गन्तव्य

इलामका नयाँ गन्तव्य

कोरोनाको कारण र लकडाउनले प्रभावित नहुने कुनै क्षेत्र छैन । अझ पर्यटन क्षेत्रमा सबैभन्दा बढी असर परेको छ । सामान्य अवस्था हुँदो हो त इलाममा आगन्तुकको घुइँचो लाग्थ्यो । तर, यसपालि भने मुख्य सिजनमा समेत इलामका पर्यटकीय स्थलहरू ठप्प र सुनसान रहे । कोरोनाको डरले धेरैजसो यात्रामा निस्किएनन् । यद्यपि कोरोना संकट लम्बिँदै जाँदा स्थानीयवासीहरू आफ्नै घर नजिकका रमणीय स्थानको खोजीमा निस्किए, जहाँ सबै त्रास भुलेर रमाउन सकियोस् । अन्ततः यस्ता थुप्रै स्थान फेला परे, जुन प्राकृतिक रूपले आकर्षक र लोभलाग्दा छन् । झरनादेखि सूर्योदय अवलोकन गर्ने टाकुरासम्मका आधा दर्जनजति नयाँ गन्तव्य इलाममा फेला परेका छन् । त्यहाँ अहिले आन्तरिक पर्यटकको बाक्लै चहलपहल छ ।कोठीडाँडाइलामको उत्तरी भेगतर्फ लाग्दा एकपछि अर्को पर्यटकीय गन्तव्य फेला पर्छन्–माइपोखरी, टोड्के झरना, सन्दकपुर, छिन्टापु । यी गन्तव्यहरूको प्रवेश बिन्दुमा छ, कोठीडाँडा । जसबीरे भञ्ज्याङको शिरमा अवस्थित यो डाँडा इलामको नयाँ पर्यटकीय गन्तव्य हो, जहाँबाट इलामका अधिकांश भाग अवलोकन गर्न सकिन्छ ।स्थानीय सूर्यबहादुर सुब्बाका अनुसार यो स्थान आफैंमा ऐतिहासिक पनि हो । करिब डेढ सय वर्षअघि सदरमुकाम रहेको सुब्बाको भनाइ छ । जंगबहादुर राणाका छोरीज्वाईं गजराजसिंह थापा बडाहाकिम भई सोही स्थानमा आएर बसेका थिए । यो स्थानमा अहिले पुराना संरचनाको भग्नावशेष मात्र बाँकी छ । तर, वनभोज खान वा घुमफिर गर्न आउनेहरूका लागि यो रोज्जा गन्तव्य बनेको छ । कोठीडाँडा पुग्न इलाम सदरमुकामबाट ३० मिनेटको दूरी पार गर्नुपर्छ ।गुगल पोइन्टरोङ गाउँपालिका–३ स्थित नापी विभागको भू–मापन केन्द्र रहेको डाँडाबाट सूर्योदयको दृश्यावलोकन गर्न सकिन्छ । ‘गुगल पोइन्ट’ नामकरण गरिएको उक्त डाँडाबाट अन्तुडाँडा, भारतका अधिकांश भू–भाग, तराईका फाँटहरू अवलोकन गर्न सकिन्छ । यसका साथै विश्वकै अग्लो हिमाल सगरमाथा, कञ्चनजंघा र कुम्भकर्ण हिमशृंखला नजिकबाट देख्न सकिन्छ ।समुद्री सतहबाट १८ सय २५ मिटरको उचाइमा रहेको उक्त क्षेत्रलाई पर्यटकीय स्थलका रूपमा विकास गरी स्थानीयको आयआर्जनको स्रोत बढाउने प्रयास भइरहेको छ । यस क्षेत्रका वडाध्यक्ष मातृका बरालका अनुसार यो डाँडा पहिचान हुन नसकेर ओझेलमा परेको हो । उनी भन्छन्, ‘आगामी आर्थिक वर्षका लागि यस ठाउँको विकासका लागि योजना बनाइरहेका छौं ।’ यहाँ पर्यटकको आकर्षण बढाउन सूर्योदय हेर्नका लागि टावर, हावा घर (प्रतीक्षालय), बाटोको सुविधा, ट्रेकिङ रुट बनाउने र त्यसका साथै यस क्षेत्र वरपर वृक्षारोपण गर्ने, लालीगुराँस, चाँप र अन्य बोट–बिरुवा लगाउने योजना रहेको बरालले बताए ।कन्याम र पाथीभराको बीचमा पर्ने यो पोइन्ट पुग्न धेरै समय लाग्दैन । मेची राजमार्गको हर्कटे बजारबाट करिब डेढ किलोमिटरको पैदल बाटो हिँडेपछि गुगल पोइन्ट पुग्न सकिन्छ । त्यस्तै कुटीडाँडा, हासँपोखरीबाट ३० मिनेट उकालो चढेपछि यहाँ पुग्न सकिन्छ ।