रोजिना श्रेष्ठ, मिस नेपाल अर्थ

काठमाडौंकी रोजिना श्रेष्ठ आफ्नो आत्मविश्वास, लगनशीलता, परिश्रम तथा मेहनतका  कारण मिस नेपाल अर्थको उपाधि हात पार्न सफल भएको बताउँछिन् । सानैदेखि विभिन्न किसिमका इभेन्टमा सहभागी हुन रुचाउने रोजिनाले मिस एपेक्स–२०१४ को उपाधि जितेकी थिइन् । उनले आफूलाई मोडल हन्टमा समेत प्रस्तुत गरिसकेकी छिन् ।

यसपटकको मिस नेपालको परिणामबाट कत्तिको सन्तुष्ट हुनुहुन्छ ?

पहिले–पहिले धाँधली भयो, रिजल्ट राम्रो भएन भन्ने गुनासो सुनिन्थ्यो । यसपटकको परिणाम हेर्दा जसले जुन–जुन क्याटगोरीमा जित्नुपर्ने हो त्यसैमा जितेजस्तो लाग्छ ।  म मिस नेपाल अर्थकै लागि उपयुक्त थिएँ भने निकिता नै मिस नेपालकी मुख्य दावेदार हुन् ।

मिस नेपालमा सहभागी भएपछि आफूमा के–कस्तो परिवर्तन पाउनुभयो ?

पहिले म हाँस्दै नहाँस्ने, चुपचाप रहने स्वभावकी थिएँ तर मिस नेपालमा भाग लिएपछि ममा परिवर्तन आएको छ । अहिले म हाँस्ने, सबैसँग घुलमिल हुने भएकी छु । ममा आत्मविश्वास पनि बढेको छ ।

मिस नेपालमा किन सहभागी हुनुभयो ?

साथीहरू मिस नेपालमा भाग लेऊ भन्थे । मलाई पनि जिते पनि हारे पनि यो एउटा राम्रो प्लेटफर्म हो जस्तो लाग्यो, त्यसैले सहभागी भएकी हुँ ।

अठार जना प्रतिस्पर्धीमध्ये कसलाई मुख्य प्रतिस्पर्धी मान्नुभएको थियो ?

सबैमा केही न केही खुबी थियो । त्यसैले मलाई कुनै पनि प्रतिस्पर्धीसँग डर लागेको थिएन । मैले त आफूलाई नै आफ्नो मुख्य प्रतिस्पर्धी मानेकी थिएँ ।

आफ्नो जितलाई कसरी सेलिब्रेट गरिरहनुभएको छ ?

परिवारसँग सगुन लिएर, साथीहरूसँग बधाईहरू लिँदै अझ भन्ने नै हो भने यो दुई दिन त फोनमै बढी व्यस्त रहें ।

मिस अर्थका लागि के–कस्तो तयारी गर्ने योजना छ ?

आफूलाई अझै ग्रुमिङ गर्छु । ६ हप्ताको प्रशिक्षणले सबै कुरा पुग्दैन । सबै कुराको अलिअलि ज्ञान भयो तर अब मिस अर्थको तयारीमा केन्द्रित हुन्छु । मिस अर्थमा सहभागी अग्रजहरूसँग कुराकानी गरेर, अनुभव बटुलेर, पुराना इभेन्टहरूको भिडियो हेरेर तयारीमा जुट्नेछु ।

तपाईंको रुचि के–कस्ता कुरामा छ ?

मेरो रुचि भ्रमण, कविता लेखन तथा अनुसन्धानमा छ ।

तस्बिर : महेश प्रधान

मेकअप : श्रद्या मास्के

पहिरन : सुष्मा सिंह, वुमन्स प्लानेट, घण्टाघर

लोकेशन : होटल अन्नपूर्ण