अन्तर्वार्ताका लागि होस् वा कार्यालयको पहिलो दिन, कुनै औपचारिक भेटघाट होस् वा आफ्नो प्रियतमिसतको पहिलो डेट, अधिकतर युवतीमा आफ्नो प्रभाव कसरी जमाउने भन्ने कुरामा अन्योल पाइन्छ । उनीहरू आफ्नो ड्रेसअपमा त ध्यान दिन्छन् तर अन्य कुरामा भने सजग देखिँदैनन् । 

–शब्द वा बानीबाट सबै कुरा झल्कन्छ भन्ने छैन, धेरै कुरा व्यक्तिको आँखाको भाव र भाकाबाटै थाहा पाउन सकिन्छ । अत: विशेष भेटघाटमा जानुपूर्व आँखा आकर्षक देखियोस् भन्ने कुरामा ध्यान पुर्‍याउनुपर्छ । त्यसैले महत्त्वपूर्ण भेटघाटको अघिल्लो दिन आरामले पूरा निद्रा सुत्नुपर्छ । ढिलो सुत्ने बानी छ भने दिउँसो आरामका लागि केही समय निकाल्नुपर्छ । 

–आँखाको मेकअप अत्यन्त गाढा नहोस् भन्ने कुरामा ध्यान पुर्‍याउनुपर्छ । कम मेकअपका कारण आँखाको आकर्षण र सुन्दरतामा कमी नआओस् भन्ने पनि ख्याल राख्नुपर्छ । 

–कुराकानी गर्दा आँखामै हेर्नुपर्छ ।

–सुन्दर एवं मधुर मुस्कानका साथै ओठको प्राकृतिक मेकअप महत्त्वपूर्ण हुन्छ । ओठको मेकअप आफू सुहाउँदो हुनुपर्छ । 

–आफ्नो सुन्दर केशको स्याहार–सम्भारमा समय दिनुपर्छ । महत्त्वपूर्ण भेटघाटपूर्व स्याम्पु एवं कन्डिसनिङ गर्नु राम्रो हुन्छ । कुराकानीका क्रममा भरसक केश चलाउनु हुँदैन ।

–हातले पनि व्यक्तित्वमा प्रभाव पार्न सक्ने भएकाले राम्रोसित मेनिक्योर गराउनुपर्छ । नङमा लगाइएको पालिस पहिरन एवं व्यक्तित्व सुहाउँदो हुनु आवश्यक छ । हातमा चुरा, औंठी, ब्रासलेट, आर्मलेट आदि एसेसरिज लगाइन्छ भने त्यो पनि वातावरण, पहिरन एवं व्यक्तित्व सुहाउँदो छ–छैन भन्ने कुरामा ध्यान दिनुपर्छ । 

–अनुहारको आभा भन्नु नै भित्री खुसी हो । यदि कोही मनबाटै खुसी र आत्मविश्वासी छैन भने त्यो मुहारमा झल्कन्छ । अत: आफ्नो आत्मविश्वास र खुसीलाई कायम राख्नुपर्छ । मुहारको मेकअप गाढा नहोस् भन्ने कुरामा पनि ध्यान दिनु आवश्यक छ ।

–उठ्ने, बस्ने, हिँड्ने, बोल्ने आदि शैलीबाट शालीनता तथा आत्मविश्वास झल्कनुुपर्छ । मीठो बोली र व्यवहारबाट अरूलाई सजिलै प्रभावमा पार्न सकिन्छ । कुराकानीमा आत्मविश्वास झल्कनुपर्छ । बोली स्पष्ट, कुरामा पूर्णता एवं आत्मविश्वासले व्यक्तित्वलाई प्रभावशाली बनाउँछ । के, कसरी, कहाँ, कोसित बोलिँदैछ र किन बोलिँदैछ भन्ने कुरामा पनि सजगता अपनाउनुपर्छ । 

–सन्तुलित आहार, नियमित व्यायाम तथा पूरा निद्रालाई दिनचर्या बनाउनुपर्छ । तन, मन र मस्तिष्कको स्वस्थताले व्यक्तित्वलाई आकर्षक बनाउँछ र आकर्षक व्यक्तित्व नै प्रभावशाली हुन्छ । 

–फेसन र स्टाइलका सम्बन्धमा भने शालीन र ट्रेन्डी शैली अँगाल्नु राम्रो हुन्छ । सोहीअनुसार रंग छनोट, पहिरनको डिजाइन तथा एसेसरिजको कम्बिनेसन व्यक्तित्वलाई प्रभावशाली बनाउने र आकर्षक देखाउने हुनुपर्छ ।