नेपाली समाजमा पनि एउटै क्षेत्रमा कार्यरत पुरुष तथा महिला सहकर्मीबीच माया–प्रेम बसी विवाह गर्नेहरू धेरै छन् । एउटै क्षेत्रका दम्पतीहरूबीच काम गर्न सजिलो त हुन्छ नै एउटै क्षेत्र हुँदा कतिपय दम्पतीमा इगोसमेत उत्पन्न हुनसक्छ । हिन्दी चलचित्र अभिमानमा जस्तै श्रीमती आफूभन्दा माथि पुग्दा वा सफल हुँदा पुरुष मानसिकताले त्यसलाई पचाउन गार्हो मान्छ । यस्ता धेरै पुरुष नेपाली समाजमा पनि छन् । फलस्वरूप महिलाहरूले कि
आफ्नो काम छोडेर घर बस्न बाध्य हुनुपर्छ कि त अर्काे सजिलो काममा लाग्नुपर्छ ।
यद्यपि सबैमा यस्तो समस्या हुँदैन र धेरै आधुनिक पुरुषले आफ्ना जीवनसाथीप्रतिको दृष्टिकोणमा पर्याप्त परिवर्तन ल्याइसकेका छन् । एउटै पेसामा लाग्दा धेरै सजिलो हुने तथा सफलता पनि हात पर्ने धारणा एकै पेशामा रहेका धेरैले अभिव्यक्त गरेका छन् ।
प्रिन्सिपल जोडी रञ्जित र सुनीता
सुनीताको नजरमा रञ्जित
कुलको चौतर्फी विकासका लागि दत्तचित्त । कसरी आफ्ना विद्यार्थीलाई अब्बल बनाउने भन्ने कुरामा चिन्तित । घरमा बच्चाहरूको आवश्यकता पूरा गर्न सधैं तत्पर ।
रञ्जितको नजरमा सुनीता
परिवारका सदस्यहरूप्रति राम्रो व्यवहार, सबैलाई खुसी राख्न हरदम तत्पर, शान्त, छुच्चो नहुने । मन नपरे पनि राम्रो व्यवहार गर्ने ।
शिक्षण पेसामा लागेको पनि २० वर्ष नाघिसकेको छ–कान्जिरोवाका प्रिन्सिपल रञ्जित थापा र प्रज्ञाकुञ्जकी प्रिन्सिपल सुनीता पौडेलको । कलेज पढ्दादेखि नै शिक्षण पेसामा लागेका रञ्जित र सुनीताको पहिलो भेट सातदोबाटोस्थित युनाइटेड स्कुलमा भएको थियो । सुनीताभन्दा पछि उक्त स्कुल ज्वाइन गरेका रञ्जितलाई त्यहाँको पढाउने शैली तथा वातावरणका बारेमा सुनीताले नै जानकारी दिएर सहज बनाइदिएकी थिइन् ।
४ वर्ष सँगै स्कुलमा काम गरेको यो जोडी मिल्ने साथीका रूपमा सबैका आँखा परेका थिए । केही समयपछि रञ्जित कोअर्डिनेटरका रूपमा जेम्स स्कुल गए अनि त्यसैताका उनीहरूले विवाह गरे । विवाह गर्दा उनीहरू दुवै २५ वर्षका थिए । सुनीतालाई रञ्जितको व्यक्तित्व, कामप्रतिको जागरुकता तथा उत्सुकताले प्रभाव पारेको थियो भने रञ्जितलाई सुनीताको सबैलाई सहयोग गर्ने व्यवहार मीठो बोली तथा शिक्षाप्रतिको उत्सुकताले । उनीहरूको जोडी शिक्षा क्षेत्रमै व्यस्त भै क्रमश: सफलता हात पार्दै अघि बढेको जोडी हो । एक–अर्काको साथ पाएर आजको स्थानसम्म पुग्न सकेका हौं भन्छन् उनीहरू ।
उनीहरूमा एउटा समानता छ–रञ्जित कोअर्डिनेटर हुँदा सुनीता पनि कोअर्डिनेटर, भाइस प्रिन्सिपल हुँदा भाइस प्रिन्सिपल तथा प्रिन्सिपल हुँदा प्रिन्सिपल भइन् । अलग–अलग शिक्षण संस्थामा एउटै पदमा रहेका थापा दम्पती आफ्नो दाम्पत्य जीवन एवं करिअरको सफलताको रहस्य यही एउटै पेसालाई मान्छन् । रञ्जित भन्छन्, ‘हामी एकैपटक प्रिन्सिपल भएका होइनौं, क्रमिक रूपमा परिश्रम गर्दै जाँदा यहाँसम्म आउन सफल भएका हौं ।’ घरमा पनि उनीहरूबीच स्कुलका साथै नयाँ–नयाँ प्रविधिका बारेमा छलफल भैरहन्छ ।
सुनीता क्लास रुम टिचिङ, ट्रेनिङ आदि विषयमा पोख्त छिन् भने रञ्जित क्लास रुमबाहिरको म्यानेजमेन्ट, अतिरिक्त क्रियाकलाप आदिमा पोख्त छन् । यसरी दुवैको ज्ञान र क्षमता बाँड्दा कम्प्लीट प्रिन्सिपलमा हुनुपर्ने गुण पाइन्छ । घरमा रञ्जितको भन्दा सुनीताको जिम्मेवारी अलि बढी छ । यद्यपि आवश्यक पर्दा रञ्जितले पनि घरको काममा सहयोग गर्छन् । एउटै क्षेत्रका जीवनसाथी भएकाले उनीहरूलाई काममा सहयोग मिलेको छ ।
बेफाइदा : फरक क्षेत्र भएको भए नयाँ कुरा पनि जानिन्थ्यो ।
फाइदा : दुवैको क्षमतालाई मिलाएर कम्प्लीट र सफल हुन सजिलो ।