स्वागत झरनालकडाउन सुरु भएदेखि स्वागत झरनामा गर्मी छल्न जानेहरूको संख्या बढ्यो । यहाँ पुग्नेहरूले तस्बिरहरू सामाजिक सञ्जालमा राख्न थालेपछि झरना नयाँ गन्तव्य बन्यो । इलामको रोङ गाउँपालिका–४ स्थित यो झरना मेची राजमार्गको झापा र इलाम सीमामा रहेको जोरकलशबाट ५ मिनेटको दूरी पार गरेपछि किटेनी पुगिन्छ । त्यहाँबाट ५ सय मिटर तल झरेपछि झरना आउँछ । यसको उचाइ २४५ फिट छ । झरनाको वरिपरि वनजंगलले घेरिएको रमणीय ठाउँ छ । चराचुरुङ्गीको आवाजसँगै माथिबाट झरेको पानीको आवाजले आनन्द दिन्छ ।दिदीबहिनी झरनाइलाम नगरपालिका–३ पुवामझुवास्थित महभीरको दिदीबहिनी झरनामा पर्यटकको आकर्षण बढ्दो छ । नजिकै दुईवटा झरनासँगै भएकाले यसको नाम दिदीबहिनी झरना राखिएको हो । यो झरना १२५ फिट अग्लो भएको अनुमान स्थानीयवासीको छ । इलाम सदरमुकामबाट करिब २० किलोमिटरको दूरी तय गरेपछि रक्सेको बाघखोर बजार पुगिन्छ । त्यहाँबाट अढाई किलोमिटर भित्र कच्ची सडकको यात्रा गरेपछि झरनामा पुग्न सकिन्छ । यस क्षेत्रमा टिम्मुर, चिमफिङ, वनसुपारी, चिराइतोलगायतका २० भन्दा बढी प्रकारका जडीबुटी पाइन्छन् ।माङसेबुङमाङसेबुङ किराँत धर्मस्थलका रूपमा प्रसिद्ध मानिन्छ । यो धर्मगुरु आत्मानन्द लिङदेनको वासस्थान हो । यहाँ गुरुको जन्मोत्सवको अवसरमा महोत्सव सञ्चालन हुन्छ । माङसेबुङ गाउँपालिकास्थित गजुरमुखी धाम, माङमालुङ, किराँत धर्मावलम्बीहरूको धार्मिकस्थल लारुम्बाजस्ता प्रसिद्ध तीर्थस्थल छन् । झापाको दमकबाट करिब २० किलोमिटरको यात्रा तय गरेपछि यहाँ पुग्न सकिन्छ । यो क्षेत्रमा पुग्न बाटोको त्यति राम्रो सुविधा भने छैन ।पानीटारचियाबगानको दृश्यावलोकन गर्न पानीटार धेरैको रोजाइमा पर्न थालेको छ । कन्यामको झल्को दिने पानीटारमा मन्दिर र खेलमैदान भएकाले यस क्षेत्रमा वनभोज खानेको भीड हुन्छ । यहाँ अहिले होमस्टे सञ्चालनमा छ । पानीटारबाट तराईका फाँटसमेत देख्न सकिन्छ । यहाँ विभिन्न जातजातिको संस्कृतिलाई नजिकबाट नियाल्न सकिन्छ । पानीटारबाट दक्षिणतर्फ सिद्धिथुम्काडाँडा, अजम्बरेडाँडा, जितपुरको झ्याउपोखरी, खान्द्रुङ गुफालगायतका पर्यटकीय क्षेत्र छन् । चियाबगानभित्र बस्न सहज होस् भनेर गोलघरहरू निर्माण गरिएको छ । पानीटार पुग्न सदरमुकामबाट नेपालटार हुँदै गाग्रेभञ्ज्याङबाट ओरालो झर्नुपर्छ । झापाबाट सीधै सिद्धिथुम्का, सोयाक, जितपुर हुँदै मंगलबारेबाट पनि पुग्न सकिन्छ । झापाको बिर्तामोडबाट करिब ५६ किलोमिटरको यात्रा तय गरेपछि पानीटार पुगिन्छ ।ढापपोखरीसन्दकपुर गाउँपालिका–५, जमुनामा रहेको ढापपोखरी स्थानीयवासीको प्रयासबाट पर्यटकीय गन्तव्य बन्दै गएको छ । ५० रोपनी क्षेत्रफलमा फैलिएको उक्त पोखरी १७ सय मिटरको उचाइमा छ । पोखरीमा स्थानीयले डुंगा सञ्चालनमा ल्याएका छन् । सिमसार क्षेत्र ढापपोखरीमा माछापालन गरिएको छ । यहाँ फिसिङ गर्न रुचि राख्नेलाई स्थानीयले त्यसको सुविधा दिने योजना बनाएका छन् । ढापपोखरी पुग्न इलाम सदरमुकामबाट ५० किलोमिटरको दूरी पार गरेपछि पुग्न सकिन्छ । मेची राजमार्गको नेपालटारबाट मंगलबारे हुँदै गजुरमुखी पनि पुग्न सकिन्छ । गजुरमुखी धाम धार्मिक पर्यटकका लागि महत्वपूर्ण स्थल हो ।

