा तलका बालबालिकालाई असर पारेको छ । यी उमेर समूहकालाई बढी मात्रामा पोषिलो खानेकुराको आवश्यकता पर्छ । यिनीहरूको रोगप्रतिरोधात्मक क्षमतामा कमी भएको हुनाले अझै बढी पोषिलो खानेकुरा चाहिन्छ । सुपोषित व्यक्तिमा रोगसँग लड्ने क्षमता बढी हुन्छ भने कुपोषितमा कम हुन्छ । अझै कुनै रोग लागेको छ भने उसको मृत्युको जोखिम उच्च हुन सक्ने विभिन्न अनुसन्धानले देखाएको छ । अहिले विपन्न, दलित, बिरामी, बालबालिका, ज्येष्ठ नागरिक, गर्भवती, सुत्केरी, किशोरीहरू बढी जोखिममा छन् ।   कुपोषणकोरोना महामारीले कुपोषण बढेको छ । यस्तो बेला घर बाहिर गएर काम गर्न नपाइएकाले धेरैलाई छाक टार्न पनि धौ–धौ परेको छ । यसले गर्दा शारीरिक दुर्बलता, कमजोरीका कारण कुपोषणका सिकार बनेका छन् । कम पोषण (अन्डर न्युट्रिसन) लामो समयसम्म हुनु र आफ्नो उमेर अनुसार तौल कम भएमा न्यून पोषक तत्त्वको कमी भएको हो । बालबालिकामा उमेर अनुसार कम तौल, ख्याउटे, उचाइ अनुसार तौल कम हुनु, पुड्को हुनु पोषिलो खानेकुराको कमीले गर्दा हो । यसमा उच्च क्यालोरी, प्रोटिन जस्ता पोषक तत्त्वको कमीले विभिन्न रोग पनि लाग्ने गर्छ । पोषिलो खानेकुरामा अन्न, दाल, दूध, दलहन, दही, मोही, अन्डा, भटमास, केराउ पर्छन् ।बढी पोषक तत्त्व (मोटोपना)अहिले घरमा बस्दा निष्क्रिय जीवनशैली, शारीरिक व्यायाममा कमीका कारण धेरैको तौल बढेको छ । घरमा रहँदा लामो समय बसी–बसी मोबाइल र ल्यापटप चलाउनु एवं टेलिभिजनको प्रयोगले पनि मोटोपनाको जोखिम उच्च छ । उचाइ अनुसार बढी तौल भएमा ‘बडी मास इन्डेक्स’ बाट मापन गरिन्छ । यसमा तौल किलोग्राममा र उचाइ मिटरमा रूपान्तरित गरी मापन गर्न सकिन्छ । मोटोपना पनि कुपोषण नै हो । विभिन्न नसर्ने रोग जस्तै मधुमेह, उच्च रक्तचाप, मुटुरोग, मिर्गाैला, थाइरोइड, क्यान्सरको समस्या हुन सक्छ ।सूक्ष्म पोषक तत्त्वको कमीहाम्रो खानामा खनिज र फलाम तत्त्व एवं भिटामिन थोरै चाहिने भए तापनि यसको कमी धेरैमा देखिएको छ । किशोरीहरूमा रक्तअल्पता, आयोडिनको कमीले गलगाँठ भएको पाइन्छ । साथै, शारीरिक, मानसिक, बौद्धिक विकासमा कमी आउने गर्छ । जिङ्क र फोलिक एसिडको कमीले गर्दा गर्भपतन हुने, भिटामिन ‘डी’ ले अस्टियोपोरोसिस, हाड खिइने, भाँचिने, अपाङ्गता हुने, रतन्धो हुने सम्भावना हुन्छ । यसका स्रोतहरूमा दूध, दही, मोही, दाल, क्वाँटी, गेडागुडी, मस्यौरा, हरियो सागपात, तरकारी, फलफूल, तील, आलस, ओखर, बदाम, सोयाबिन, तोफु आदिको प्रयोग गर्नुपर्छ ।उपयोगी सुझावनियमित शारीरिक व्यायाम, स्वस्थ खानेकुरा खाने, सकारात्मक विचार राख्ने, मोबाइलबाट अलि टाढा बस्ने, परिवारमा रमाइलो गर्ने, अर्गानिक तरकारी, फलफूल आदिको प्रयोग गर्ने र सही समयमा सुत्ने–उठ्ने गर्नुपर्छ ।