पिंकाथन काठमाडौंको तेस्रो संस्करणको उपाधि सशस्त्र प्रहरीकी कान्छीमाया कोजुले जितेकी छन् । यसपटक पनि मुख्य प्रतिस्पर्धा हाफ म्याराथनमा सशस्त्र प्रहरीकी कोजु विजयी हुँदै लगातार तेस्रो पटक उपाधि जितेर ह्याट्रिक गरेकी हुन् । यसअघिका दुई प्रतियोगितामा पनि कान्छीमायाले नै उपाधि जितेकी थिइन् ।
सशस्त्रकी कान्छीमायाले निर्धारित दूरी १ घण्टा २१ मिनेट ४४ सेकेन्डमा पुरा गर्दै उपाधि उचालेकी हुन् । यो स्पर्धामा नेपाल प्रहरीकी राजपूरा पछाई दोस्रो भईन् भने सशस्त्रकै पुष्पा भण्डारी तेस्रो भइन् । हाफ म्याराथनमा प्रथमलाई ५१ हजार, दोस्रोलाई ३१ हजार तथा तेस्रोलाई २१ हजार रुपैयाँ प्रदान गरिएको थियो ।
१० किलोमिटरतर्फ सशस्त्रकी सन्तोषी श्रेष्ठ प्रथम, चन्द्रा राउत दोस्रो तथा सरस्वती कडायत तेस्रो भए । विजेताले ३१ हजार, दोस्रो हुनेले २१ हजार तथा तेस्रोले ११ हजार नगद पुरस्कार हात पारे । ५ किलोमिटरतर्फ सामना कार्की प्रथम भइन् भने ११ हजार नगद पुरस्कार जितिन् । यसैगरी फूलमती राना दोस्रो भईन् भने काजल विष्ट तेस्रो ।
३ किलोमिटर दौडमा सानुका थापा प्रथम हुँदा स्वस्तिका श्रेष्ठ दोस्रो तथा प्रतिमा कार्की तेस्रो भए । विजेतालाई प्रहरी महानिरीक्षक सर्वेन्द्र खनालसहित बलिउड सुपर मोडल मिलिन्द सोमन, नेपाल ओलम्पिक कमिटी उपमहासचिव राजीव श्रेष्ठलगायतका अतिथिले पुरस्कार वितरण गर्नुभयो । महिला सशक्तिकरण र स्वास्थ्यप्रति जनचेतना जगाउने उद्देश्यले भारतीय सुपर मोडेल, फिटनेस गुरु तथा बलिउड अभिनेता मिलिन्द सोमनले पिंकाथन अभियान शुरु गरेका हुन् । भारतको सबैभन्दा ठूलो महिला दौड प्रतियोगिता पिंकाथन विगत तीन वर्षदेखि नेपालमा पनि भइरहेको छ ।
नेपालमा लेजर पोर्ट नेपालले यो इभेन्ट गर्दै आएको छ । पिंकाथन काठमाडौंको तेस्रो संस्करणमा २ हजार ५ सय महिला सहभागी भएको लेजर पोर्ट नेपालका प्रबन्ध निर्देशक नमराज जोशीले जानकारी दिनुभयो । प्रहरी प्रधान कार्यालय नक्सालमा इभेन्ट भएको हो ।
आममहिलालाई लक्षित गरी महिलाको विषयवस्तु सम्बन्धित म्यागेजिनको संख्या न्यून रहेको अवस्थामा नारी मासिकको परिकल्पना गरिएको हो । कान्तिपुर पब्लिकेसन्सको सह–प्रकाशन नारी मासिकले महिलाका विविध आयामलार्ई समेट्दै आएको छ ।महिलाका विषयवस्तुमा प्रकाशित म्यागेजिनको संख्या न्यून रहेको अवस्थामा यसले महिलाका विभिन्न विषयलार्ई समेट्दै आफूलार्ई अग्रस्थानमा राख्न सफल भएको छ ।
© Copyright narimag.com.np |