सुजाता मुखिया, माघ ८, २०७७

-- पुरै पढ्नुहोस् --

घुमफिरका लागि होमस्टे

कोरोना महामारीले लामो समय थलिएको होमस्टे व्यवसाय अहिले केही सामान्य भएपछि फेरि जुरमुराउन थालेको छ ।

प्रकृति दाहाल, मंसिर ११, २०७७

-- पुरै पढ्नुहोस् --

नेपालमै घुमफिर

नेपालका हिमाली भेग तथा नदीको किनारमा बेग्लै रमाइलो हुन्छ । अहिले धेरैजसो परिवारसहित नगरकोट, सुकुटे बीच, गोरखा बीच, त्रिशूली बढी जान्छन् ।

सुजाता मुखिया, माघ १३, २०७६

-- पुरै पढ्नुहोस् --

खप्तड :  प्रकृतिको उपहार

सुदूरपश्चिमका चार जिल्ला बझाङ, बाजुरा, डोटी र अछामको थाप्लोमा पर्ने भूस्वर्ग खप्तडले अनेकौं विविधता बोकेको छ । पर्यटन पत्रकार अमृत भादगाउँले भन्छन्–‘प्राकृतिक, धार्मिक, ऐतिहासिक एवं पर्यटकीय तवरले छुट्टै अस्तित्व बोकेको सुदूरपश्चिमको श्रीपेच हो ।’ उनी थप्छन्–‘२ हजार ७ सयदेखि ३ हजार २ सय २७ मिटरसम्मको उचाइमा पर्ने खप्तड जैविक विविधताको राजधानी हो ।’

वसन्तप्रताप सिंह, विद्या राईपुस ९, २०७६

-- पुरै पढ्नुहोस् --

विदेशमा हनिमुन

मंसिरदेखि जेठसम्मलाई नै हनिमुनको सिजन मानिन्छ । हरेक जोडी विवाहपछिको हनिमुनका लागि एक्साइटेड पाइन्छन् । हनिमुनका लागि हाम्रै देशमा धेरै ठाउँ रमणीय छन् । यद्यपि कतिपय नवविवाहित जोडीको चाहना विदेश घुमघाम हुन्छ । सही र कम खर्चमा घुमघाम हुने स्थानको जानकारी नहुँदा आफ्नो इच्छा मार्नुपर्ने अवस्था पनि आउँछ ।

नारी संवाददाता , मंसिर ९, २०७६

-- पुरै पढ्नुहोस् --

रमाइलो र रिफ्रेसमेन्टका लागि आउटिङ 

एक जमाना थियो, कुनै चाडपर्व, पूजा, संस्कार आउन लागे हातका औंला गन्न थालिन्थ्यो, तर अहिले समयअनुसार यी सबै पर्वको महत्व पनि परिवर्तन भएको छ । शिक्षा एवं सञ्चारको विकास तथा बदलिँदो सोच अनि ग्लोबराइजेसनसँगै संस्कार र संस्कृति पनि फेरिएको छ । सस्तो र सहज पहुँचका कारण भोज तथा उपहारप्रति धेरैलाई चासो छैन ।

नारी संवाददाता , कार्तिक ७, २०७६

-- पुरै पढ्नुहोस् --

मौसम चाडपर्वको  ट्रेन्ड घुमफिरको

चितवनको सौराह गएकै हो, पोखरा पनि घुमेकै हो । काठमाडौं, ललितपुर र भक्तपुरको त कुनाकाप्चा पुगिएको छ । यसपटक अलि नयाँ ठाउँ घुम्ने हो कि ? नयाँ परिवेश, नयाँ हावापानी, नयाँ रहनसहन तथा नयाँ खानपानसँग साक्षात्कार गर्ने पो हो कि ? शरद ऋतुको आगमनसँगै घुमघाममा निस्कनेहरू ह्वात्तै बढ्छन् । नयाँ ठाउँ तथा नयाँ परिवेशको अनुभूति गर्न यो उपयुक्त मौसम पनि हो ।

सुजाता मुखिया, आश्विन ९, २०७६

-- पुरै पढ्नुहोस् --

मौसम घुमफिरको, सयर विदेशको

शरद ऋतुको सुन्दर मौसम । त्यसमाथि चाडपर्वको रौनक अनि फुर्सदिलो समय । यस्तो मौकामा घुमफिर गर्दा विछट्टै रमाइलो हुन्छ । त्यसैले त अहिले नेपालीहरूले घुमफिरका लागि यही मौसम रोज्न थालेका छन् । गर्मी सकिएर वायुमण्डलमा चिसो हावा चल्न थालेको यो मौसममा हिलो र झरी झेल्नुपर्दैन । त्यसैले घुमफिरका सौखिनहरूलाई यही मौसम बढी अनुकूल हुन्छ ।

सुजाता मुखिया, भाद्र २५, २०७६

-- पुरै पढ्नुहोस् --

एक्ला घुमन्ते

नाम जुली, मान्छे भने एकदमै चुँजी, घुम्न मन लाग्यो र गोजीमा पैसा छ भने जुली झोला प्याक गर्छिन् र यात्रामा निस्किहाल्छिन् । न उनलाई साथी चाहिन्छ न त कुनै आफन्त नै । जुली न कहिल्यै थाक्छिन् न हरेस खान्छिन् । उनको एउटै उद्देश्य छ एक्लै यात्रा गर्ने ।

प्रकृति दाहाल, भाद्र १, २०७६

-- पुरै पढ्नुहोस् --

चिया बगानमा  कल्चरल पोज

‘हरियो कार्पेट’ जस्तो देखिने चिया बगानमा खिचिएको तस्बिर सामाजिक सञ्जालमा अपलोड गरे लाइक र कमेन्ट थामिनसक्नु हुन्छ । इलामको कन्याम चिया बगान पुगेका पर्यटकहरु हिजोआज आफूले लगाएको पहिरनमा मात्र फोटो खिचाउँदैनन् । उनीहरु विभिन्न जातजातिका मौलिक पोसाक लगाएर फोटो खिचाइरहेका पाइन्छन् ।

शब्द तथा तस्बिर : युवराज गौतम, असार १८, २०७६

-- पुरै पढ्नुहोस् --

त्रिशूली नदीमा र्‍याफ्टिङ

नुवाकोटमा बढ्दो गर्मीका बीच चिसो पानीमा तैरँदाको मज्जा बेग्लै हुन्छ । त्यसैले पनि त्रिशूलीको स्वच्छ पानीमा र्‍याफ्टिङ गर्न रमाउने पर्यटकहरू बढिरहेका छन् । त्रिशूली नदीको तल्लोभाग धादिङ र चितवन क्षेत्रमा जलयात्राको राम्रो सम्भावना पनि छ ।

नारी संवाददाता , जेष्ठ १७, २०७६

-- पुरै पढ्नुहोस् --